Ov, Nidi Chifuvu mu Mudimu wa Kulejan?

1. Mulong wak tufanyidinap kwiyov akad kuwanyin chakwel tuwanyish mudimu wetu wa kulejan?

¹ Anch ukat kwiyipul amwiney chipul mudi chinech, pikil kwov wom! Kichadiap ronganyin ra shikol ap ukaliweny yikutwisha kutushikij ku kwikal awanyidina chakwel tulejan. In kwilej amwing a pasak adinga mudi “antu awonsu.” Pakwez, adinga in kulejan a rusangu ruwamp mulong adinga mu uumwing chakwel alondula chilakej cha Yesu.—Mid. 4:13; 1 Pita 2:21.

2. Mitapu ik yimwing ya kufundish yasadinangay Yesu?

² Mutapu Wafundishangay Yesu: Mutapu wend wa kufundish wadinga upipela, wapukunanga ku muchim, ni uswapela kutesh. Yipul yend, yilakej yend, ni nsambishil ya mutapu wend wa kulond yapwitanga matu ma in kumutesh. (Mat. 6:26) Ndiy wamekesha musangar wakin kudi antu. (Mat. 14:14) Pakwez, Yesu walondanga nich kashinsh ni dizu dia muntu ukweta mbil ya kulond, ni wadinga wij anch Yehova ndiy wamwinkisha mudimu wend ni wamubangilanga mu chisend chend.—Luka 4:18.

3. Mutapu ik ukatay Yehova kutukwash chakwel tuwanyish mudimu wetu wa kulejan?

³ Yehova Utukwashin: Kusutil ku dizu diend ni ku dirijek diend, mulej wetu mujim utukwashining nich malejan mitudia nich kuswir chakwel tulejan nawamp rusangu ruwamp. (Isay 54:13) Mulong Yehova ututekidin mu Bibil mutapu wa kulejan wa Yesu, chawiy tufanyidin kushinshikin ni kwimburij mitapu yend yiney yalejanangay nich. Yehova utwinkishining spiritu wend utumbila ni utufumbining kusutil ku yikumangan ya chikumangen. (Yoh. 14:26) Chikwau, warijekin kand chakwel in kulejan aswila kal atukwasha ni yetu twikala ayifuvu.

4. Mulong wak tufanyidin kwiyov awanyidina chakwel tulejana rusangu ruwamp nau akwetu?

⁴ Tukwet yiyingish yivud ya kwikal ayifuvu chakwel tulejan, mulong “kuwanyin kwetu kukat kudiok kudi Nzamb.” (2 Kor. 3:5) Anch twamukungamen Yehova ni twasal mudimu nawamp ni yitenchik yitutenchikidiningay, tukez kwikal awanyidina “mu kusal mudimu wawonsu uwamp.”—2 Tim. 3:17.