Ukutwish Kwikal Mulej
1. Mwin kulejan mwawonsu wa Want ukwet dilau ik?
1 Chom chimwing chisangareshininga nakash mu mudimu wetu chidi kumulej muntu kanang uyakin. Kumuman chitiyijinay uruu wa Want ni kumukwash chakwel amushejina piswimp Mukaleng wa mangand udi uman umwing wa kusanger nakash. (Yak. 4:8) Kumulej muntu ukweta nzal ya uyakin ni kumuman chisambishinay kuswimp mu mutapu umwing ujim mu untu wend, mu kumekan kwa chifu chend, ni mu mwikadil wend yawiy yifanyidina kwikal rutong ra mwin kulejan wa Want mwawonsu.—Mat. 28:19, 20.
2. Ov, mulong wak ukatau amwing kwidjidjek kutakel dilejan dia Bibil, ni chom ik chikutwisha kuyikwash chakwel apandakana mulong winou?
2 Muchingejina Yehova: Pa yisu ya pasak, atushalapol ashinshamena adinga ni kwidjidjek pa mulong wa kulond anch awanyishin yiyitinau chakwel awanyisha mudimu wau. Kumuchingejin Yehova Nzamb kwamutwishisha Moses, Yeremiy, Amos, ni antu akwau a chamwamu kupandakan kwidjidjek kwau ayinau ap kwiyakamish kwau ni awanyisha mudimu ujim nakash. (Kub. 4:10-12; Yer. 1:6, 7; Amos 7:14, 15) Kambuy Paul niyend ‘wajijamana,’ ap mu kulond dizu ku dizu, ndiy “wakapuka pa kulond.” Mutapu ik? Ndiy walonda anch chadinga “mwi Nzamb wetu.” (1 Tes. 2:2) Mwaning, etu awonsu tukutwish twamuchingejin Yehova chakwel atukwasha, atwinkisha manangu, ni usu utuswiridina chakwel tutakela malejan ma Bibil mayila kurutu.—Isay 41:10; 1 Kor. 1:26, 27; 1 Pita 4:11.
3, 4. Kufumb ik kudiaku mulong wa kutukwash kulejan Dizu dia Nzamb?
3 Itiyij Kukufumb: Yehova Nzamb, Mulej wetu Mujim, ukat kutufumb kusutil ku program wa malejan ma muspiritu chakwel anch twikala alej awanyishinau. (Isay 54:13; 2 Tim. 3:16, 17) Itiyij kukufumb kwinoku kusutil ku kwisakin yisu yawonsu ya kuwejin chovu chey cha Mifund ni uya kurutu mu mutapu wey wa kulejan uyakin udia mu Bibil. Ap anch rutong riner rawiy rutong ra Shikol ya Mudimu wa Uteokras ni Chikumangan cha Mudimu, yikumangan yawonsu ya chikumangen yikat kutufumb chakwel tulejana Dizu dia Nzamb.
4 Sal usu wileja mitapu yiswapela ya kulejan ap uyakin wa muspiritu ukurikina. Buku École du ministère, pa paj wend wa 227, urumburil anch: “Ufanyidin kutesh nawamp mutu wey wa mulong ey amwiney anch usotil kuyovikeshau antu akwau.” Kwakulang ku yikumangan kutukwashining tulama manans majim mu manangu mulong wa kwez kumasadil mu machuku ma kurutu. Chawiy komb irijeka nawamp, ni ukaliweny wa kulejan ukuya kurutu.
5. Kufumb ik kukwau kudia mu chikumangen mulong wa kutukwash twikala alej?
5 Kudiosh kamu kwisambishil, pakad kwidjidjek atushalapol in Kristu adinga ni kwilej kudiay umwing ni mukwau padingau ni kusal mudimu wa kwikadish in kwilej. (Luka 10:1) Anch chitwishikin, yitwalang in kulejan akweta ronganyin, ayibol, amakurump, ni atulam in kwendangan, mu mudimu wa dilejan dia Bibil. Shinshikin mutapu usadidilau yilakej yiswapela ni yom yikwau ya kulejan nich yidia mu mikand yetu ya kwilej mulong wa kurumburil uyakin udia mu Mifund. Yita yiyul akuleja chiufanyidina kusal chakwel wikala mulej muwamp. (Jinsw. 1:5; 27:17) Sanger chidia kufumb kwinoku kwawonsu—kufumb kudiokila kudiay Nzamb.—2 Kor. 3:5.
6. Yom ik ya usey uswiridina chakwel wikala mulej wa Dizu dia Nzamb?
6 Muchingejina Yehova, ni taninamu mu kufumb kuletinay. Mulembila pa mulong wey wa kusot kuya kurutu. (Kus. 25:4, 5) Niyey ukutwish wovu musangar wa chilik chimwing anch wamukwash muntu kanang wikal mudi ey, mulej wa Dizu dia Nzamb.