Mukand Udiokila ku Chisak Chitakedila

En Umukatinanya Yehova:

Yesu walonda anch: “Ukez kwijikany uyakin, chad uyakin ukez kukukwolany.” (Yohan 8:32) Dikasikesh mud ik dikweta mazu minam! Mwaning, kudi mutapu wa kwijik uyakin ap anch makasu mapandakan kal kuvul mu “machuku ma kwisudiel” minam makweta mar makash kupandakan. (2 Timote 3:1) Ov, uvurikin ni katat dichuku dia kusambish diwitiyija uyakin udia mu Dizu dia Nzamb? Dichuku din diang, Wova musangar uvud nakash. Ov, kimwawiyap?

Ap anch kwikal ni ronganyin ra Dizu dia Nzamb ni kudilejan kudi antu akwau kudi nich usey, kusal yom kwambatan nich malejan tulejeninga ni kwawiy kudi nich usey upandakena nakash. Chakwel tusal mwamu, tuswiridin kwilam ayinetu mu rukat ra Nzamb. Ov, kusal mwamu kwitin ik? Mazu ma Yesu malonday uchuku kurutu kwa rufu rend makwil ku chipul chinech. Ndiy wayileja in kwitiyij end ashinshamena anch: “Anch walamany yijidik yam ukez kashakamany mu rukat ram, mudi chinalama am yijidik ya Tatuku ni kushakam mu rukat rend.”​—Yohan 15:10.

Tukwijikij anch Yesu wilama mu rukat ra Nzamb mulong ndiy waziyila kwi mbil ja Tatukwend. Chilik chimwing kand niyetu etu nlel unou. Chakwel twilama mu rukat ra Nzamb, tuswiridin kusadil uyakin machuku mawonsu mu mwom wetu. Uchuku win wang, Yesu walonda anch: “Katat en wijany yom yiney, chawiy wayukany anch wez wayisalany.”​—Yohan 13:17.

Rusot retu ridi anch buku winou akukwashany kudandamen ni kuziyil ku Dizu dia Nzamb mu mashakamin men chakwel wilamany ayinen mu “rukat ra Nzamb . . . ni kushik ku mwom wa chikupu.”​—Jud 21.