Lejanany mu Mutapu Uswapela
1. Wisu usey umwing wa kulejan mu mutapu uwamp, wovikena?
1 Kuswapal kudi mutapu umwing uwamp nakash wa kulejan nich. Anch twamushinshikin wadingay ni kulejan Yesu, Mulej Mujim, ukutwish watukwash tuwapisha ‘ukaliweny wetu wa kulejan.’—2 Tim. 4:2; Yoh. 13:13.
2. Yom ik tuswirikedina chakwel tulejana mu mutapu uswapela, ni kulejan mu mutapu winou kukweting usu ik?
2 Lond mu Mutapu Uswapela: Mu Malejan ma pa Mukandu mudi uman umwing wa usey nakash ni kwikil muntu ap umwing waulondap kal, ni wawonsu aulejena mu mutapu uswapela. (Mat., shap. wa 5-7) Yisak ya antu yadinga ni kumutesh Yesu “yashimoka [mulong wa] malejan mend.” Amakurump a amasalay atumau kumukwat ashikena ku kulond anch: “Pikil muntu walondap kal mudi chikat kulonday muntu winou.” (Mat. 7:28, 29; Yoh. 7:46) Kituswiridinap kusadil mazu makash makash, marumbangena, ap yilakej yivud yivud chakwel antu akwau itiyija uyakin. Tukutwish twasadil mazu mijikena chakwel turumburil uyakin zwang.
3. Ov, mulong wak antu amwing asotining kuyilej in kuyitesh yom yivud yivud, ni mutapu ik tufanyidina kwiyep chaku chinech?
3 Ilik Uvud wa Malejan: Yesu wadinga ni kuta muchim padiau in kumutesh anch uvud ik wa malejan ufanyidinay kuyilej pa chisu chimwing. (Yoh. 16:12) Tufanyidin twikal in kutal yom ni kuswimpang pa mulong winou, pakampwil pa chisu tuyilejina anamakwetu a ku mujimbu, antu asu asangaredina, ap anikanch. Kitufanyidinap kuyilej yom yivud yivud ap pa chisu chimekenau anch atuteshin nawamp. Antu akweta michim yiwamp akudandamen kwilej ronganyin ra uyakin wa Nzamb, Yehova.—Yoh. 17:3; 1 Kor. 3:6.
4. Ov, mulong wak chidi cha usey kukasikeshin pa milong yijim pa ndond pa kwisambin pa tuyom tuvud tuvud?
4 Kasikeshin pa Milong Yijim: Yesu kadingap ni kurumbangesh yom yadingay ni kulejan ni kulond yom yivud yivud. Palonday anch: “Awonsu adia mwi nzay [ya chivurikish, NW] . . . [akez] kubudik,” kichadingap chisu chendend cha kurumburil yom yivud yivud piur pa yibudikin yaad yiyitadila antu akeza kuvumbuk. (Yoh. 5:28, 29) Chisu tutakedila malejan ma Bibil, tufanyidin kukasikeshin pa milong yijim ni kwipuk chaku cha kusot kwisambin piur pa yom yikwau yakad usey piur pa yom yiwilejinany.
5. Chiyukish ik tukutwisha kutaninamu anch twalejan mu mutapu uswapela?
5 Tujikitishin mudi ik, mulong Yehova walejana mu mutapu uswapela yom yawonsu tuswirikedina kwijik! (Mat. 11:25) El twipanany ayinetu tulejana mu mutapu uswapela chakwel tutaninamu musangar wa kusal mudimu usongina mabuj.