Ilejidina Ku Kushimpish Muchim Kwa Yehova Ni Kwa Yesu

“Chindany kushimpish muchim kwa Mwant wetu kwawiy dipandish.”—2 PITA 3:15.

MUTAPU IK UKUTWISHA KWAKUL?

Mutapu ik wamekeshay Yehova kushimpish muchim?

Mulong wak Yesu wafanyidina kushimpish muchim chisu chilemp?

Ov, yom ik tufanyidina kusal chakwel tukasikesha kushimpish muchim kwa Nzamb?

1. Ov, pa chom ik pakatau kutongin antu amwing ashinshamena?

NAMBAZ umwing ushinshamena warisha nich yikokujol mu dikum dia mivu, wiyipula nich kwitudish anch, “Ov, nikez kuman disudiel kurutu kwa kufa?” Antu amwing amusadila Yehova mu machuku mavud iyipula niyawiy chilik chimwing. Tuchingejin dichuku dikezay Nzamb kusal yom yawonsu yisu, kudiosh milong tukweta katat. (Kuj. 21:5) Ap anch tukwet mayingish mawanyidina ma kwitiyij anch disudiel dia ditenchik dia Satan didi piswimp nakash, chikutwish kukasikan kuchingel dichuku dined nich kushimpish muchim.

2. Ov, yipul ik tukeza kushinshikin piur pa kushimpish muchim kwa Nzamb?

² Chikwau kand, Bibil utulejin anch tufanyidin kushimpish muchim. Mudi atushalapol a Nzamb a pasak, tukez kutambul yiyukish yashilayimu Nzamb anch tukwet ritiy rikash ni twachingel nich kushimpish muchim chisu chinech chakwel yakushilamu yend yiwanyina. (Tang Hebereu 6:11, 12.) Yehova amwinend uding mwin kushimpish muchim. Ndiy ukutwish kuyishesh antu ayimp pa chisu chin chawonsu, pakwez ukat kuchingel chisu chifanyidina. (Rom 9:20-24) Ov, mulong wak ushimpishin muchim? Mutapu ik wapanay Yesu chilakej cha kushimpish muchim kwa Nzamb? Ov, yiyukish ik tukeza kwikal nich anch twakudish kushimpish muchim kwa Nzamb? Yakul ku yipul yiney yikutwish kutukwash kushimpish muchim ni ritiy rikash, ap anch tukutwish kuman anch Yehova ulabin.

OV, MULONG WAK YEHOVA USHIMPISHIN MUCHIM?

3, 4. (a) Mulong wak Yehova wamekesha kushimpish muchim kusutil ku kuwanyish rutong rend mulong wa divu? (b) Ov, chom ik chasalay Yehova pamanay kubwambwil mu Eden?

³ Yehova ukwet diyingish diwamp dia kushimpishin muchim. Chidi chakin anch ndiy ukweta uyaj chisu chawonsu pa mangand mawonsu; chikwau kand, kubwambwil kwasadika mu Eden kwalangwisha yipul ya usey pa milong yijim mu mangand mawonsu. Yehova washimpisha muchim, wading wij anch ukez kutek chisu cha kwakul ku yipul yiney mu mutapu uwanyidina. Mulong wij yisal ni yaku ya antu adia mwiur ni pa divu, usadil yom chakin kamu mulong wa kuwanyish yisakin yetu yiwamp nakash.—Heb. 4:13.

⁴ Rutong ra Yehova rading anch anend a Adam ni Ev izwish divu. Satan payidimbay Ev nenday Adam chakwel abwambwila, Nzamb kalikap kuwanyish rutong rend. Ndiy kovap wom, ap kakwatap swaa mipak, ap kujiman ni kuyilik antu. Pakwez, ndiy wamana mutapu wa kusal chakwel awanyisha rutong rend mulong wa antu ni Divu. (Isay 55:11) Mulong wa kuwanyish rutong rend ni kuchidij ukaleng wend, Yehova wamekesha kwitudish ni kushimpish muchim, ap kuchingel tunan twa mivu chakwel milad yimwing ya rutong rend yiwanyina nawamp.

5. Ov, kushimpish muchim kwa Yehova kuletin yiyukish ik?

⁵ Diyingish dikwau dimekeshina mulong wak Yehova wachingela nich kushimpish muchim didi anch chakwel antu avud atwisha kutambul mwom wa chikupu. Katat, urijekin yom mulong wa kupandish “chisak chipandakena kujimb.” (Kuj. 7:9, 14; 14:6) Yehova ushikin kudi antu kusutil ku mudimu wetu wa kulejan, uyitazukin chakwel ileja piur pa Want wend ni yijil yend yitentamina. Rusangu ra Want udi uruu uwamp nakash kudi antu—mwaning ridi “rusangu ruwamp.” (Mat. 24:14) Muntu ni muntu uletinau kudi Yehova ukat kwandam mu chikumangen cha mangand mawonsu cha arund akin akatina kutentam. (Yoh. 6:44-47) Nzamb wetu ukweta rukat uyikwashin antu inay chakwel atambula kwitiyik kwend. Ndiy wayitonda kand antu amwing pakach pa antu chakwel ikala nich ruchingej ra kwikal yid ya winyikel wend wa mwiur. Pakezau kuya mwiur, antu inay ashinshamena akez kuyikwash antu aziyidina kushiken ku kuwanyin ni ku mwom wa chikupu. Chakin kamu, ap anch uchingedin ni kushimpish muchim, Yehova wasadin usu mulong wa kuwanyish kushilamu kwend—mulong wa uwamp wetu.

6. (a) Ov, chom ik chimekeshina anch Yehova washimpisha muchim pa chirung cha Nowa? (b) Ov, mutapu ik umekeshinay Yehova kushimpish muchim nlel unou?

⁶ Yehova ushimpishin muchim chikalap nchik kumwovish ujim, mudi mutukutwisha kuman mutapu wasalay mulong wa kudiosh uyimp wadingaku kurutu kwa Mabeb. Pa chisu chinicha masandj ni chisum yapandakana pa divu, ni Yehova “wova ushon mu muchim wend” mulong mashakamin ma muntu madandamena kuyip nakash. (Dis. 6:2-8) Ndiy kakezap kulikidil chakwel mwikadil winou wikalaku chikupu, chawiy lel wasala usu wa kulet mabeb mulong wa kuyishesh antu ayimp. “Pa chisu chachingelay nich muchim ushimpishila mu chirung cha Nowa,” Yehova warijeka yom mulong wa kumukwol Nowa ni dijuku diend. (1 Pita 3:20) Pa chisu chiwanyidina, Yehova wamuleja Nowa piur pa mupak wend ni wamwinkisha mudimu wa kutung waat. (Dis. 6:14-22) Chikwau kand, Nowa wading “mwin kurumburil yom yitentamina,” kuyilej amutej nend kusheshik kwadinga piswimp. (2 Pita 2:5) Yesu walonda anch chirung chetu chidi chilik chimwing ni cha Nowa. Yehova wakwata mupak piur pa chisu chikezay kushesh ditenchik diyimp. Kwikil muntu wija “dichuku dinidia ap . . . chisu” cha kusheshik kwinoku. (Mat. 24:36) Nlel unou, tukwet mudimu watwinkishau kudi Nzamb wa kuyibabesh antu ni kuyilej mutapu ukutwishau kukolik.

7. Ov, Yehova ulabin pa kuwanyish kushilamu kwend? Rumburil.

⁷ Chimeken patok anch, kushimpish muchim kwa Yehova kukutwishap kurumburik anch uchingedin ching kusu anch chisu chisuta. Bwat, tufanyidinap kuman kushimpish muchim kwend mudi kuburen kushinshikin ap kulik kubangin! Chimeken patok anch, chikutwish kukasikan kulam yom yiney mu manangu pitupamina ap pitumena mar mu ditenchik dined diyimp. Tukutwish kuziy ap kuman anch Nzamb ulabin pa kuwanyish kushilamu kwend. (Heb. 10:36) Kangal wavuramen anch ukwet mayingish mawamp masadilay anch ashimpisha muchim ni ukez kusadil chisu chiwanyidina mulong wa kuyikwash atushalapol end ashinshamena. (2 Pita 2:3; 3:9) Tal kand, mutapu wamekeshay Yesu kushimpish muchim kwa Nzamb.

MUTAPU IK WAPANAY YESU CHILAKEJ CHIWAMP CHA KUSHIMPISH MUCHIM?

8. Ov, mu mashakamin ik mwamekeshay Yesu kushimpish michim?

⁸ Yesu usadil rusot ra Nzamb ni usotin nakash kusal mwamu mu tunan twa mivu. Pabwambwilay Satan, Yehova wakwata mupak anch Mwanend kapokal ufanyidin kwez pa divu mudi Mesia. Tongin bil pa kurumburik kwa chinech kudi Yesu—kuchingel nich kushimpish muchim mu tunan twa mivu djat ni pashikena chisu chinech. (Tang Galatia 4:4.) Ndiy kachingelap chisu chinech chawonsu pakad kusal mudimu bwat; pakwez wading usadil mudimu wamwinkishau kusal kudi Tatukwend. Pezay pa divu, ndiy wading wij anch ukez kufa mu makas ma Satan, mudi mwatakelau kulejan. (Dis. 3:15; Mat. 16:21) Ndiy waziyila nich kushimpish muchim ku rusot ra Nzamb, ap anch wafanyidina kuman mar ni kusansan. Kushinshaman kwend kwading kwa piur nakash. Ndiy kishinshikinap amwinend ap pa mwikadil wend, ni tukutwish kutaninamu yiyukish pa chinech.—Heb. 5:8, 9.

9, 10. (a) Ov, chom ik chasalay Yesu padingay ni kuchingel nich kushimpish muchim yikezay Yehova kusal? (b) Mutapu ik tukutwisha kuman chisu chatekay Yehova?

⁹ Kupwa kwa kuvumbuk kwend, Yesu watambula uyaj mwiur ni pa divu. (Mat. 28:18) Ndiy wasadila uyaj winou mulong wa kusal rutong ra Yehova kwambatan nich chisu chatekay Nzamb. Yesu wachingela nich kushimpish muchim ku chikas cha katatuku cha Nzamb djat ni mu muvu wa 1914 chakwel ateka akankuny nend ikala chipwan cha kwanzuk mend yend. (Kus. 110:1, 2; Heb. 10:12, 13) Piswimp ap, ndiy ukez kushesh ditenchik dia Satan. Nlel unou, Yesu usadin mudimu ni antu nich kushimpish muchim ni ukat kuyitakel ku “mem ma mwom.”—Kuj. 7:17.

¹⁰ Ov, umen kusutil ku chilakej cha Yesu mutapu tukutwisha kuman chisu chatekay Yehova? Yesu wasota chakin kamu kusal yom yawonsu yamwitay Tatukwend kusal; chikwau kand, ndiy wasota kuchingel chisu chatekay Nzamb. Pituchingedina disudiel dia ditenchik diyimp dia Satan, etwawonsu tuswiridin kwikal nich kushimpish muchim kwa Nzamb, tufanyidinap kumatik umutakel wa Nzamb ap kulik anch mulong tuziyil. Ov, chom ik tukutwisha kusal chakwel tukasikesha kushimpish muchin kwinoku kwa Nzamb?

MUTAPU IK TUKUTWISHA KUKUDISH KUSHIMPISH MUCHIM KWA NZAMB?

11. (a) Ov, mu mutapu ik kudia kukwatijan pakach pa ritiy ni kushimpish muchim? (b) Ov, mulong wak tukwet mayingish makin ma kwikal ni ritiy rikash?

¹¹ Kurutu kwa Yesu kwez pa divu, aprofet ni atushalapol akwau ashinshamena apana chilakej piur pa mutapu ukutwishau ap kand antu akad kuwanyin kujijaman nich kushimpish muchim. Ritiy rau rikwatijadin nakash nich kushimpish muchim kwau. (Tang Jakobu 5:10, 11.) Anch kitiyijap chakin kamu mazu mayilejau kudi Yehova—anch aburen ritiy—ov, awiy ela kuchingel nich kushimpish muchim kuwanyin kwa kushilamu kwend? Chisu ni chisu, awiy atana yakamish ap yoziu yikash ya ritiy, nich ruchingej anch Nzamb ukez kusal chakin kamu yom yayishilaumu. (Heb. 11:13, 35-40) Tukwet mayingish mavud masadila anch twikala ni ritiy rikash, mulong Yesu usadil katat mudi “mwin kutenchikish wa ritiy retu.” (Heb. 12:2, TMK) Ndiy wawanyisha uprofet ni wamekesha rutong ra Nzamb mu mutapu wa kutwinkish mayingish makin makwikal nich ritiy.

12. Ov, chom ik tufanyidina kusal chakwel tukasikesha ritiy retu?

¹² Ov, yom ik ya usey tufanyidina kusal chakwel tukasikesha ritiy retu, ni kukasikesh kand kushimpish muchim kwetu? Chidi cha usey kusadil chiyul cha Nzamb. Chad, tongin pa mayingish ukweta ma kutek Want pa ndond ya kusambish mu mwom wey. Ov, ukutwish kusal usu nakash chakwel usadila chiyul chidia mu Mateu 6:33? Chinech chirumburikin kusutish yisu yivud mu mudimu wa kulejan ap kutenchik mikadil yimwing ya mashakamin mey. Kangal wavuramen mutapu uyukishinay Yehova usu usadina djat ni katat. Ndiy wakukwashin anch utwisha kutakel dilejan disu dia Bibil ni kukukwash chakwel utambula “chisambu cha Nzamb chisutila ronganyin rawonsu.” (Tang Filip 4:7.) Anch washinshikin pa yiyukish watambula amwiney kusutil ku kulondul yany ya Yehova, ukez kukudish kusanger kwey kwa kushimpish muchim.—Kus. 34:8.

13. Ov, mutapu ik tukutwisha kwilikej mudimu wa kukasikesh ritiy ni kushimpish muchim?

¹³ Chinech chikutwish kwikal chilik chimwing ni mudimu usadiningau mu mangand wa kukun, kudim, ni kwangul. Yisu yivud anch mwin kudim washiken ku kwangul yom yivud nakash, ukwikal nich ruchingej ra kwangul anch wakun kand mbut pa chirungu chidia kurutu. Chakin kamu, ndiy ukez kuchingel kwangul nich kushimpish muchim, pakwez chinech chikutwishap kumukangesh kudandamen kukun mbut, ap kukun mbut pa chir chijim kupandakanamu chisu cha kusambish. Ndiy ukwet ruchingej anch ukez kwangul. Chilik chimwing, pitukata kuchirikin mudimu wa kwilej chiyul cha Yehova, kuchilondul, ni kwangul yiyukish, ruchingej retu riyil kurutu. Ritiy retu ni rawiy riyil kurutu, ni chikuswapal kuchingel yiyukish twija anch yikwez.—Tang Jakobu 5:7, 8.

14, 15. Ov, chitongijok ik tufanyidina kwikal nich piur pa mar ma antu?

¹⁴ Mutapu ukwau wa kukudish kushimpish muchim udi kushinshikin pa mutapu tufanyidina kuman mangand ni mikadil yetu ayinetu. Pakishany kuman yom mudi muyimenay Yehova. Chilakej, tongin pa mutapu umenay mar ma antu. Ndiy wova kusansan nakash pamanay mutapu umenau antu mar; ni ushon wamukangeshap kusal uwamp. Chawiy lel, wamutuma Mwanend kapokal chakwel eza “kushesh midimu ya Sakudimban” ni kudiosh uyimp wawonsu waletay Satan padi antu. (1 Yoh. 3:8) Chakin kamu mar makez kwikalaku ka chisu kakemp, pakwez dipandish dia Nzamb didi dia chikupu. Chilik chimwing, pa ndond pa kusal anch uyimp wa katat wa kuyikel kwa Satan utupandakana ap tushadisha kushimpish muchim piur pa chisu uyimp winou ukeza kupwa, tekany amboku ritiy retu mu yom yakad kumekan yikeza kwikalaku chikupu. Yehova watekin kal mupak wa pakampwil ku uyimp, ni ukez kusal pa chisu chiwanyidina.—Isay 46:13; Neh. 1:9.

¹⁵ Mu machuku minam mansudiel ma mar ma ditenchik dined dia yom, tukutwish kuman mar mamwing ma pakampwil ku ritiy retu. Pa ndond pa kujiman anch chisum cha tushiken ap anch akatish netu amena mar, tuswiridin kusal usu wa kumuchingejin nakash Yehova. Tudi antu akad kuwanyin, chawiy lel, chiswapelap kusal mwamu. Pakwez, vurik, yasalay Yesu, mudi mwafundau mu Mateu 26:39.—Tang.

16. Ov, chom ik tufanyidina kwipuk kusal pa chirung chinech chishadilaku?

¹⁶ Chom chimwing chikata kutukangesh kushimpish muchim chidi chaku cha kuchingel ni kuman. Chinech chirumburikin ik? Mwaning, muntu uburedina ruchingej ra kwel anch disudiel didi piswimp, ukutwish kusambish kukwat mipak yikwau, ni kulond anch, pamwing ap yom yikezap kusadik mudi mwalonday Yehova. Ap ukutwish kutong anch, ‘Nikez kuchingel ni kuman anch Yehova ukez kuwanyish chakin kamu dizu diend.’ Ndiy ukutwish kupakish kwitekin dijin mu mangand minam, kukimb nfalang pa ndond pa kutek bil Want wa Nzamb pa ndond ya kusambish, ukutwish pamwing ap kuchingejin kand mu shikol ya piur chakwel ikal nich mwom uwamp nlel unou. Ov, chinech chidiap chakin kamu kuburen ritiy? Vurik anch Paul watuleja anch tufanyidin kuyimburij antu ashinshamena atambula kushilamu kudi Yehova mulong adinga “in ritiy [ni] ashimpisha michim.” (Heb. 6:12) Yehova kakezap kulikidil anch ditenchik dined diyimp didandamena kwikalaku chisu chilemp nakash pakad kwambatan nich rutong rend. (Aba. 2:3) Chad, tufanyidin kwipuk kumusadil Yehova pakad kutekaku muchim. Pakwez, tufanyidin kubabal ni kusal nich mushiku mudimu wa kulejan rusangu ruwamp, mudimu uletina musangar nakash nlel unou.—Luka 21:36.

OV, YIYUKISH IK YIDIOKILA KU KUSHIMPISH MUCHIM?

17, 18. (a) Ov, chisu ik tukweta katat piur pa kushimpish muchim? (b) Ov, yiyukish ik tukeza kutambul kusutil ku kushimpish muchim katat?

¹⁷ Ap anch twamusadila Nzamb mu angond akemp ap mu makum ma mivu mavud, tusotin kumusadil ndiy chikupu. Kushimpish muchim kukat kutukwash kujijaman djat ni pitukeza kukolik, chikalap nchik uvud wa mivu ushadina mu ditenchik dined. Yehova utwinkishin katat chisu cha kumekesh ritiy retu rawonsu mipak yend ni—anch chitwishikin—utwinkishin chisu cha kusot kuman mar mulong wa dijin diend. (1 Pita 4:13, 14) Nzamb utwinkishin kand malejan makutwisha kutukwash kwikal nich kushimpish muchim kutuswiridina mulong wa kupand.—1 Pita 5:10.

¹⁸ Yesu ukwet uyaj wawonsu mwiur ni pansh, ni kwikil chom chikutwisha kukutek kulemp ni diking diend—ching kusu amwiney. (Yoh. 10:28, 29) Chifanyidinap kwov wom wa machuku ma kurutu ap wa rufu. Antu ajijamena nich kushimpish muchim djat ni kwinsudiel akez kukolik. Chawiy lel tufanyidin kusal usu chakwel kangal twalikidil chakwel mangand matudimba ni kutukangesh kumuchingejin Yehova. Pakwez, tufanyidin kukwat mupak wa kukul mu ritiy ni kusadil nich manangu chisu chishimpishinay Nzamb muchim.—Mat. 24:13; tang 2 Pita 3:17, 18.

[Chipich chidia pa paj wa 21]

Kushimpish muchim kwa Nzamb kukez kukukwash kushinshikin pa yisakin ya Want ni kwangul yiyukish!