Kangal Wov Wom—wa Kupandakan Yovil ya Kuburen Ukaliweny
1. Ov, mulong wak antu amwing oviling wom wa kutakel dilejan dia Bibil?
1 Ov, woviling wom wa kutakel dilejan dia Bibil mulong umening anch ukwetap ukaliweny wey wa kutakel mu mutapu uwamp? Yisu yimwing, atushalapol ashinshamena a pasak mudi Moses ni Jeremiy, iyova mudi akad kwikal nich ukaliweny wa kuwanyish yisend yau. (Kub. 3:10, 11; 4:10; Jer. 1:4-6) Chawiy lel, antu avud iyoviling niyawiy mwamu. Ov, mutapu ik ukutwishau kupandakan yovil yiney?
2. Ov, mulong wak tufanyidinap kusanger kusu kusal mudimu wa kulejan wa ku chis ni chis pitukata kutakel dilejan dia Bibil?
2 Tufanyidin kuvurik anch Yehova katwitiningap kusal chom kanang chipandakenamu ukaliweny wetu. (Kus. 103:14) Chawiy, chisend chetu cha ‘kuyikadish in kwilej,’ ‘kuyilej,’ chidi chisend chimwing tukutwisha kuwanyish. (Mat. 28:19, 20) Chinech chidap chisend chatwinkishay Yehova ching kusu mulong wa uman uvud ap ukaliweny uvud tukweta. (1 Kor. 1:26, 27) Chawiy lel, tufanyidinap kusanger kusu kusal mudimu wa kulejan wa ku chis ni chis ni kutakel dilejan dia Bibil.
3. Ov, mutapu ik ukata Yehova kutufundish mulong wa mudimu wa kutakel dilejan dia Bibil?
3 Yehova Utufundishining: Ukaliweny wetu wa kuyikadish in kwilej udiokiling kudiay Yehova. (2 Kor. 3:5) Kusutil ku dirijek diend, ndiy watufundisha uyakin wa mu Bibil wakad kwijik kudi antu adia mu mangand minam. (1 Kor. 2:7, 8) Ndiy wateka mu Bibil mutapu wa kulejan wa Mulej Mujim, Yesu tufanyidina kwimburij ni utwinkishining diyiy didandamedina kusutil ku chikumangen. Chikwau kand, kalikiningap twiyijidisha ayinetu mulong wa kulejan Bibil. Watwinkisha kand yom ya mudimu, mudi buku Chifundishinay Bibil, ulejeninga uyakin wa mu mutapu wovikena ni uswapela kutesh. Kutakel dilejan dia Bibil kukutwishap kwikal chikangesh chikash mudi mututongininga.
4. Ov, mulong wak tukutwisha kwikal nich ruchingej anch Yehova ukeza kutukwash?
4 Moses ni Jeremiy atwisha kuwanyish yisend yau nich ukwash wa Yehova. (Kub. 4:11, 12; Jer. 1:7, 8) Tukutwish niyetu kumwit Yehova chakwel atukwasha. Kupwa, chisu tutakedila dilejan dia Bibil, tumufundishining muntu kanang uyakin piur pa Yehova, chom chisangareshina ku mes ma Nzamb. (1 Yoh. 3:22) Chawiy lel, itekinany rutong ra kwipan mu mudimu wa kutakel dilejan dia Bibil, mulad wa mudimu ukweta chiyukish ni musangar ukash.