Ov, Ukutwish Wasanger Mbay Wakad Mwin Kwitiyij?

1. Ov, mulong wak in Kristu aurikina mu ritiy ku chikumbu kadiap ayinau ayisangaredina kuyikwash ambay nau akad in kwitiyij chakwel itiyij uyakin?

¹ Ov, mu chikumangen chen mudi in kulejan amwing akweta anfumwau ap akajau akad in kwitiyij? Anch chidi mwamu, pakad ntad, in kulejan inay aswiridin anch ambay nau inunga nau mu difukwil diakin. Pakwez, kadiap ayinau asotininga anch ambay nau itiyija uyakin. Mudi Nzamb, chikumangen chakabuj chisotin anch “antu awonsu apanda ni kwijik uyakin.” (1 Tim. 2:4) Ov, mutapu ik tukutwisha kusanger arund akad in kwitiyij a ambay in kulejan a mu chikumangen chetu?

2. Ov, mutapu ik ukeza kutukwash manangu kukasikesh mbay netu wakad mwin kwitiyij?

² Chakusambish, tufanyidin kwiyijidish ni mutapu wa kuman wa antu akad in kwitiyij. Ambay avud akad in kwitiyij akatining majuku mau ni iyijidishining kwikal ambay ni anvaj awamp. Pamwingap yitiyij ya relijon wau yishalijadin nich yetwetu. Akutwish kwijik yom yikemp piur pa Atuman a Yehova kudioshaku yom yakadiau kwijik ap yitongijok yikatau kuyilej kudi arund ayimp. Antu amwing amanening chisu cha kusadil ambay nau mu difukwil anch yisu yimwing akat kuyisutish ni majuku mau. Manangu makez kutukwash kumuman muntu wakad mwin kwitiyij nich ranaken ni kalimish pamwing ni kwipuk kwikal mwin ujim pa yisu tushicha nend.​—Jinsw. 16:20-23.

3. Ov, mutapu ik upandakena kuwap ukutwishau kumupwit mbay wakad mwin kwitiyij?

³ Kumusanger Kwa Pakampwil: Mutapu upandakena kuwap wa kumupwit mbay wakad mwin kwitiyij uyakin, chakusambish, ukutwish kwikal kusutil ku yisal yetu, pakad kusutil ku minsamb ya mu Bibil. (1 Pita 3:1, 2) Chom cha usey pa mulong winou chidi kumekesh mutapu wa kumusanger kwa pakampwil. Mu chikumangen, anambaz akutwish kumubangin mband wakad mwin kwitiyij, ni akadivar akutwish kusal mutapu umwing ni ikundj wakad mwin kwitiyij. Ov, mu mutapu ik?

4. Ov, mutapu ik tukutwisha kumekesh kusanger kwa pakampwil?

⁴ Anch ukwetap mutapu wa kutanijan ni mbay winou, pamwingap ukutwish kusal mwamu kupwa kwa kumanijan ni mbay mwin Kristu. Chifanyidin kwijik anch mbay wakad mwin kwitiyij kakwitiyijap kapamp kamwing, ap kumekesh anch witiyij kal kusutil ku musangar utumusangaredina. Urund wetu uwamp ni kumusanger kwa pakampwil kukutwish kumubachik chakwel ayimana Atuman a Yehova mu mutapu uwamp ni ufanyidina. (Rom 12:20) In Kristu amwing aswila kal akutwish kumutazuk mbay wakad mwin kwitiyij ni dijuku diend chakwel adia nend pamwing, nich rutong ra kumwijik nawamp pamwing ni kumudiosh yitongijok yivud yiyimp yidinga mu muchim wend. Akutwish kwisambin piur pa kumusanger kwend, akez kukasikeshin minsamb pa mitu ya milong ya muspiritu. Kupwa, chisu chikwiyovay mbay wakad mwin kwitiyij anch minsamb yiney yipandaken usey, akutwish kwisambin pa Mifund anch chitwishikin. Ap anch ukutwish kwitiyij diladikij dia kuya kukumangan ku chimwing cha yikumangan yetu chakwel aman mutapu wilejiningay mukajend, pakampwil kudiosh kwijikidinay kal antu amwing mu chikumangen. Ap anch kadiap tayad ni kwisambin piur pa uyakin, ndiy ukutwish kamu kwisambin piur pa ukwash uyinkishiningau ambay nend in kwitiyij.

5. Ov, mutapu ik ukutwishau amakurump kumusanger mbay wakad mwin kwitiyij?

⁵ Pakampwil, amakurump afanyidin kuyisanger ambay akad in kwitiyij ni kwikal tayad ni kupan uman. Mbay wakad mwin kwitiyij wakad kwitiyij minsamb ya mu Bibil ukutwish kutesh Mifund yikasikeshina chisu chidiay mu rupital ap pa chisu chikwetay yikokujol yikash ya ukash wend wa mujimbu. Anch mwin chikumbu waurikina ni mbay nend mu ritiy ukwet yikokujol, mudi rufu ra chid cha mu dijuku, pamwingap amakurump akutwish kumutazuk mbay wakad mwin kwitiyij ashakama nend pa chisu chikasikeshinau dijuku diend.

6. Ov, yiyingish ik tukweta ya kuyisanger ambay akad in kwitiyij?

⁶ Tongany bil musangar ukez kumekan kudi mwin Kristu mu chikumangen chetu anch mbay nend witiyij ni wez wandam mu uyakin! Musangar mudi winou ukutwish kand kulet musangar ujim kudiay Yehova, angel, ni antu akwau adia mu chikumangen. (Luka 15:7, 10) Pakwez, anch mbay wakad mwin kwitiyij kasangerap kapamp ka kusambish, tukutwish kand kusangar chakwel mausu metu madandamena kumusangaresh Yehova, ndiy “kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.”​—2 Pita 3:9.

[Dizu dirumburila chipich chidia pa paj wa 6]

Mutapu upandakena kuwap wa kumupwit mbay wakad mwin kwitiyij uyakin, chakusambish, ukutwish kwikal kusutil ku yisal yetu, pakad kusutil ku minsamb ya mu Bibil