Yakul Ku Yipul Yen

◼ Ov, chiyiwapidil in kukumangan abula nkash kwinsudiel kwa chikunku ni chikunku chawonsu chikusalau ku Shikol ya Mudimu wa Uteokras ni ku Chikumangen cha Mudimu?

Chisu Sakatang, Yehova, chatangay divu “atutumbu a pamanch awanga miminy ya musangar ni in mwiur awonsu atupula disok dia musangar.” (Yob 38:7) In angel inay an a Nzamb asota kumutumbish Yehova mulong wa mudimu wend wamushena wa kutang, mulong wadinga uman ukwau wa manangu mend, wa kuwap kwend ni ya dikand diend.

Chiwapidil kudi etu chakwel tumekesha muchim wa kujikitish mulong wa usu usadinau akadivar netu ni mulong wa yom yilejenau. Chilakej tukutwish kubulang nkash mulong wa madiskur ni yikunku yikwau yisadilingau ku yikumangan ya pakampwil, mudi ku yitentam ya pakampwil ya dichuku chimwing, ya munyimuku ni ya distrik. Mulong yikunku yikatau kusal kwinikwa yitining chisu ni usu yiwanyidina mulong wa kuyirijek. Kubul kwetu nkash kumekeshiningap ching kusu kujikitish mulong wa mudimu ukash wa muntu wasalang diskur pakwez kand mulong wa kumujikitish Yehova ni mulong wa malejan matwinkishinay kusutin ku Dizu diend ni ku dirijek diend.—Isay 48:17; Mat. 24:45-47.

Chadi chidi nchik piur pa kubul nkash ku chikunku chikusalau ku Shikol ya Mudimu wa Uteokras ni Chikumangen cha Mudimu? Kwikil chijil chijidikina kubul nkash anch kudiokil ku muchim, chilakej mudi anch muntu wasal kapamp ka kusambish chikunku chamwinkishinau ku shikol. Pakwez, kubul nkash kukutwish kwikal mudi chaku chamwamu ni kwakad kurumburik. Chawiy kitukatap kubul nkash kwinsudiel kwa chikunku ni chikunku.

Ap anch kitufanyidinap kubul nkash ku chikunku ni chikinku chawonsu chikusalau ku Shikol ya Mudimu wa Uteokras ni ku Chikumangan cha Mudimu, tukwet mitapu yikwau mu tufanyidina etu awonsu kumekeshin kusanger kwetu mulong wa malejan ni mulong wa usu wa antu asutishina yikunku. Tukutwish kusal mwamu kusutil ku kuta nakash matu kudi in kulond. Chadi kupwa kwa chikumangan, chisu chivud chitwishikining tuya ayinetu tukayijikitisha mulong wa usu wau wasalau.—Efes 1:15, 16.