Ilakej Kushimpish Muchim Kwa Yehova
“[Yehova] kalabilap mulong wa kuwanyish kushilamu kwend . . . ndiy ukat kukushimpishinany muchim.”—2 PITA 3:9, Manswik Masu.
1. Chipan ik chakad kwilikej chapanay Yehova kud antu?
YEHOVA watwinkisha etu chom chimwing chakadiay muntu ap umwing kutwish kupan. Chidi chom chimwing chisangareshina nakash ni cha usey, chom chimwing chakad kutwishik kuchiland ap kuchitambul mulong wa mudimu kanang. Chom chapanay chidi chipan cha mwom wa chikupu—kud avud chirumburikin, mwom wakad musul mu Paradis pa divu. (Yohan 3:16) Chikez kwikal cha musangar mud ik! Yom yiletina ushon kiyikez kwikalakwap kand—matend, chisum, uzweny, kujipan, mayej, ni ap rufu. Antu akez kushakam mu chisambu chiwanyidina ni mu uumwing mwishin mwa umutakel wa rukat wa Want wa Nzamb. Tuswiridin Paradis winou mud ik!—Isay 9:6, 7; Kujingunik 21:4, 5.
2. Ov, mulong wak Yehova kandikal adiosha ditenchik dia yom dia Satan?
2 Yehova niyend uchingedin chisu chikezay kutenchik Paradis pa divu. Chidi chakin ku mutambu wa Yehova mulong, ndiy udi mwin kukat kutentam ni uyakin. (Kuseng 33:5) Kakatap kusangar pakatay kuman pa mangand kulik kusanger ap kubwambwil yijil yitentamina, mangand malikina ulabu wend ni makata kuyizengol antwend. Chikalap nchik mwamu kudi mayingishin mawamp malejena mulong wak kandikal asala chakwel kudiosh ditenchik diyimp dia yom dia Satan. Mayingish minam mambaten nich yipul piur pa chidia chiwamp ni chiyimp yikwatina ku ukaleng wend. Mulong wa kupwish milong yiney, Yehova ukat kumekesh ngikadil yimwing ya pakampwil yisangareshina, ngikadil yimwing yiburedinau kud antu avud ilel—kushimpish muchim.
3. (a) Dizu dia Grek ni dia Hebereu dikarumwinau anch “kushimpish muchim” dirumburikin ik mu Bibil? (b) Yipul ik tukushinshikina?
3 Kudi dizu dia Grek didia mu New World Translation (NW) dikarumwinau mitapu yisatu yishalijadina “kushimpish muchim.” Dirumburikin anch “kulep kwa muchim” ni chisu chivud adikarumwin kand anch “kwitudish” ap anch “kusadil kushimpish muchim.” Mazu minam mawonsu maad dia Grek ni dia Hebereu mulong wa “kushimpish muchim” makwet chitongijok cha kulikidil ni cha wakad kwovang ujim swa. Mutapu ik twisakidina kushimpish muchim kwa Yehova? Malejan ik mitwilejidina ku kushimpish muchim ni kulikidil kwa Yehova ni kwa atushalapol end ashinshamena? Mutapu ik twija anch kushimpish muchim kwa Yehova kukwet mipak? Katat tushinshikinany yipul yiney.
Shinshikin Kushimpish Muchim kwa Yehova
4. Chom ik chafunday kambuy Pita piur pa kushimpish muchim kwa Yehova?
4 Piur pa kushimpish muchim kwa Yehova, kambuy Pita wafunda anch: ‘kangal wavuramenany chom chinech chimwing, akarukat, chakwel dichuku dimwing kudiay Mwant didi mudi mivu kanan, ni mivu kanan yidi mudi dichuku dimwing. [Yehova] Nsalejetu kalabilap mulong wa kuwanyish kushilamu kwend mudi mukat kutongau antu amwing. Ndiy ukat kukushimpishinany muchim, mulong kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.’ (2 Pita 3:8, 9) Shinshikin amboku manans maad misambidinau pinap makutwisha kukukwash kutesh kurumburik kwa kushimpish muchim kwa Yehova.
5. Mutapu umeningay Yehova yisu ukwet usu ik pa yisal yend?
5 Dinans dia kusambish didi anch Yehova kakatap kuchind chisu mud mutukata kuchichind. Kud Muntu ushichinga chikupu, mivu kanan yidi kwau mud dichuku dimwing kusu. Chisu chikatap kumukangesh, pakwez kakatap kulab mu kusal chom chikutwisha kupwish mulong. Chikwetay manangu makad mupak, Yehova wij nawamp win kamu chisu chiwamp cha kusal chom kanang mulong wa kuwap kwa awonsu akwachikina, nich kushimpish muchim uchingedil chisu chinech chiwanyina. Pakwez, kitufanyidinap kulond anch Yehova kakatap kubangin ku mar mawonsu makatau kuman atushalapol end pa chisu chichingedilay. Ndiy udi Nzamb “mwin riy ni ranaken,” untu wa rukat. (Luka 1:78, MM; 1 Yohan 4:8) Ndiy ukwet usu wa kutenchikiril, yawonsu ni rawonsu, uyimp wawonsu ukutwisha kulet kulikidil mu kachisu kakemp ka mar.—Kuseng 37:10.
6. Chom ik tufanyidinap kulond piur pa Nzamb, ni mulong wak?
6 Chakin kamu, chidiap chiswapela kuchingel chom chiswiridinay muntu nakash. (Jinswir 13:12) Chawiy, antu kakatap kuwanyish kamu nawamp yakushilamu yau, akwau akutwish kulond anch kadingap ni kuchingejin kusal mwamu. Chikez kwikal cha usup mud ik kutongin anch mwamu mudiay Nzamb! Anch twaman kushimpish muchim kwa Nzamb mud kulabijok, kusut kwa chisu kukutwish kamu swa kutusal tuwila mu kwidjidjek ni kuziy, ni chitwishikin kututek mu chak cha kwikal azezalela muspiritu. Chipandikenamu kuyip, tukutwish kwikal adimbinau kud antu alondany Pita chakwel kuyibabel anch—in dises, antu akad ritiy. Antu inay in dises alondil anch: “Ing kushilimu kwa kwez kwend kudi kwisu? Mulong kudiokal palangalau atatukwetu mu tul, yom yawonsu [yidi] mudi muyadinga kudiokal kwisambishish kwa mangand.”—2 Pita 3:4.
7. Mutapu ik kushimpish muchim kwa Yehova kukwatijadina nich rusot rend anch antu akarumuk?
7 Dinans dia kaad ditukutwisha kupwit mu mazu ma Pita didi anch Yehova ushimpishin muchim mulong usotil anch antu awonsu ashikena ku kukarumuk. In alikina kwa chibud kukarumuk kudiokal ku jinjil jau jiyimp disheshik dia ku chikas cha Yehova, diyichingedin. Pakwez, Nzamb kakatap kusanger rufu ra muntu muyimp. Pakwez, ndiy ukat kusangar anch antu ayimp akarumuk, kukarumuk kudiokal ku jinjil jau jiyimp, ni kushal aom. (Ezekiel 33:11) Chawiy, ndiy ukat kushimpish muchim ni ukat kuyitum atushalapol end kulejan rusangu ruwamp pa mangand mawonsu chakwel anch antu akutwish kwisakin mutapu wa kwikal aom.
8. Mutapu ik wamekana kushimpish muchim kwa Nzamb mu kusadil kwend nich muchid wa Isarel?
8 Kushimpish muchim kwa Nzamb kumekening kand mu yisal yend nich muchid wa pakur wa Isarel. Chilakej, walikidila kubwambwil kwau. Kusutil kud aprofet end, chisu ni chisu wayikasikesha anch: “Karumukany kudiokal ku jinjil jen jiyimp ni lamany yijil yam, yiyul yam, kulondulijan nich chijil cham chinayinkisha angakiril en ni kutuminany en kusutil kud aprofet am.” Kwadinga chibudikin ik? Cha ushon, antu “alika kutesh.”—2 Ant 17:13, 14, NW.
9. Mutapu ik kushimpish muchim kwa Yesu kwamekesha kushimpish muchim kwa Tatukwend?
9 Kupwa, Yehova wamutuma Mwanend, muntu wadandamena pakad kuziy kuyilembil in Yuda mulong ovijana ni Nzamb. Kushimpish muchim kwa Yesu kwamekesha kamu muchifanyidina kushimpish muchim kwa Tatukwend. Ndiy wading wij nawamp kamu anch akumujip piswimp ap, Yesu winana anch: ‘O Yerusalem, Yerusalem, ukata kujip aprofet ni kuyas akata kukutuminau mayal! Tupamp tuvud am nasota kukukumangejinany pamwing, mudi chikata kukungay nzol anend mu jimpur jend, en walikany kwen!’ (Mateu 23:37) Mazu minam makwatina ku muchim madiap ma nzuj wakad kujikitish usotila ching kumupup muntu kanang pakwez madi ma murund mwin rukat ushimpishina muchim mulong wa antu. Yesu, mud Tatukwend wa mwiur, wasota anch antu akarumuka ni iyepa ku dirumburish dikash. Amwing itiyija yibabesh ya Yesu ni iyepa ku dirumburish dikash diashikena pa Yerusalem mu muvu wa 70 C.C.—Luka 21:20-22.
10. Mutapu ik twisakidina kushimpish muchim kwa Nzamb?
10 Ov, kushimpish muchim kwa Nzamb kudiap chom chamushena? Chikalap nchik chilik cha kubwambwil kwa muntu, Yehova wamwinkisha kal umwing ni umwing wetu, pamwing ni tutikit twa antu akwau, mutapu wa kumwijik ni wa kwak ruchingej ra dipandish. Pita wayifundina ambay nend in Kristu anch: “Chindany kushimpish muchim kwa [Yehova] wetu kwawiy dipandish”. (2 Pita 3:15) Ov, tujikitishinap anch kushimpish muchim kwa Yehova kwatwazurila njil ya dipandish? Ov, tukatap kulembil anch Yehova adandamena kutushimpishin muchim pitumusadidila dichuku ni dichuku?—Mateu 6:12.
11. Kutesh kurumburik kwa kushimpish muchim kwa Yehova kutubachikin kusal ik?
11 Anch twatesh mulong wak ushimpishidinay Yehova muchim, tudi akwashinau kuchingel nich kushimpish muchim dipandish dikezay kulet, kangal kulond anch ulabin mu kuwanyish yakushilamu yend. (Madil ma Jeremiy 3:26) Pitudandamedina kulembil chakwel Want wa Nzamb weza, tuchingedin anch Nzamb wija nawamp ukwakul malembil minam. Chikwau, tudi abachikinau kumwimburij Yehova kusutil ku kumekesh kushimpish muchim kwa winzamb mu mutapu wetu wa kuyisadil akadivar netu ni antu itukata kulej. Niyetu kitusotinap muntu ap umwing asheshika pakwez tusotil kuyiman akarumuk ni aka ruchingej ra mwom wa chikupu.—1 Timote 2:3, 4.
Shinshikin Kushimpish Muchim kwa Aprofet
12, 13. Kwambatan nich Yakob 5:10, mutapu ik wapandakanay muprofet Isay mu kusadil kushimpish muchim?
12 Kusutil ku kushinshikin kushimpish muchim kwa Yehova, atukwashin kusanger ni kukudish ngikadil yiney. Chiswapelap kud antu akad kuwanyin kukudish kushimpish muchim, pakwez chitwishikin kukudish. Twilejidin kudi atushalapol a Nzamb a pakur. Kambuy Yakob wafunda anch: “Akadivar, tambulany chilik chau aprofet cha kwikonk ni kushimpish muchim, awiy alonda mu dijin dia Mwant [Yehova].” (Yakob 5:10) Chidi cha kwongoj ni cha kukasikesh kwijik anch antu akwau apandakana yiturishina nich.
13 Chilakej, muprofet Isay, chakin wading uswiridin kushimpish muchim mu mudimu wend. Yehova walonda pamulejay anch: “Yang ukayilej antu inay anch: ‘Kutesh ukez kateshany kwen, pakwez kushinshik bwat.’ Chad wanlej kand anch: ‘Chinchikish michim ya antu inay. Jik matu mau ti. Puputish mes mau. Chakwel kangal amana nich mes mau, ap kwijik nich michim yau. Chamwamu akez kakarumukin kudi am chakwel niyoka.’” (Isay 6:9, 10) Chikalap nchik kuchinchik michim kwa antu, Isay nich kushimpish muchim walejana uruu wa dibabesh wa Yehova mu chirung cha mivu 46! Mwinjil yiney, kushimpish muchim kukez kutukwash kujijaman mu mudimu wetu wa kulejan rusangu ruwamp, ap anch antu avud achinchikin michim.
14, 15. Chom ik chamukwasha Jeremiy kujijaman ku mar ni kuziy?
14 Mwawiy, mud mwawanyishau aprofet mujikit wau, chayifanyina kurish nich yom yivud kuwejin pa kuchinchik michim; amana mar ma kuyizengol. Jeremiy amukasina mu jimpompu, amuteka mu rukan mu “chikumbu cha mwin kufund,” ni amudjibwila mu dijiy. (Jeremiy 20:2; 37:15; 38:6) Amuzengola ku makas kwa antu in asotay kukwash. Pakwez, Jeremiy kovap kuyip, ap kufundakesh. Wajijamana nich kushimpish muchim mu makum ma mivu.
15 Kuzengol ni dises yamunenetishap Jeremiy, ni yikutwishap kutunenetish ilel. Chakin kamu, tukutwish pa yisu yimwing kuziy. Jeremiy waziya. Wafunda anch: “[Yehova], am akat kwindiwol ni kwimpipej yisu yawonsu, mulong nikat kulond mazu mey”. “Am nalond anch: ‘Nikumuvuramen [Yehova], kinikulondap kand mu dijin diend.’” Chom ik chashikena? Ov, Jeremiy walika kulejan? Ndiy wadandamena anch: “Chad mazu mey makat kwinswanish mu muchim mudi kasu. Nikat kupakish kunenet nich, pakwez kinikutwishap kulik kulond.” (Jeremiy 20:8, 9) Shinshikin anch patonginay pa dises dia antu, ndiy washadisha musangar wend. Pakarumwinay manangu mend pa kuwap ni usey ujim wa uruu awinau, musangar wend wachirika. Chikwau kand, Yehova wadinga ni Jeremiy ‘mud muntu mwin dikand,’ wamukasikesha kulejan dizu dia Nzamb nich mushiku ni kukankaman.—Jeremiy 20:11.
16. Mutapu ik tukutwisha kulam musangar mu mudimu wetu wa kulejan rusangu ruwamp?
16 Ov, muprofet Jeremiy watana musangar mu mudimu wend? Inge! Wamwela Yehova anch: “[Yehova] Nzamb Mwin Dikand, am nidi iwey, chawiy mazu mey makat kwizwish muchim wam ni musangar ni kuzangijal.” (Jeremiy 15:16) Jeremiy wasangera chisend chend cha kwikal ntimesh wa Nzamb wakin ni kulejena dizu diend. Niyetu tukutwish kusangar. Chikwau kand, tusanger, mud musangerau angel adia mwiur, anch antu avud mu mangand mawonsu akutwish kwitiyij uruu wa Want, kukarumuk, ni kwandam mwinjil yitwadila ku mwom wa chikupu.—Luka 15:10.
“Kujikish kwa Yob”
17, 18. Mwi njil ik yajijamanay Yob, ni kwadinga chibudikin ik?
17 Kupwa kwa kurumburil piur pa aprofet a pakur, kambuy Yakob wafunda anch: ‘Wateshilany kal ya kujijaman kwa Yob, wamenany kal musul wa Mwant, ni mudi mwizwilay Mwant nich ranaken ni riy.’ (Yakob 5:11) Dizu dia Grek diakarumunau anch “kujijaman” dirumburikin chilik chimwing nich dizu diasadilay Yakob mu verse udia kwiur oku mulong wa “kushimpish muchim.” Palejanay kushalijan kudia pakach pa mazu maad, mwin kwilej Bibil umwing wafunda anch: “diakusambish didi kushimpish muchim patusadidilau antu nayimp, dia kaad didi kujijaman kwa kuhamuk mwishin mwa mwikadil wa mar.”
18 Yob wamana mar makash. Washadisha dipit diend, wafisha anend, ni wayela mayej makash. Warisha kand nich kumufund kwa makasu anch Yehova ndiy wadinga umupupina. Yob kamanap mar pakad kulond; winana piur pa mwikadil wend ni walonda anch ndiy wadinga utentamin nakash kumupandakanamu ap Nzamb. (Job 35:2) Pakwez, kashadishap ritiy, ap kujiril kushinshaman kwend. Kamusaalap Nzamb mud mwalonda Satan anch ukumusaal. (Job 1:11, 21) Chibudikin chadinga nchik? “[Yehova] wayukisha mwom usu wa Job kupandakanamu wa kusambish.” (Job 42:12) Yehova wamuchirishina Job ukash wend wa mujimbu, wavudisha dipit diend tupamp twaad, ni wamuyukisha sens nich, mwom wa musangar pamwing ni akatish end. Kujijaman kwa ritiy kwa Job kwamutwishisha kand kumutesh Yehova muchifanyidina.
19. Chom ik twilejidina ku kujijaman kwa kushimpish muchim kwa Job?
19 Chom ik twilejidina ku kujijaman kwa kushimpish muchim kwa Job? Mud Job, tukutwish kuyel mayej ap mar mindjing. Tukutwishap kutesh nawamp mulong wak Yehova utulikidinay twikala mu choziu kanang. Pakwez, tukwikal nich kashinsh kanak: Anch twashal ashinshamena, tukez kayukishiwu. Pakad kukangany Yehova ukat kuyiyukish antu akata kumukimb chakin kamu. (Hebereu 11:6) Yesu walonda anch: ‘Mwawonsu ukeza kajijaman ni kushik kwisudiel, mwinau ndiy ukapandishau.’—Mateu 10:22; 24:13.
“Dichuku dia Mwant [Yehova] Dikwez”
20. Ov, mulong wak tufanyidin kwikal nich kashinsh anch dichuku dia Yehova dikwez?
20 Ap anch Yehova ushimpishin muchim, ndiy uding kand utentamina ni kakezap kulikidil uyimp chikupu. Kushimpish muchim kwend kukwet mipak. Pita wafunda anch: “Nzamb kayovilap antu a pakur riy, pasheshay mangand ma in kumubwambwil.” Ap anch amupandisha Nowa ni dijuku diend, antu inay in kumubwambwil Nzamb afa ku mabeb ma mem. Yehova waleta kand dirumburish pa Sodom ni Gomor, wayikadisha maut. Dirumburish dinend dikala “chilik . . . kudi awiy ashicha wakad Nzamb.” Pa chinech, tufanyidin kwikal nich kashinsh anch: “dichuku dia Mwant [ Yehova] dikwez.”—2 Pita 2:5, 6; 3:10.
21. Mutapu ik tukumekesha kushimpish muchim kwetu ni kujikish kwetu, ni rusangu ik tukeza kushinshikin mu mutu wa mulong wambakedinap?
21 Katat, twilikejany kushimpish muchim kwa Yehova kusutil ku kuyikwash antu akwau kushik ku kukarumuk chakwel atwisha kupand. Tuyilikejany aprofet kusutil ku kushimpish michim kulejan rusangu ruwamp chikalap nchik kuchinchik kwa michim ya antu tulejina. Chikwau kand, tukutwish kwikal nich kashinsh anch Yehova ukez kutuyukish nakash anch mud Job, twajijaman ku yoziu ni kulam kushinshaman. Kudi mayingishin mavud ma kusanger mu mudimu wetu pitujingunina mutapu Yehova mwayukishay nakash usu wa antwend wa kulejan rusangu ruwamp pa divu diawonsu. Yawiy tukeza kwilej mu mutu wa mulong wambakedinap.
Ov, Uvurikin?
• Ov, mulong wak ukatay Yehova kumekesh kushimpish muchim?
• Chom ik twilejidina ku kushimpish muchim kwa aprofet?
• Mutapu ik wamekeshay Job kujijaman, ni kwikala chibudikin ik?
• Mutapu ik twija anch kushimpish muchim kwa Yehova kukweting mipak?
[Chipich chidia pa paj wa 15]
Kushimpish muchim kwa Yesu kwamekesha muchifanyidina kushimpish muchim kwa Tatukwend
[Chipich chidia pa paj wa 16]
Mutapu ik wayukishay Yehova kushimpish muchim kwa Jeremiy?
[Chipich chidia pa paj wa 17]
Mutapu ik wayukishay Yehova kujijaman kwa Job?