Yipul Ya In Kutang

Yom ik yakimbay kulond Yesu palonday anch: “Kangal watongany anch, am neza ni kulet chisambu”?

Yesu walejana uruu wa chisambu. Pakwez, chisu chimwing wayileja atwimbuy end anch: “Kangal watongany anch, am neza ni kulet chisambu mu mangand. Bwat, am kinezap ni kulet chisambu, pakwez mpak ya musamun. Am neza ni kuyisarumun an amakundj chakwel ayipompat atatukwau, ni an amband ayipompat amakwau, ni amband a an amakundj ayipompat amakwau a anfumwau.” (Mat. 10:34, 35) Yom ik yakimbay kulond Yesu?

Yesu kadingap kakatina kwauril antu a dijuku dimwing, pakwez wading wij anch mafundish mend mafanyina kulet kwaurok mu majuku. Chawiy, antu awonsu akatina kwikal in kwilej a Kristu ni kutambul dibatish afanyidin kwijik yibudikin ya mupak wau. Anch arish ni rupompat ridiokila kud mbay wa uruw wakad kwitiyij, ap antu a mu dijuku, chikutwish kuyikasiken kushal ashinshamena ku mafundish ma Kristu.

Bibil uyikasikeshin in Kristu “kushakam [mu] chisambu nau antu awonsu.” (Rom 12:18) Pakwez mafundish ma Yesu makutwish kwikal mud “mpak ya musamun” mu majuku mamwing. Chikutwish kwikal mwamu anch muntu umwing wa mu dijuku witiy mafundish ma Yesu pakwez akwau awiy amalikin. Mu chishiken mud chinech, antu a mu dijuku akat kwikal “akankuny” a muntu wileja kal uyakin.​—Mat. 10:36.

In kwilej a Kristu adia mu majuku makweta antu adia mu marelijon kushalijan akat kurishang yisu yimwing nich yom yikata kupak rukat rau mudiay Yehova ni Yesu. Chilakej, antu a mu dijuku akad kwitiyij akutwish kuyishindin kusal misambu ya chirelijon ya machuku matumbila. Anch ayipak mutapu winou, chikat kuyikasiken kuman nany ukusangareshau? Yesu walonda anch: “Muntu mwawonsu ukumukata tatukwend ap makwend nakash kwimpandakanamu am, kawanyidinap kwikal mwin kwilej wam.” (Mat. 10:37) Chakin kamu, Yesu kadingap kalondina anch chakwel muntu awanyin kwikal mwin kwilej wend, chimufanyidin kuyikat pakemp anvajend. Pakwez, wading uyifundishin mutapu wa kwijik yom yadinga ya usey nakash mu mwom wau. Anch antu a mu dijuku akad kwikal Atuman arishikish usu tusadina wa kumwifukwil Yehova, tudandamedining kuyikat, pakwez twijing anch rukat retu mulong wa Yehova rawiy riding pa ndond ya kusambish.

Pakad kwidjidjek, rupompat ra mu dijuku risansening nakash. Chikalap nchik mwamu, in kwilej a Yesu alamining mu mamangu mazu mend malondina anch: “Muntu mwawonsu wakad kusend mutond wend [wa mar] ni kwinlondul am, kawanyidinap kwikal mwin kwilej wam.” (Mat. 10:38) Mu kulond kukwau, in Kristu amening rupompat ra mu dijuku mud yom yidia pakach pa mar mafanyidinay mwin kwilej wa Kristu kwitiyin. Chisu chawiy chimwing, alamining ruchingej anch mwikadil wau uwamp akutwish kuyibachik anamakwau akad kwitiyij kulik kuyipompat ni kwilej Bibil dichuku dimwing.​—1 Pita 3:1, 2.