“Ilamany Ayinen mu Ruhat ra Nzamb”
1. Mukand “Ilamany Ayinen mu Ruhat ra Nzamb” ausala nich rutong ik?
1 Tuchingedin nich impu yikash chakwel twileja buku musu “ Gardez-vous dans l’amour de Dieu ” (Ilamany Ayinen mu Ruhat ra Nzamb) mu Français ni mu Swahili ap chisu chikezay kwikalaku mu jindim jetu ku Dilejan dia Bibil dia Chikumangen kusambishin pa rubing ra Kasan 23! Mukand wamufundinau muntu ni muntu umukatina Yehova kudi Chisak Chitakedila wadinga upwil nich mazu manam anch: “Tukwet ruchingej rakin anch mukand winou ukukukwashany chakwel udandamenany kusadil uyakin mu mwom wen chakwel wilamany ayinen ‘mu rukat ra Nzamb . . . ni kushik ku mwom wa chikupu.’—Yuda 21.”
2. Mukand winou usu ukez kutukwash mu mashakamin ik ma mwom?
2 Cha Kusambel Kuchingejin: Ov, mutapu ik ukatau kusadil yijil ya Bibil mu milong mudi urund, kwipuwej, kuyilimish anyikel, mu yaku ya muntu, mu uruw, mu kulond, ni yishankur? Kom ketu akez kukatenchik kukwatijan nich yijil ya piur yitentamina yidia mu Dizu dia Nzamb. (Kus. 19:7, 8) Anch kutesh kwetu mutapu utonginingay Yehova kwiwejin, kuziyil kwetu mu mikadil yetu yawonsu ya mwom kukez kwikal kubachikinau nich maku ma kusot kumusangaresh.—Jinsw. 27:11; 1 Yoh. 5:3.
3. Ov, mulong wak tufanyidin tusala usu wetu wawonsu wa kwakul ku dilejan rubing ni rubing?
3 Kwat Mupak wa Kwakul: Piurijekina, iteka rutong ra kumushiman Nzamb mu chikumangen cha antu end. (Heb. 13:15) Chikumangen chawonsu cha kabuj chikez kwilej mukand winou pamwing. Chikunku cha kwilej chidi chiswimp, chidi mulong wa kuyitwishish antu in awonsu irijeka nawamp, kutwinkish kashinsh ka kulejijan yom yitwilejang. Kwirijek kwetu nawamp, yakul yiswimp yidia zwang kukez kuyibachik antu akwau ku rukat ku midimu yiwamp ni kukez kusangaresh nakash kwilej yom yiney. (Heb. 10:24) Ni tukez kusangar nakash pitwakwila.
4. Ov, mulong wak chidi cha usey anch tulama yijil ya Yehova?
4 Pa uchuku wend wa nsudiel wa mwom wend wa panap pansh mudi muntu, Yesu wateka pamwing kulam yijil ya Yehova ni kwilamin mu rukat ra Nzamb. (Yoh. 15:10) Nich ukwash wa mukand “L’amour de Dieu,” tukez kwitenchik nawamp mu kusadil yijil ya Bibil kupandakanamu pasak mu mwom wetu wa pichuku pichuku ni ‘tukwilamin ayinetu mu rukat ra Nzamb.’—Yuda 21.