Mudimu Wetu wa Kulejan—Umekening ku Kushimpish Muchim
1. Ov, mutapu ik wamekesha Yehova kushimpish muchim ni antu?
1 Kushimpish muchim udi chijingidij cha mutapu wa kushakam wa Nzamb ni antu. (Kub. 34:6; Kus. 106:41-45; 2 Pita 3:9) Chilakej chimwing cha ku yilakej yidia ya kusambish ya kushimpish kwa rukat chikutwish kumekan mu mudimu wa kulejan Want wa pa mangand mawonsu. Yehova wasala nich antu pasuta kal mivu 2000, ni chikwau kand amwinend udandamen kuyisejin antu akweta michim yiwamp. (Yoh. 6:44) Ov, mutapu ik ukutwish mudimu wetu wa kulejan kumekesh kushimpish muchim kwa Yehova?
2. Ov, mutapu ik tukutwish kumekesh kushimpish muchim chisu tusadina mu teritwar wetu?
2 Mudimu wa Kulejan ku Chikumbu ni Chikumbu: Twimburijin kushimpish muchim kwa Yehova kusutil ku mudimu wa kulejan ‘wakad kulik’ mu teritwar mudia antu kand kal amekesha musangar. (Mid. 5:42) Tujijamen kulik kutesh nich kushimpish muchim, kupipeshijan, ni rupompat mu mudimu wa kulejan. (Mar. 13:12, 13) Tumekeshin kand kushimpish muchim kusutil ku kudandamen mu mausu metu ma kwichil mem pa mbut ja uyakin ap anch chikasikena kutan ku yikumbu antu amwing asangera.
3. Ov, mulong wak kuchirikinamu ni kutakel malejan ma Bibil kuswiridin kushimpish muchim?
3 Malejan ma Bibil: Kupam kwa mutond kwitin kushimpish. Tukutwish kuukudish, pakwez tukutwishap kuswapej kupam kwau. (Jak. 5:7) Chilik chimwing, kukul kwa muspiritu kusadikin pakemp-pakemp ni mu mutapu wa kulondulijan. (Mar. 4:28) Chikutwish kuyikasiken antu twilejin nau chakwel alik yitiyij ya ma relijon a makasu ap yishankur yakad kukwatijan nich mifund. Tufanyidinap kupakish kuswapej kukul kusutil ku kuyishindil in kwilej etu chakwel akarumuk. Kushimpish muchim kwitin kusadil uvud wa asaa uwanyidina mulong wa spiritu wa Nzamb kusal mudimu mu muchim wa mwin kwilej.—1 Kor. 3:6, 7.
4. Ov, mutapu ik kushimpish muchim kukutwish kutukwash chakwel tupana uman kudi anamakwetu akad in kwitiyij?
4 Anamakwetu Akad in Kwitiyij: Ap anch tusotin nakash anch anamakwetu akad kwitiyij ilej uyakin, twimekesh in kushimpish muchim kusutil ku kuchingel chisu chiwamp cha kuyilej ritiy retu, nich kudimuk pakad kuyiyikel nich mitu ya milong yivud nakash. (Mul. 3:1, 7) Pa chisu chinech, chilakej chetu ap yisal yetu yikez kumekesh mutapu wa antu tudia mudi chibudikin cha uyakin nich kwitudish ni kalimish kajim. (1 Pita 3:1, 15) Chakin, mudimu wa kulejan umekening ku kushimpish muchim ukez kwikal wa usey nakash ni ukumusangaresh Tatuku wetu wa mwiur.