Londulany Chilakej Chashay Yesu
1. Chilakej ik chashay Yesu?
1 Pitusadina mudimu wa kuyikadish in kwilej, tufanyidin kuvurik anch chilakej chetu chikwet usu ukash padi antu atutadila. Yesu walejana ku mazu ni ku yisal. Antu amutala amana mushiku wend, rukat rend pa antu, impu yend ya kusot kutumbish dijin dia Tatukwend, ni mupak wend wa kuwanyish rusot ra Tatukwend.—1 Pi. 2:21.
2. Chilakej chetu chikwet usu padi antu tusadila nau mu mujikit mu jinjil ik?
2 Pitulejena ku Chikumbu ni Chikumbu: Mudi Yesu, chilakej chetu chikwet usu padi antu tusadina nau mudimu. In kulejan asu ni akad ronganyin amena mushiku wetu wa kusal mujikit akez kutongin pa ngikadil yau mu kusal mudimu wa kulejan. Pamenau mutapu tuyisangaredina chakin kamu antu, akez kuvurik usey wa kumekesh ngikadil yiney mu mujikit. Chisu chimenau ukaliweny wetu wa kusadil Bibil, mu kuyichirikin antu, ni mu kutakel malejan ma Bibil, akez kwikal nich chibachikin cha kusal chilik chimwing.
3. Chilakej chetu chiyilejin nchik in kwilej Bibil, ni chom ik chikutwishau kwilej?
3 Pitutakedina Malejan ma Bibil: Antu twilejina nau Bibil akuman pakampwil mwikadil wetu. Chilakej, anch twayirumburil usey wa kwirijek mulong wa dilejan, kukimb maverse, ni kutek kashony pa manans majim, akez kujingunin anch tukat kwirijek. (Rom 2:21) Anch tukat kulimish kushilamu kwetu pa chisu cha kwilej nau, kakutwishap kulikidil mijikit yikwau yiyikangesha kwilej Bibil. Akez ni yawiy kuman pakad kwidjidjek anch tukwet muchim wa kwipan mu mujikit ni ritiy retu ridi rikash. Chikwikalap cha kushimokish anch in kwilej ileja ni antu alondwila nawamp chilakej cha Yesu chisu chivud ni awiy ading in kulejan a mushiku, ni asongina mabuj.
4. Pitukumangena ku yikumangan ya chikumangen, chilakej chetu chilejening ik?
4 Pitukumangena ku Yikumangan ya Chikumangen: Antu awonsu adia mu chikumangen cha Ukristu akwet chisend cha kulejan kusutil ku chilakej ku yikumangan ya chikumangen. Antu in kusanger asambishina kukumangan atanyidin ukwash ku chilakej chiwamp chimenau mu chikumangen. Akez kuman chirungul cha ukadivar, uumwing wa Ukristu, ni kudjal ni kwileng kufanyidina. (Kus. 133:1) Akez kuman kand chilakej chetu cha kukumangan nich kushinshaman ni mutapu twakwila patok ni kulejan ritiy retu pitudia ku yikumangan ya chikumangen. Mweny umwing weza ku yikumangan yetu wamana mutapu changadim mukemp wading utaninay swa verse ujimbwilau mu Bibil wend ni mutapu wading ulondwilay nawamp yadingau ni kutang. Chilakej cha changadim winou chamubachika ita dilejan dia Bibil.
5. Ov, mulong wak kitufanyidinap kupipej usey wa chilakej chetu?
5 Bibil utukasikeshin twimburija chilakej chiwamp cha umwing ni mukwau. (Filp. 3:17; Heb. 13:7) Chawiy lel, tufanyidin kuvurik anch, ang twalondul nawamp chilakej cha Yesu, akez kuchiman kudi antu akwau ni chikez kwikal nich chibachikin chiwamp padi awiy. Chitwija mwamu, tulamany katat mu muchim mazu madia mu 1 Timote 4:16 malondila anch: “Babal ey amwiney ni ku kulejan kwey.”