Mitapu Yisatu ya Kutenchik Nkeu Jen ja Kulejan Nich
1. Ov, mulong wak tufanyidina kutenchik nawamp nkeu jetu ja kulejan nich?
1 In kulejan a rusangu ruwamp awonsu ading alej. Ap anch kadi kapamp ka kusambish ka kumanijan ni muntu, kumuchirikin muntu wamekesha musangar, ap kutakel malejan ma Bibil, kudi kulejan tulejeninga. Ni rusangu tufundishininga riding rusangu ra usey nakash. Tuyikwashining antu chakwel ijika usey wa “mikand yitumbila” yikutwisha kuyinkish antu ‘manangu chakwel apanda.’ (2 Tim. 3:15) Chisend chamushena mud ik! Twisambinany katat mitapu yisatu ya kutenchik nkeu jetu ja kulejan nich.
2. Ov, mutapu ik tukutwisha kufundish mu mutapu uswapela?
2 Mu mutapu uswapela: Anch twijik nawamp mutu wa mulong, tukutwish kusal chakwel mutu wa mulong winou wikal uswapela kudi muntu wakad kuwijik. Chawiy lel, chisu utakedila malejan ma Bibil, kangal kuvundangesh malejan mey nich yom yivud yivud yakad usey. Chidi chiwamp kwisambin manans majim madia ma usey. Kufundish nawamp kwitiningap yisu yivud kulond kuvud. (Jinsw. 10:19) Yisu yivud chiding cha usey kutang kusu manans majim madinga mufulandal wa mutu wa mulong twisambidina. Kupwa kwa kutang verse umwing, shinshikin pa chikunku cha verse chambatena nich mutu wa mulong wisambidinany. Mu Malejan ma pa Mukandu, mafundinau mu Mateu shapitre wa 5 djat ni 7, mudi malejan mamwing ma usey ma mu Bibil, pakwez Yesu wamisambina mu mutapu uswapela ni wasadina mazu makemp.
3. Ov, yilakej yikweting usey ik, ni ya mutapu ik yidinga yiwamp nakash?
3 Kusadil Yilakej: Yilakej yilangwishining yitongijok ya in kutesh, yipwitining yovil, ni yikwashining kuvurik yom yasutinakal. Kangal kutong anch chifanyidin kwikal ching mwin kusal madiskur chakwel upana yilakej yiwamp. Yisu yivud Yesu wasadinanga yilakej yikemp, yiswapela kutesh kudi antu ni yakad kukasikan. (Mat. 7:3-5; 18:2-4) Kusadin yipich yifwatwilau pa kadipapel kukutwish kand kukwash nakash. Anch wirijek nawamp, ukutan yilakej yifanyidina kamu kusadil.
4. Ov, mutapu ik tukutwisha kusadil nawamp yipul?
4 Kusadil Yipul: Yipul yimukwashining mwin kwilej chakwel atongijoka. Chawiy, kupwa kwa kwipul chipul, mwinkisha mwin kwilej wey chisu cha ndiy kutongijok. Anch wakul ku chipul swa amwiney, ukwijikap yom yikulamay mwin kwilej wey mu manangu. Anch ndiy wapan chakul chakad kuwanyin, pa ndond pa kumuyul, chikutwish kwikal chiwamp kumukwash ni yipul yikwau chakwel atana chakul chifanyidina kwakul. (Mat. 17:24-27) Chakin kamu, kwikil muntu ap umwing pakach petu udia mulej uwanyidina. Chawiy Bibil chitukasikeshinay etu awonsu kutenchik jinkeu piur pa malejan metu. Anch twasal mwamu, etu awonsu tukez kutan yiyukish ya mwom wa chikupu pamwing ni antu atuteshina.—1 Tim. 4:16.