‘Kangal Wov Wom’
1. Ov, yipwichik ik ya mutapu umwing yamanay Jeremiy tukutwisha kurish nich?
1 Jeremiy wadinga nich yitongijok yakad kuwanyin pa chisu chamwinkishau chisend cha uprofet. Pakwez, Yehova wamuleja nich kashinsh anch: ‘kangal wov wom,’ ni wamukasikesha ni rukat chakwel awanyish chisend chend. (Jer. 1:6-10) Mu machuku metu, wom ap kuburen ruchingej yikutwish kulet usu uyimp mu mudimu wetu wa kulejan. Kuyov antu wom kukutubachik ap kutusadish chakwel tuchirik kwinyim pa yisu yimwing. Ov, mutapu ik tukutwisha kurish nich wom mudi winou, ni yiyukish ik ya pakampwil tukeza kutaninamu?
2. Mutapu ik ukeza kwirijek kutukwash kukepish wom wetu mu mudimu wa kulejan?
2 Kwirijek Kurutu Kwa Chisu: Kwirijek kuwanyidina kukutwish kutukwash kukepish wom wetu. Chilakej, anch twachirikin kurutu kwa chisu yom yakangeshina minsamb, tukez kwirijek nawamp ku mutapu wa kwakul ku yipul yatwipwilau. (Jinsw. 15:28) Ov, mulong wak tukutwishap kusal mwamu pa chisu cha Difukwil dia mu Dijuku chakwel twirijek piur pa yikangesh yishalijadina ya ku shikol ni ya mudimu wa kulejan?—1 Pita 3:15.
3. Ov, mutapu ik kumuchingejin Yehova kukutukwasha kupandakan wom?
3 Kumuchingejin Yehova: Mutapu uwamp wa kupwish wom udi kumuchingejin Nzamb wetu. Yehova utulejin nich kashinsh anch ukez kutukwash. (Isay 41:10-13) Diking dipandikena mudi ik tukutwisha kwikal nich! Chikwau, Yesu utulejin nich kashinsh anch ap pa chisu chakad kuchingejin, spiritu utumbila wa Nzamb ukez kutukwash chakwel tulejan uman mu mutapu uwamp. (Mar. 13:11) Chawiy lel, tumwitany Yehova chisu chawonsu spiritu wend utumbila.—Luka 11:13.
4. Ov, yiyukish ik yibudikininga mu kudandamen mudimu wa kulejan chikalap nchik yikangesh?
4 Yiyukish: Mudi mutudandamedina mu mudidmu wa kulejan chikalap nchik yikangesh, atukasikeshin kurish nich yoziu yipandakena mu machuku ma kurutu. Chawiy, tukasikeshany kutakaman ni mushiku—yimekeshininga antu izwila nich spiritu utumbila. (Mid. 4:31) Pakwez, tukat kupandakan wom pakampwil kusutil ku ukwash wa chikas cha Yehova, ukasikeshining ritiy retu ni ruchingej retu. (Isay 33:2) Ni yetu kand tutanining musangar ni mazang yidiokila ku kwijik anch tukat kumusanger Tatukwetu wa mwiur. (1 Pita 4:13, 14) Kupwa, el tulikany kwov wom wa kulejan rusangu ruwamp ra Want nich mushiku, chisu chivud twikalany nich ruchingej ra ukwash wa Yehova!