Nung Chikas ku Want wa Nzamb Kusambish Kamu Katat!
Tongin bil mudi anch rinkind mukash usheshina yom ukat kusej kwi ndond ushicha. Mburamatad wapalangesh jinsangu mulong wa kuyibabesh antu anch: “CHINANY! KIMBANY NDOND YA KUJINGAMIN PAKAD KULAB!” Yom ik ukusala? Chakin kamu, ukukimb ndond ya kujingamin.
Chilik chimwing, etu awonsu tushich mwi ndond mukututina “rinkind mukash,” watazukay Yesu anch ‘mar makash.’ (Mateu 24:21) Tukutwishap kwiyep mar minam. Pakwez tukutwish kusal chom kanang mulong wa kwichidij ayinetu. Chom ik?
Mu Mafundish mend ma pa Mukandu, Yesu wapana mbil ey: ‘Dandamenany kukimb bil Want [wa Nzamb] ni kutentam kwau.’ (Mateu 6:33) Mutapu ik tukutwisha kusal mwamu?
Kimb bil Want wa Nzamb. Chinech chirumburikin anch tufanyidin kukwat Want wa Nzamb nich usey nakash kusutamu chom chikwau chin chawonsu. (Mateu 6:25, 32, 33) Mulong wak tufanyidin kusal mwamu? Mulong antu kakutwishap kupwish milong yirishinau nich antu. Ching kusu Want wa Nzamb wawiy ukutwisha kusal mudimu winou ukash.
Kimb kutentam kwau. Tufanyidin kusal usu wa kushakam kukwatijan ni mbil ni yijil yitentamina ya Nzamb. Mulong wak? Mulong anch twakwat ayinetu mupak piur pa yom yidia yiwamp ni yiyimp, tukushiken ku yibudikin yiyimp. (Jinswir 16:25) Chikwau kand, anch twashakam kukwatijan ni mbil ja Nzamb, tukatap ching kusu kumusangaresh Nzamb pakwez tukat kutaninamu kand ayinetu.—Isay 48:17, 18.
Dandamen kukimb bil Want wa Nzamb ni kutentam kwau. Yesu wababeshana anch, antu amwing akutwish kwikal ni kampuw, akutong anch akutwish kutan diking kusutin kwikal ni nfalang jivud. Akwau akutwish kulikidil yakamish ya mwom yiyisend nakash mu chilik cha kukangany kutan chisu cha kukimb Want wa Nzamb.—Mateu 6:19-21, 25-32.
Pakwez Yesu washilamu anch antu anungina chikas ku Want wa Nzamb akwikal nich yom yikwetau nich kuswir kusambish katat ni kusanger yiyukish yakad musul mu machuku ma kurutu.—Mateu 6:33.
Ap anch in kwilej a Yesu mu mivu chitot ya kusambish ading akimbin bil Want wa Nzamb ni kutentam kwau, kamanap nsudiel ya kusansan kwawonsu ni mar mu chirung chau. Pakwez ayikinga. Mutapu ik?
Ading ashich kukwatijan ni mbil jitentamina ja Nzamb, ni mbil jinej jayichidija ku yakamish yarishau nich antu ading akad kwijik yom yalonday Nzamb. Ritiy rau rikash radingau nich anch Want ukwez rayikwasha kurish ap ni milong yading yikash nakash. Ni Nzamb wayinkisha “ukash upandakena ukash wawonsu” chakwel atwish kujijaman.—2 Korint 4:7-9.
OV, UKUKIMB BIL WANT WA NZAMB?
In Kristu a mu mivu chitot ya kusambish aziyina kwi mbil ya Yesu ya kukimb bil Want. Alejana rusangu ruwamp ra Want mu mangand ma pa chirung chau. (Kolosay 1:23) Ov, kudi antu adandamedina kusal mwamu nlel?
Inge! Atuman a Yehova ajingunin anch chisu chishadilaku chakwel Want wa Nzamb ushesha mangand minam chashal kal chikemp. Chawiy asadin usu wau wawonsu mulong wa kushakam kukwatijan ni mazu ma Yesu malondina anch: “Chifanyidin rusangu ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”—Mateu 24:14.
Mutapu ik ukwakula ku rusangu ruwamp? Tukukasikeshin kuyimburij antu ading mu musumb wa Berey, mwi ngand ya Masedon mu mivu chitot ya kusambish. Pateshau rusangu ra Want kudi kambuy Paul, itiya uruu wend nich “mushiku nakash.” Kupwa ‘ashinshikina nawamp Mifund’ mulong wa kwikal nich kashinsh anch yom yateshau yading yakin, ni asadina mu mwom wau yom yilejau.—Midimu 17:11, 12.
Niyey ukutwish kusal mwamu. Anch wakimb bil Want wa Nzamb ni kutentam kwau, ukwikal mu diking nlel ni ukusanger chisambu ni diking ya chikupu mu machuku ma kurutu.