Tusangaredin Nakash Yisend Yetu!
1 Kudiosh payitanginau antu, Yehova uyinkishining atushalapol end yisend kushalijan. Ndiy wayinkisha yisend pakad kutal anch amakundj ap amband, reng, ap mashakamin ma mwom. (Luka 1:41, 42; Midimu 7:46; Filp. 1: 29) Yisend ik yitwinkishinay etu nlel unou?
2 Yisend Yimwing Tukweta: Twitapidil dilau dia kutulej kudi Yehova. (Mat. 13:11, 15) Kumushiman Yehova kusutil ku yakul yetu mu chikumangan chidi chisend chikwau tusangaredina. (Kus. 35:18) Anch tukwet mutapu wa kwakul, twakwiling nich musangar. Chilik chimwing, anch twaman anch mudimu wawonsu tukweta mu chikumangen udi dilau twitapidila, tukez kuusal kamu mu mutapu upandakena kuwap kwambatan nich ukaliweny wetu. Ov, usadining chisu ni chisu mudimu wa kukomb ni kurijek nawamp chot cha Want?
3 Ap anch mamiliyon ma antu miyipwil anch Nzamb uteshining malembil mau, etu twitapidil dilau dijim anch malembil metu amateshining kudi Muntu mujim nakash mu mangand. (Jinsw. 15:29) Yehova amwinend uteshining malembil ma atushalapol end. (1 Pi. 3:12) Katekinap chijidik cha tupamp tukutwisha kumulembil. Tukwet chipan chisangareshina mudi ik, cha kulembil “tupamp twawonsu”!—Ef. 6:18.
4 “In Mudimu Nend Nzamb”: Chisend chimwing chiwamp nakash chitukweta chidi cha kulejan rusangu ruwamp ra Want wa Nzamb mudi “in mudimu nend Nzamb.” (1 Kor. 3:9) Udi mudimu uletininga musangar ni diswedish. (Yohan 4:34) Yehova kakwetap kuswir kwa kusadin antu mulong wa kusal mudimu winou, pakwez watwinkishau etu mulong utukatin. (Luka 19:39, 40) Mu kusal mwamu, Yehova kapanap chisend chinech kudi muntu mwawonsu. Antu akat kusal mudimu wa kulejan patok afanyidin kuwanyish ni kwikal nich ngikadil yimwing yitinau ya mu spiritu. (Isa. 52:11) Ov, tumekeshin anch tumen nich usey chisend chinech mu kusal anch mudimu wa kulejan tusadila rubing ni rubing wikala wa usey?
5 Yisend yitwinkishinay Yehova yipitishina mwom wetu. (Jinsw. 10:22) Kangal wayiman anch yidi ya chamwamu! Mu kumekesh anch tusangaredin chakin kamu yisend yetu ya mudimu, tumusangareshin Tatukwetu wa mwiur, Mwin kupan “yom yawonsu yiwamp ni yiwanyidina.”—Yak. 1:17.