Kulejan Want—Mudimu Upandakena Kuwap
1 Dichuku ni dichuku, tutikit ni tutikit twa antu pa divu isakidil muchim wa kupan wa Yehova chakwel kuyikwash mu mwom. (Mat. 5:45) Pakwez, antu akemp kusu awiy itapidila dilau dia pakampwil dia kumekesh kujikitish kud Sakatang wau kusutil kulejan rusangu ruwamp ra Want wa Nzamb. (Mat. 24:14) Ov, umening nich usey ik mudimu winou upandakena kuwap?
2 Kulejan Want kumutumbishin Nzamb ni kuletin ruchingej ni chisambu kud antu amena mar mu chirung chinech cha kanvundangesh. (Heb. 13:15) Kud antu akata kwitiyij uruu, chirumburikin mwom wa chikupu. (Yohan 17:3) Ov, mudimu ik wa ku mujimbu wa pichuku pichuku upanina yiyukish mud yiney? Kambuy Paul wamekesha kamu patok kujikitish kwend mulong wa mudimu mu mutapu wadingay ni kuusal. Ndiy waumana mud chipau.—Midimu 20:20, 21, 24; 2 Kor. 4:1, 7.
3 Kuman Nich Usey Mudimu Wetu: Mutapu umwing tukata kumekesh kujikitish mulong wa mudimu wa kulejan udi kusutil kuta muchim ku usey wa mudimu wetu. Ov, tukat kwitekinang chisu cha kurijek minsamb yikutwisha kuyishik antu atuteshina ku michim? Ov, tukutwish kuwapishaku ukaliweny wetu wa kusadil Mifund ni mu kutongin pamwing nau antu? Ov, tukat kulejanang muchifanyidina mu teritwar utwinkinau? Ov, twij mutapu wa kusambish ni kutakel dilejan dia Bibil? Mud in Kristu ashinshamena, a pasak ni a katat, tudi abachikinau nich kuman kuwamp kwa mujikit winou, ni tukatin kamu nakash mudimu wetu.—Mat. 25:14-23.
4 Chisu turishina nich yibudikin ya upal, mayej, ap mikadil yikwau yikash, chikasikeshin kwijik anch mushiku wetu wa kwinungin mu mudimu wa kulejan ukwet chakin usey nakash. Dizu dia Nzamb ditushinshikin anch Yehova umen kamu nich usey usu mud winou tusadila mu kumusadil, ap anch usu winou ukutwish kumekan mud wakad chibudikin ku mes kwa antu akwau.—Luka 21:1-4.
5 Kulejan Want udi musul umwing wa musangar ujim. Nambaz umwing ukweta mivu 92 walonda anch: “Chidi cha musangar mud ik kutongin mivu 80 ni kusut mu kumusadil Nzamb—wakad ap kwinan! Anch kwading kand mutapu wa kusambishiril mwom wam, nelang chakin kamu kutond mwom wawiy umwing, mulong ‘rukat ridimukina ra Yehova ripandaken mwom kuwap.’ ” (Kus. 63:3) Tumanany amboku niyetu nich usey ujim mudimu winou upandakena kuwap utwinkinay Nzamb—mudimu wa kulejan Want.