Tupandakanany Chikangesh cha Kuyilej Amkundj
1. Maswir ik majim madiaku mu mudimu wa kuwanyish yisakin ya Want?
1 Mudi muudandamedina mudimu wa Want mu machuku manam ma kwisudiel, kudi maswir majim ma amakundj awanyishina yitinau muspiritu chakwel atakela. (Marko 4:30-32; Mid. 20:28; 1 Tim. 3:1-13) Chawiy lel, mu jindond jikwau amband avud itiyijin rusangu ra Want ni amakundj akemp kusu. Mu yisak yimwing ya antu, amakundj ashalijadin ni akajau pa milong ya malejan ma relijon piur pa anau. Mutapu ik tukutwisha kuyikasikesh amakundj avud chakwel ajingunyina maswir mau ma muspiritu ni inunga netu mu difukwil diakin?
2. Yibudikin ik yiwamp yadinga nich usu wasalay Paul ni Pita wa kuyilej uman amakundj?
2 Tuyikimbany Amakundj: Anch mutu wa dijuku witiyij uyakin, ukat kuyikwash yid ya dijuku diend chakwel inunga nend mu difukwil diakin. Chilakej, padingay Paul ni Silas mu rukan, amuleja kalam wa rukan uman. Ikundj winou ni a mu chikumbu chend ababatishiwa. (Mid. 16:25-34) Ni palejanay Paul mu Korint, “Krisipus, mukurump wa sinagog, witiya mu Mwant ni chikumbu chend chawonsu.” (Mid. 18:8) Yehova wamusadila Pita chakwel amuleja Konelius uman, mukurump wa amasalay ulejenau anch wadinga “muntu wipanyina, mwin kumwov Nzamb wom.” Konelius, pamwing ni anamakwend ni arund nend ababatishiwa.—Mid. 10:1-48.
3. Anch twamwimburij Filip, “akata kutakel” isu tukutwisha twayilej uman?
3 Kuyilej amakundj “akata kutakel” kukutwish kwikal nich yibudikin yiwamp. (1 Tim. 2:1, 2, MM) Ckilakej, mwangel wa Yehova wamubachika Filip chakwel amuleja “ntung, wa usu ujim” wadinga kalam wa yom ya mwant mband wa in Etiop. Filip wamutesha ikundj winou utangin “mukand wa muprofet Isay” ni wamurumburila rusangu ruwamp ra Yesu. Mwin Etiop winou wikala mwin kwilej ni chimeken anch niyend walejana rusangu ruwamp mwinjil padingay ni kuya mwingand yend. Ni pamwingap kand wamuleja mwant mband ni antu adinga ni kusal kwa mwant mband winou, antu inay adinga pamwingap kakwetap chisu cha kutesh rusangu ruwamp.—Mid. 8:26-39.
4. Mutapu ik tukutwisha kusal chakwel amakundj avud atesha rusangu ruwamp?
4 Tuyilejany Amakundj Avud: Yisu yivud amakundj ading ku midimu muten wa kabuj, ov, ukutwish warijek program wey chakwel ulejanang pa yisu ya urel, Diampos ap Diarubing, ap pa machuku matumbila? Kulejanang chisu ni chisu mu teritwar musadilau mudimu wa kwisak kukez kutwinkish mutapu wa kuyilej uman amakundj akad kushakamang ku yikumbu. Akadivar akutwish kusal usu wa pakampwil chakwel ayileja uman akwau asadilinga nau mudimu. Mu mudimu wa kulejan ku chikumbu ni chikumbu, pakampwil mu teritwar mulejiningau chisu ni chisu, akadivar akutwish ipul anch asotin kwisamb ni ikundj udia ku chikumbu.
5. Mutapu ik ufanyidinay kusal nambaz anch kudi ikundj witiyijina uruu wa Want?
5 Anch nambaz wamutan ikundj witiyijina nawamp uyakin, kafanyidinap kuchirik amwinend kuya kumutal. Ufanyidin kuya pamwing ni nfumwend ap ni mwin kulejan mukwau. Anch muntu usangaredina uyil kurutu, chiding cha manangu anch asambishang kuya kumwendil kudi mukadivar.
6. Mutapu ik tukutwisha kumwimburij kambuy Paul chakwel niyetu “[tumwisakila] Kristu antu avud”?
6 Tondany Mitu ya Milong Yiyisangareshina Amakundj: Kambuy Paul wadinga ni kuyishinshikin antu adinga ni kumutesh ni wasala kukwatijan ni mikadil yau chawiy chatwishay “kumwisakil Kristu antu avud.” (1 Kor. 9:19-23, MM) Chawiy chimwing, tufanyidin tushinshikina anch mitu ik ya milong yikutwisha kuyisangaresh amakundj tukutwisha kutan ni twirijeka kukwatijan nich. Chilakej, amakundj iyakamishining pa milong ya nfalang, pa guvernema muwamp ni pa mutapu wa kushakam zoong ni mu diking mu dijuku. Akutwish kand asanger kusot kutesh piur pa rutong ra mwom, dikez dia divu ni mulong ulikidinay Nzamb mar. Minsamb yetu piur pa uruu wa Want akez kuyitiyij anch twasadil manangu minam mu mutapu wa kwisamb nau.—Jinsw. 16:23.
7. Mutapu ik ukutwishau antu awonsu adia mu chikumangen kwikal nich usu uwamp padi angatan akad kwitiyij ezina ku yikumangan?
7 Tuyikwashany Angatan Akad Kwitiyij: Anch anambaz in Kristu akwet yaku yiwamp chisu chivud yikweting usu uwamp padi anfumwau akad kwitiyij, yid ya chikumangen niyawiy yikutwish yikal nich usu uwamp. (1 Pita 3:1-4) Anch ngatan wakad kwitiyij waya ni mukajend ku chikumangan, kumwak ni chirungil mu chikumangen kukutwish kwikal uman wa usu. Kwez kwend kukutwish kwikal chijingidij chimekeshina kusanger kwend uyakin mu chilik kanang, ni ukutwish witiyij pamwingap kwilej Bibil.
8. Mutapu ik ukutwishau akadivar kuyikwash angatan akad kwitiyij amekeshina ap kusanger kukemp uyakin?
8 Ku mutambu ukwau, angatan amwing akat kusanger pakemp milong ya Bibil kwisambishil pakwez akutwish ez ikal nich impu ya kwisambin piur pa Bibil ni mukadivar ukatinau ayinau. Akadivar amwing a mu chikumangen chimwing asala usu padingau ni kuya kwendin dijuku dimwing diadinga diaurikina pa milong ya relijon mulong wa kwambamb ni ikundj wakad kwitiyij piur pa yom yadinga yijau anch yawiy yikata kumusangaresh. Chom chinech chayishikija ku minsamb ya milong ya muspiritu, ni katat amubabatisha kal. Chilakej chikwau, mukadivar umwing wamukwasha ngatan wakad kwitiyij mwin masip kutung rupangu ku chikumbu chend. Mu kumumekeshin kumubangin mu mutapu winou, asambisha kwilej Bibil. (Gal. 6:10; Filip. 2:4) Anch udi mukadivar mwin Kristu, mulong wak ulikina kuya kudi umwing ap avud a angatan inay akad kwitiyij?
9. Kuyifumb amakundj in Kristu kukwet chibudikin ik?
9 Yifumbany Mulong wa Yisend Yidia Kurutu: Amakundj itiyijina uruu wa Want ni awanyishina yitinau chakwel ikala nich yisend mu mudimu wa Yehova akutwish ayichindin mu “yom ya matangal kudi antu,” charumburik anch amkurump in Kristu akata kusadil ukaliweny wau ni usu wau mulong wa chikumangen cha antu a Yehova. (Efes 4:8; Kus. 68:18) Amakundj inay ayilamin yikumangen chakwikatin ni nich mushiku. (1 Pita 5:2, 3) Akat kwikal chiyukish mudi ik ku chisak cha akadivar awonsu!
10. Usu waslay Ananias wa kumukwash Paul, uyikwashin nchik antu avud nlel?
10 Chilakej, Saul wikala “mupostol wa in mangand,” ap anch wading pasak mwin kuyimesh mar in Kristu. (Rome 11:13) Chawiy chelay kulikin mwin kwilej Ananias kuya kumulej Saul. Pakwez, Ananias walondula umutakel wa Nsalejetu ni walonda ni ikundj winou weza kwikal kambuy Paul. Pakusut kwa mivu, mudimu wa Paul wayikwasha tunan amutesha ni mamiliyon adandamedin kutaninamu ukwash mu mikand yapepilau yafunday yidia mu Dizu dia Nzamb.—Mid. 9:3-19; 2 Tim. 3:16, 17.
11. ov, mulong wak tufanyidina kusal usu wetu wawonsu chakwel tuyileja amakundj?
11 Chawiy lel, tusalany yawonsu yitukutwisha mulong wa kuwanyish yitinau chakwel tupandakan chikangesh cha kuyilej amkundj. Mudi mutulondwila rutong riner, tukwet kashinsh anch Yehova ukuyukish usu wetu mulong wa kusal rusot rend ni kulam nawamp yisakin ya Want.