Antu Inkishinau Chipau

¹ Mupostol Paul wakwata nich usey mudimu wa kulejan wamwinkishau kudi Nzamb chawiy lel wautazuka anch “chipau.” (2 Kor. 4:7) Ndiy wajijamana mu mar ni kuzengol padingay ni kusal mudimu winou. Walejana pakad kuziy kudi muntu mwawonsu watanay. Waya maweny ma mar ni ma ubaj ma akilometre avud pa divu ni mu karung. Ov, mutapu ik tukutwisha kumwimburij Paul ni kumekesh anch tusangeridin mudimu wetu wa kulejan? (Rome 11:13) Chom ik chikadishina mudimu wetu wa kulejan chipau chipandikena kuwap?

² Chipau Chijim: Yipau ya pa divu yiletining runeng rikash ni yiyukish ya kachisu kakemp. Pakwez, mudimu wetu wa kulejan uletin yiyukish ya chikupu kudi etu ni kudi antu akwau. (1 Tim. 4:16) Uyikwashin antu akin chakwel kumwijik Yehova, kukarumun mwom wau, ni kwikal nich ruchingej rakin ra mwom wa chikupu. (Rome 10:13-15) Anch twakwat mudimu wetu wa kulejan nich usey nakash, tukwikal nich rutong risangareshina mu mwom, chitongijok cha kuwanyish chikupu, ni ruchingej rikasikeshina ra machuku ma kurutu.—1 Kor. 15:58.

³ Mekesh Anch Ukwatin Chipau Chey Nich Usey: Usey tumena nich chom kanang umekening chisu chivud ku yitusotininga kupan mulong wa chom chinicha. Chidi chisend mudi ik kusadil chisu chetu ni usu wetu mu kumushiman Yehova! (Ef. 5:16, 17) Ov, mutapu tusadidina chisu chetu umekeshin anch yitukwatina nich usey nakash yidi yom ya mu spiritu kupandikanamu kukimb yom ya ku mujimbu. Mulong tukwet chom cha usey cha kulejan, ov, tukez kasot kulejan nich musangar? Ni kwikal tayad kulejan rusangu ruwamp chisu chawonsu.

⁴ Yisu yivud, yipau ya usey kakatap kuyijindjikang pakwez ayimekeshining patok chakwel antu akwau ayimana. Anch twakat mudimu wetu wa kulejan mudi chipau, tukez kuutek pa ndond ya kusambish mu mwom wetu. (Mat. 5:14-16) Nich muchim wa kujikitish, tudandamenany kumwimburij mupostol Paul ni kusadil chisu chawonsu chakwel kumekesh anch tukwatin chakin kamu mudimu wetu wa kulejan nich usey, ni kuuman mudi chipau.