Chitwishikin Kwikal ni Chisambu mu Dijuku Diaurikina mu Ritiy

“Wij nchik anch ukez kumupandish [mbay] ney?”—1 KOR. 7:16.

OV, UKUTWISH KUTAN YAKUL?

․․․․․

Ov, chom ik chikutwishau in kwitiyij kusal mulong wa kukudish chisambu mu dijuku diaurikina mu ritiy?

․․․․․

Ov, mutapu ik ukutwishay mwin Kristu kuyikwash yidi yakad kwitiy yidia mu dijuku chakwel yitiya difukwil diakin?

․․․․․

Ov, chom ik chikutwishau antu akwau kusal chakwel ayikwasha ambay nau akaritiy ashakama nawamp mu dijuku diaurikina mu ritiy?

1. Ov, kwitiyij uruu wa Want kukwet chibudikin ik mu dijuku?

PAYITUMAY Yesu atwimbuy end, ndiy wayileja anch: “Yangany, ukarumburilany dizu dia Nzamb anch: ‘Want wa mwiur udi piswimp!’” (Mat. 10:1, 7) Rusangu riner ruwamp rikez kulet chisambu ni musangar kudi antu akuritiya nich kusanger kwakin. Pakwez, Yesu wayibabesha atwimbuy end anch antu avud akez kuyipompat mulong wa mudimu wau wa kulejan Want. (Mat. 10:16-23) Mar mamwing pakampwil ma rupompat makat kushiken anch kudi yid ya dijuku yakad kwitiyij uruu wa Want.—Tang Mateu 10:34-36.

2. Ov, mulong wak in Kristu adia mu dijuku diaurikina mu ritiy akutwish niyawiy kwikal nich chisambu?

² Ov, chinech chirumburikin anch ambay in Kristu adia mu dijuku diaurikina mu ritiy kakutwishap kwikal ni musangar? Bwat kwau! Ap anch rupompat ra dijuku rikutwish kwikal pamwing ap rikash, chisu chikwau rikutwishap kwikal mwamu. Chawiy lel, rupompat ra dijuku rikatap kudandamen yisu yikwau. Yiney yimedin pa yom yisadilau akaritiy pantaliken ni rupompat ap kuburen kwitiyij. Chikwau kand, Yehova uyiyukishin antu ashinshamena kudiay ndiy, ukat kuyisangaresh chikalap nchik mikadil yiyimp. Akaritiy akutwish kwikal nich musangar anch (1) asadil usu wa kukudish chisambu mu chikumbu ni (2) kusutil ku kusal usu wau nich muchim umwing mulong wa kuyikwash yid ya dijuku yakad kwitiyij chakwel yitiyija difukwil diakin.

KUDISH CHISAMBU MU DIJUKU

3. Ov, mulong wak mwin Kristu udia mu dijuku diaurikina mu ritiy ufanyidin kukudish chisambu?

³ Chakwel mbut ja kutentam jikala nich yibudikin yiwamp mu dijuku, chidi cha usey kwikal nich chisambu mu dijuku. (Tang Jakobu 3:18.) Ap anch dijuku dia in Kristu didiap mu umwing mu difukwil diakin, afanyidin kusal usu nakash wa kukudish chisambu mu chikumbu. Ov, mutapu ik chikutwisha kusadik?

4. Ov, mutapu ik ukutwishau in Kristu kulam chisambu mu michim yau?

⁴ In Kristu afanyidin kulam chisambu chidia mu michim yau. Chinech chitin malembil ma kashinsh, makutwisha kutwinkish “chisambu cha Nzamb” chakad kwilikej nich chom ap chimwing (Fil. 4:6, 7) Musangar ni chisambu yidiokil ku kutambul ronganyin ra Yehova ni kusadil yany ya Bibil mu mwom. (Isay 54:13) Kwipan mu yikumangan ya chikumangen ni mu mujikit wa mushiku mudimu wa chingand kudi ni kwawiy kwa usey anch tusotil kwikal nich chisambu ni musangar. In Kristu adia mu dijuku diaurikina mu ritiy akutwish yisu yimwing kwipan mu mijikit ya win Kristu. Chilakej, tal yamushikena Enza,a wadinga ni nfumwend wading umupompatina nakash. Ndiy wading ukat kwipan mu mudimu wa kwikadish in kwilej kupwa kwa kusal midimu yend ya ku chikumbu. Enza ulejen anch, “Yehova wanyukishin nakash nich yibudikin yiwamp yisu yawonsu nading nisadina usu wa kulejan rusangu ruwamp kudi antu akwau.” Yiyukish yiney yaleta chakin kamu chisambu, kwov kuwap ni musangar.

5. Ov, yikokujol ik yikata kuyishiken akaritiy adia mu dijuku diaurikina mu ritiy, ni ukwash ik udiaku?

⁵ Tufanyidin kusal usu nakash chakwel tukudisha urund wa chisambu ni yid yakad kwitiyij yidia mu dijuku. Chinech chikutwish kukasikan mulong yikutwishau kusot anch tusala yikutwish pamwing ap kupwitijan nich yany ya Bibil. Kulam kwetu daang yany yitentamina kukutwish kuyovish kuyip yid yimwing yakad kwitiyij yidia mu dijuku, pakwez kusal mwamu kukez kulet chisambu. Chakin kamu, kulik kwitiy anch chom kanang chikatap kujiril yany ya Bibil kukutwish kulet milong chamwamu. (Tang Jinswir 16:7.) Piturishina nich yikokujol, chidi cha usey kukimb yany ya Bibil mu mikand ya chisak cha kashalapol ushishamena ni kubabal ni kudi amakurump.—Jinsw. 11:14.

6, 7. (a) Ov, mulong wak yid yimwing ya dijuku yadinga yilikin pakusambish kwilej ni Atuman a Yehova? (b) Mutapu ik ufanyidinay mwin kwilej Bibil ap mukaritiy kusal anch kudi rupompat mu dijuku?

⁶ Kukudish chisambu mu dijuku kukez kulet ruchingej mudiay Yehova ni ronganyin kudi yid yakad kwitiyij yidia mu dijuku. (Jinsw. 16:20) Ap in kwilej a Bibil asu akutwish kumekesh manangu pa mulong winou. Amakundj amwing ap amband akad kwitiyij akutwish kulik anch ambay nau a uruw kafanyidinap kwilej Bibil. Akutwish pamwing ap kwitiyij anch chinech chikutwish kwikal chom chiwamp mulong wa dijuku. Pakwez, antu akwau akutwish kwov kuyip. Ester, udia lel unou Kaman, ulejen anch ndiy “wova ujim” pasambishay nfumwend kwilej Bibil nau Atuman a Yehova. Ulejen kand anch: “Nadjibula mikand yend ap kuyosh.” Howard, wadinga ulikina dilejan dia Bibil pa kusambish ulejen anch: “Amakundj avud akat kwakam anch akajau akat kwandam pamwing ap mu ka chisak kamwing ka relijon. Ikundj ukutwish kuburen kwijik chifanyidinay kusal mulong wa yimenau anch yidi ubaj ap yikutwisha kwikal ukankuny.”

⁷ Mwin kwilej ukweta mbay wa uruw umupompatina ufanyidin kutambul ukwash chakwel kangal alika kudandamen nich dilejan diend dia Bibil. Yisu yivud ukutwish kupwish milong anch udi mwin kwitudish ni umulimishin mbay nend wa uruw wakad kwitiyij. (1 Pita 3:15) Howard ulejen anch “Nijikitishin mulong mukajam washakam zong ni kasalap chom chiyimp!” Mukajend urumburil anch: “Howard wanleja anch nifanyidin kulik kwilej Bibil. Walonda anch ading akat kwingowish wong. Pa ndond pa kumutendish, namuleja anch chela kwikal pamwing ap chakin, pakwez namuleja kand anch kinatwishap kuman chakin kamu mutapu ik chela kwikal mwamu. Chawiy lel namwita chakwel atanga buku nadinga ni kwilej. Patangay, ndiy wamana anch yading yilondinay yadingap yiwamp. Chinech chamwovisha ushon nakash.” Chiwapidil kuvurik anch ambay a uruw akad kwitiyij akutwish kwiyov anch ayilikin ap adi mu ubaj pakatau ambay nau aruw kwipan mu mijikit ya win Kristu, pakwez kumumekeshin rukat rakin kukutwish kudiosh yovil yiney.

YIKWASHA CHAKWEL ITIYIJA DIFUKWIL DIAKIN

8. Ov, chiyul ik chapanay kambuy Paul kudi in Kristu akweta ambay a uruw akad kwikal akaritiy?

⁸ Kambuy Paul wayileja in Kristu anch kafanyidinap kumulik mbay nend wa uruw mulong kadiap mukaritiy.b (Tang 1 Korint 7:12-16.) Kulam mu manangu chitongijok cha kwel anch mbay wa uruw wakad kwikal mukaritiy ukutwish kwikal mwin Kristu kukutwish kumukwash mukaritiy alama musangar wend ap anch udi mu dijuku diaurikina mu ritiy. Pakwez, mu kupakish kupan uruu wa uyakin kudi mbay wakad kwikal mukaritiy, chifanyidin kubabal, mudi kamu mumekeshina rusangu twisambidina.

9. Piwisambidina uyakin wa Bibil ni yid ya dijuku yakad kwikal akaritiy, ov chom ik ufanyidina kubabel?

⁹ Patonginay piur pa chom chasalay padingay ni kwilej uyakin wa Bibil, Jason ulejan anch, “Nasota kuyilejamu antu awonsu!” Anch mwin kwilej Bibil wasambish kusanger uyakin wa yom yilejinay mu Bibil, ukutwish kusangar nakash ni kusambish kulejan yisu yawonsu uyakin winou. Ukutwish kuchingejin anch yid yakad kwikal akaritiy yidia mu dijuku yitiyija kapamp kamwing uruu wa Want, pakwez akutwish kwau kulik kwitiyij uruu uwamp. Ov, mutapu ik chirungul chadingay nich Jason pakusambish chikala nich usu pa mukajend? Mukajend uvurikin anch: “Chikala nich usu ukash nakash padi am.” Mband umwing witiyija uyakin pasuta mivu 18 kupwa kwa nfumwend ulejen anch “Nading nich kuswir kwa kwilej yom pakemp-pakemp.” Anch ukat kwilej Bibil ni mwin kwilej ukweta mbay nend wa uruw ulikina kwikal ku mutambu wa difukwil diakin, sal usu wa kumukwash mwin kwilej winou piur pa mutapu ukutwishay kwambamb ni mbay nend pakad kumwovish kuyip. Moses walonda anch: “Chifanyidin malejan mam manaka mudi ruvul, mazu mam madja mudi maum, mudi ruvul unakina pakemp-pakemp pa masuku matalel.” (Kuv. 32:2) Malejan makemp-makemp ma uyakin makutwish kwikal mawamp nakash kupandakanamu yibudikin ya mem mavud ma muspiritu.

10-12. (a) Ov, chiyul ik chapanay kambuy Pita kudi in Kristu akweta ambay nau akad kwikal akaritiy? (b) Mutapu ik mwin kwilej umwing wa Bibil wileja mutapu wa kusadil chiyul chidia mu 1 Pita 3:1, 2?

¹⁰ Kambuy Pita wapana chiyul kudi amband in Kristu adia mu dijuku diaurikina mu ritiy. Ndiy wafunda anch: “Yiziyilany anfumwen, ap anch amwing a pakach pau kitiyinap nchik dizu dia Nzamb, ukutwishany kuyipwitany ku ritiy pakumanau yisalijok yen yiwamp. En kiukwikalanyap nich kuswir kwa kulond dizu, mulong awiy akez kuman yaku yen ya zwang ni kalimish ken.” (1 Pita 3:1, 2) Mband ukutwish kumupwitin nfumwend ku ritiy ni kwitiyij difukwil diakin anch ukat kuziyil ni umulimishin nakash, ap anch ukat kumuzengol. Chilik chimwing, ikundj mukaritiy ufanyidin kwikal ni chaku chiwamp ni kwikal mutu wa dijuku wa rukat chikalap nchik rupompat rikutwisha kudiokal kudi mukajend wakad kwikal mukaritiy.—1 Pita 3:7-9.

¹¹ Yilakej yivud ya katat yilejen usey wa kusadil chiyul cha Pita. Shinshikin yamushikena Selma. Pasambishay kwilej Bibil nau Atuman a Yehova, nfumwend, Steve, kasangarap. Ndiy ulejen anch, “Najimana, nikala ni mukau, namana anch nifanyidin kwikal nend, ni udi wakad diking.” Selma ulejen anch: “Ap kurutu nitana uyakin, kushakam ni Steve kwading mudi kwendil pa may. Ndiy wading muntu wa ujim. Pinasambisha kwilej Bibil, mwikadil winou wadandamena.” Ov, chom ik chakwasha?

¹² Selma wavurika dilejan dimwing dilejay kudi Atuman ading ilejina nend. Selma ulondin anch: “Dichuku dimwing kinasotap kwilej Bibil. Mulong uchuku wasuta, Steve wambula panadinga kusot kumekesh chitongijok kanang, ni nova amwinam kuyip ni ushon. Kupwa namuleja nambaz yom yashikena ni mutapu niyova, ndiy wanleja chakwel nitanga 1 Korint 13:4-7. Pinatanga, nasambisha kutong mwamu, ‘Steve kandikal ansadilap yom yiney yiwamp.’ Pakwez nambaz wanginkisha chitongijok chikwau kusutil ku kwipul anch, ‘Ov, mutapu ik umekeshina yisal yiney ya rukat kudi nfumwey?’ Namwakula anch, ‘Kwikil, mulong chikasiken kushakam nend.’ Nambaz walond nich dizu dia pansh anch, ‘Salema nany upakishin kwikal mwin Kristu pinap? Ey ap Steve? Pinamana anch nifanyidin kuswimp yitongijok yam, Nalembila kudi Yehova chakwel ankwasha nimukata Steve nakash. Pakemp-pakemp, yom yasambisha kukarumuk.” Kupwa kwa mivu 17, Steve witiya uyakin.

MUTAPU UKUTWISHAU ANTU AKWAU KUPAN UKWASH

13, 14. Ov, mutapu ik ukutwishau antu akwau adia mu chikumangen kuyikwash antu adia mu dijuku diaurikina mu ritiy?

¹³ Mudi mem ma ruval makata kuwil pa divu ni kusal anch mitond yipama, antu avud adia mu chikumangen akat kulet musangar wa in Kristu mu dijuku diaurikina mu ritiy. Elvina udinga mu Brézil ulejen anch: “Rukat pantaliken ni akadivar ni anambaz am rankwasha kushakam daang mu uyakin.”

¹⁴ Kwanaken ni kusanger kwa antu akwau adia mu chikumangen kukutwish kukarumun muchim wa muntu wakad kwitiyij udia mu dijuku. Ikundj umwing udia mu Nigéria witiya uyakin pasutin kal mivu 13 kupwa kwa mukajend kwikal mukaritiy walonda anch: “Pinadinga mu weny nich Kaman umwing, motak wend wafa. Kupwa wakimba ambay nend Atuman adinga mu ul wadinga piswimp, ni awiy atwinkisha jindond ja kulal uchuku. Atulama nawamp mudi twading twijikijadina nau kudiosh ku wanikanch. Chakin kamu, nova rukat ra in Kristu rading risambidinay mukajam chisu chawonsu.” Mu Angleterre, mband umwing witiyija uyakin pasutin kal mivu 18 kupwa kwa nfumwend ulejen anch: “Atuman ading akat kututazuk etwawonsu aad chakwel tudia nau. Ading chisu chawonsu ni kwingak nawamp.”c Ikundj umwing udia mwin ngand yiney yimwing wikala ni ndiy Kaman ulejen anch: “Akadivar ni anambaz ading akat kutwendil, ap kututazuk kwol kwau, ni namana anch ading akat kutubangin. Chinech chamekana kand patok pinadinga mu rupital ni antu avud eza kwintal.” Ov, ukutwish kutan mitapu ya kumekesh kusanger kwinoku pantaliken ni yid ya dijuku yakad kwitiyij?

15, 16. Ov, chom ik chikutwisha kumukwash muntu witiyijina chakwel alama ruchingej anch antu akwau adia mu dijuku adandamedin kulik kwitiyij?

¹⁵ Chakin kamu, kadiap ambay a uruw, an, anvaj ap anamaku awonsu akata kwitiyij difukwil diakin, ap anch mukaritiy wamekesh chaku chishinshamena ni wapan uman nich nkeu mu mivu yivud. Amwing akat kudandamen kulik ap kudandamen kwikal in rupompat. (Mat. 10:35-37) Pakwez, anch mwin Kristu wamekesh yaku yiwamp, chinech chikutwish kwikal ni yibudikin yiwamp nakash. Ikundj wadinga pasak wakad kwitiyij ulejan anch: “Anch mbay wa uruw udia mukaritiy wasambish kumekesh mikadil yend ya rukat, ukutwishap kwijik chikatay kutek mu muchim wa mbay nend wakad kwitiyij. Chawiy lel kangal walik kumekesh mikadil ya rukat kudi mbay ney wakad kwitiyij.”

¹⁶ Ap anch chid chimwing cha dijuku chashal pakad kwitiyij, mukaritiy ukutwish kwikal nich musangar. Ap anch nfumwend kitiyijap uruu wa Want kupwa kwa usu wasalay mu mivu 21, nambaz umwing ulejen anch: “Nitwishin kulam musangar wam kusutil ku kusal usu wa kumusangaresh Yehova, mu kulam kushishaman kwam kudi ndiy, ni mu kusal usu wa kukasikesh mwikadil wam wa muspiritu. Pinasambisha kwipan mu mijikit ya muspiritu—mu dilejan dia muntu ipend, mu kulejan mu chingand, ni kuyikwash antu akwau adia mu chikumangen—kwansejisha piswimp ni Yehova ni kwalama muchim wam.”—Jinsw. 4:23.

KANGAL WALIK!

17, 18. Ov, mutapu ik ukutwishay mwin Kristu kwikal nich ruchingej ap anch dijuku diaurikina mu ritiy?

¹⁷ Ap anch udi mwin Kristu udia mu dijuku diaurikina mu ritiy, kangal walikap. Vurik anch: “Yehova kakez kuyishap antwend mulong wa dijin diend.” (1 Sam. 12:22) Ndiy udi pamwing ney piudandamedina kwinung kudi ndiy. (Tang 2 Jinsangu 15:2.) Chawiy lel “Sangar kand mudi [Yehova].” Chikwau kand, “pana njil yey kudi [Yehova], ukungamena mwi Ndiy.” (Kus. 37:4, 5, TMK) ‘Kulembil yisu yawonsu,’ ni kwikal ni ritiy mudiay Tatukwetu wa mwiur kukutwish kutukwash chakwel tujijamana mu mar ma mitapu yawonsu.—Rom 12:12.

¹⁸ Mwita Yehova spiritu wend utumbila chakwel akukwasha kulet chisambu mu dijuku. (Heb. 12:14) Mwaning, chitwishikin kukasikesh mikadil ya chisambu yikutwisha kukwat ku muchim wa yid yakad kwitiyij yidia mu dijuku. Ukez kuman musangar ni chisambu mu muchim anch wasalany “yawonsu mulong wa kulet uyaj kudi Nzamb.” (1 Kor. 10:31) Mu mijikit yiney, chidi chom chikasikena mud ik pa kwijik anch ukwet ukwash wa rukat wa akadivar ni anambaz ney mu chikumangen cha win Kristu!

[Mazu madia kwishin kwa paj]

[Chipich chidia pa paj wa 30]

Tond chisu chiwamp cha kurumburil yitiyij yey

[Chipich chidia pa paj wa 31]

Yibanginany ambay a uruw akad kwitiyij