Chisambu Mu Mivu Kanan —Ni Kurutu!

“Chad mwamu Nzamb ukez kutakel yawonsu.”—1 KOR. 15:28.

OV, UKUTWISH KURUMBURIL?

Ov, kuwanyin kwa ma verse minam kurumburikin chom ik kudi ey?

Mike 4:4

Isay 11:6-9

Yohan 5:28, 29

1. Ov, ruchingej ik ramushena richingedila “chisak chipandiken kujimb”?

OV, UKUTWISH kutongin pa yom yawonsu yiwamp yikusalau kudi winyikel ukash mwishin mwa ntakel wa riy mulong wa antwend mu mivu kanan? Yinship yiney yamushena yichingedil “chisak chipandaken kujimb”—chikeza kupand ku “mar makash,” makeza kutwal ku kusheshik kwa ditenchik dined diyimp dia yom.—Kuj. 7:9, 14.

2. Ov, chom ik chayishikena antu mu mivu 6000 yasutina?

² Mu mivu 6000 ya rusangu ra muntu, kusot kwitekin mipak ni kwiyikel ayinau kwapandikesha kusansan ni mar pakach pa antu. Bibil walejana pasak anch: “[Antu] akat kuman mar mu makas [ma akwau].” (Mul. 8:9) Ov, chom ik tumena nlel unou? Ku mutambu wa njit ni kubwambul, kudi kand milong yikash ya uzwendj, ya mayej, kusheshik kwa mwikadil, kukarumuk kwa chisu, ni yikwau yivud. Antakel a winyikel atubabesha anch anch tuswimpinap mashakamin metu, yibudikin yikez kwikal yiyimp nakash.

3. Ov, chom ik chikeza kusadik mu Mivu Kanan ya Kuyikel?

³ Mwishin mwa Want wa Umesia Yesu Kristu ni anyikel end 144000, Want wa Nzamb ukez kudiosh pakemp-pakemp uyimp wawonsu wayisadilau antu, ni ndond yau ya kushakamin, Divu. Mivu Kanan ya Kuyikel yikez kuwanyish kushilamu kwamushena kwapanau kudi Yehova Nzamb anch: “Am nikat kutang mangand masu ni maur masu. Yom yawonsu ya pakur akez kayivuramen.” (Isay 65:17) Yinship ik yamushena yikata kutuchingel, ap anch kand kal tuyimanap? Nich ukwash wa Dizu dia uprofet dia Nzamb, shinshikinany amboku piur pa yom yamushena “yakad kumekan ku mes.”—2 Kor. 4:18.

‘AKEZ KUTUNG YIKUMBU NI KUDIM YIR YA MITOND YA NVINY’

4. Ov, mulong wak chikasiken nakash kwikal nich chikumbu nlel unou?

⁴ Ov, nany ukeza kulik kusanger kwikal ni chikumbu chend, ndond yikutwishay ndiy ni dijuku diend kushakam nawamp ni mu diking? Pakwez mu mangand ma nlel unou, chikasiken nakash kwikal nich chikumbu chiwamp. Antu ashakamin mu misumb yizwila antu avud. Avud atungin tuyikumbu tukemp twakad kurijek nawamp mu mal ma uzwendj. Chiyikasikedin nakash kwikal ni chikumbu chiwamp.

5, 6. (a) Ov, Isay 65:21 ni Mike 4:4 yikez kuwanyin nchik? (b) Ov, mutapu ik tukutwisha kutambul chiyukish chinech?

⁵ Mu winyikel wa Want, rusot ra antu awonsu ra kwikal nich chikumbu chau rikez kuwanyin, mulong atakela kupan uprofet kusutil kudi Isay anch: “Awiy akez katung yikumbu ni kushakamamu ni ayinau. Akez kadim yir ya mitond ya nviny ni kudia mabuj mau.” (Isay 65:21) Chikwau kand, kachingejinap kwikal ching kusu nich chikumbu chau ayinau bwat. Ap mwamu, antu amwing nlel unou ashakamin mu yikumbu yau, amwing ashakamin mu yikumbu yiwamp nakash ap yijim yijim. Pakwez adandamedin kwakam anch chitwishikin kushadish chikumbu mulong wa kuburen nfalang ap akutwish kuyandamin kudi ij,—ap antu ayimp. Chishalijadin mud ik ni chom chin chawonsu chikeza kusadik mwishin mwa winyikel wa Want! Muprofet Mike wafunda anch: “Antu awonsu akez kashakam mu chisambu mu yir yau ya mitond ya nviny ni mitond ya nfung. Kwikil muntu ap umwing ukez kuyakamish.”—Mike 4:4.

⁶ Anch tukwet ruchingej riner ramushena mu manangu, ov, chom ik tufanyidina kusal? Chakin kamu, etwawonsu tuswiridin kwikal nich chikumbu chiwamp. Pakwez, pa ndond pa kusal usu wa kwikal nich chikumbu chiwamp nakash nlel unou—kushiken pamwing ap ku kusendol mabaz mavud-mavud mulong wa kwikal nich chikumb chinech—ov, chidiap cha manangu anch twashinshikin pa kushilamu kwa Yehova? Vurik anch Yesu walonda piur pa amwinend anch: “Amiyeu akwet ndond jau ja kulal, niyau atujil akwet yinswal yau, pakwez Mwan a Muntu kakwetap pa kulal ap pa kwiswedishin.” (Luka 9:58) Yesu wading ni ukaliweny ni usu wa kutung ap kwikal nich chikumbu chiwamp nakash chikutwishay muntu kwikal nich. Mulong wak kasalap mwamu? Chimeken patok anch, Yesu wasota kwipuk kampuw ni yom yimulamata yikutwisha kumukangesh kutek Want pa ndond ya kusambish. Ov, tukutwish kulondul chilakej chend ni kulam dis dietu zwang —pakad kutulamat kudi yom ya kumujimbu ni yakamish?—Mat. 6:33, 34.

“KANGOL NI MWAN A MUKOKU AKEZ KADIL PAMWING”

7. Ov, urund ik wadinga pakach pa antu ni annam wayinkishau pa kusambish kudi Yehova?

⁷ Padingay ni kutang, Yehova wayitanga antu kwinsudiel, chom chijim nakash pakach pa midimu yasalay pa divu. Kudi Mwanend kapokal watekay mudi Mwant wa Mudimu, Yehova wamuleja rutong rend ra pakampwil anch: “El tumutanganyap muntu mu chifu chetu, ukufanakana ni yetwetu, chakwel ukez kuyikel pa ansh a mu karung, ni pa atujil a mwiur, ni pa yivam, ni pa annam awonsu a mwisuku, ni yawonsu yikata kwikak pansh.” (Dis. 1:26) Chawiy lel, Adam nenday Ev, ading antu atambula mbil ya kuyikel piur pa annam.

8. Ov, mwikadil wisu ukwetau annam awonsu nlel unou?

⁸ Ov, chitwishikin kudi antu kuyikel padi annam awonsu ni kwikal nau mu chisambu? Antu avud ading mu urund wa piswimp ni annam au, mudi atubu ni atumesh. Ov, chidi nchik piur pa annam a mwisuku? Mukand umwing ulejen anch: “In siyans ashakama mu urund wa piswimp ni annam ni ileja piur pa awiy atana anch annam awonsu akweting yovil.” Chakin kamu, tumening mutapu ukatau annam kwov wom ni ujim anch ayakamish, ov, akutwish kwikal ni yitazukinau antu amwing anch yovil ya pakampwil? Mukand winou udandamedin kulejan anch: “Pakatau kuyilil anau, annam amekeshining mwikadil wau ukash—ukaliweny wau wamushena wa rukat rikash.”

9. Piur pa annam, ov, chom ik tuchingejina anch chikez kukarumuk?

⁹ Chawiy lel tukutwishap kukashimuk pitutangina mu Bibil anch kukez kwikal chisambu pakach pa antu ni annam. (Tang Isay 11:6-9; 65:25.) Ov, mulong wak chisadikinap katat? Vurik anch pabudikay Nowa ni dijuku diend mu waat kupwa kwa Mabeb, Yehova wayileja anch: “Annam awonsu a pansh, . . . akez kukwovang ey wom ni kuzal.” Mulong annam afanyidina kusambish kwiking ayinau. (Dis. 9:2, 3) Ov, Yehova kakezap kudiosh mupak winou wa kumwov muntu wom ni kwakam, chakwel mudimu wayinkishau pa kusambish uwanyina? (Ozey 2:18) Chidi chisu chisangareshina mud ik chiyichingedina antu awonsu akeza kupand mulong wa kushakam pa divu!

“UKEZ KUYIKUSOL MANSOJ MAWONSU”

10. Ov, mulong wak antu awonsu akat kubudishang mansoj?

¹⁰ Pamanay Salomon “kuzengol kusadikina pa mangand,” ndiy wadila anch: “Antu azengodilau ading ni kudil mulong kakwetingap muntu mwin kuyongoj.” (Mul. 4:1) Chidi chilik chimwing ap anch nlel unou kwikil. Ov, nany pakach petu kand kal abudishap mansoj mulong wa diyingish kanang? Chakin, yisu yimwing antu akutwish kubudish mansoj ma musangar. Pakwez, yisu yivud, mansoj malejening patok kusansan kwa muchim.

11. Ov, rusangu ik ra Bibil rikukwatina pakampwil ku muchim?

¹¹ Vurik bil yom yivud yikwatina ku muchim ni yamushena yifundinau mu Bibil. Pafay Sara wadinga ni mivu 127, “Aburaham wateka chidil cha Sara, wamudila nakash.” (Dis. 23:1, 2) Payilejay Nawom amawenend aad adia afu anch wayishakal, “awiy abutula kudil,” ni kupwa “awiy atoya kudil.” (Rut 1:9, 14) Pakwachikay Mwant Ezekias misong ni padingay piswimp ni kufa, ndiy wamulembila Nzamb ni “wadila mansoj nakash,” chinech chamushika chakin kamu Yehova ku muchim. (2 Ant 20:1-5) Ov, nany wakad kwikal ukwatinau ku muchim nich rusangu ra kambuy Pita pamutunay Yesu? Pateshay kutend kwa chikalambol, Pita “wabudika, wasambish kudil mansoj nakash.”—Mat. 26:75.

12. Ov, mutapu ik kutakel kwa Want kukeza kuyongoj antu?

¹² Mulong wa yinship ya mar—yikemp ni yijim—yikata kutushiken, antu akwet chakin kamu kuswir kwa kuyikasikesh ni kuyongoj. Chawiy chikeza kulet Mivu Kanan ya Kuyikel kudi antwend: “[Nzamb] ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan.” (Kuj. 21:4) Chidi chom chamushena mud ik pa kuman anch kukwikalap kand madil, kwishikokin, ni kusansan, mu kushilamu kwa Nzamb mudi kand kumudiosh rawonsu mukankuny mujim wa antu—rufu. Ov, mutapu ik yikeza yom yiney kushiken?

“AFU AWONSU ADIA MWIN NZAY . . . AKEZ KUVUMBUK”

13. Ov, mutapu ik rufu rikala ni usu padi antu kudiosh pasalay Adam chitil?

¹³ Kudiosh pasalay Adam chitil, rufu rayikela mudi mwant padi antu. Ndiy wikala mukankuny mukash, disudiel diakad kutwish kwipuk kudi antu akayitil, musul wa ushon ni kunenganan kupandakena. (Rom 5:12, 14) Mulong “ovil wom wa rufu,” mamiliyon ma antu madi “mu uswik mwom wau wawonsu.”—Heb. 2:15.

14. Ov, chom ik chikeza kushiken anch adiosh rufu?

¹⁴ Bibil ulejen piur pa “mukankuny wa kwisudiel ukez kusheshay [anch] udi rufu.” (1 Kor. 15:26) Kukez kwikal yisak yaad yikutwisha kutambul yiyukish yiney yilejenau ey. Kudi “chisak chipandakena kujimb” chidiaku nlel unou, chitwishikin kupand ni kwandam mu mangand masu ni kuchingejin mwom wa chikupu. Kudi mamiliyon ma antu afila kal, chitwishikin kuvumbuk. Ov, ukutwish kutongin pa musangar ukeza kwikalaku pakeza chisak chinech cha pasak kusankan nich chisak chikwau? Kushinshikin nawamp pa jinsangu jimwing ja kuvumbuk jidia mu Bibil kukutwish kusal anch tusambela kusanger yom yikeza kushiken.—Tang Marko 5:38-42; Luka 7:11-17.

15. Ov, chom ik ukeza kusal anch waman mukatish netu wachirikin ku mwom?

¹⁵ Tongin bil pa mazu “awiy ashimwoka nakash” ni “amushimana Nzamb.” Anch wadingaku pasadika yom yiney, wela pamwing ap kwiyov chilik chimwing. Chikwau kand, kuyiman akatish netu afila kal achirikina ku mwom kusutil ku kuvumbuk kukez kusal anch twikal nich yovil yamushena ya musangar. Yesu walonda anch: “Chisu chikat kwez chikez kuteshau afu awonsu adia mwi nzay dizu dined, chad akez kuvumbuk kwikal kand aom.” (Yoh. 5:28, 29) Kwikil muntu ap umwing pakach petu wamena kal kusadik kwa yom yiney; yikez kwikal chakin kamu yom yimwing yijim nakash pakach pa “yom yakad kumekan.”

NZAMB UKEZ “KUTAKEL YAWONSU”

16. (a) Ov, mulong wak tufanyidin kwisambin nich chirungul piur pa yiyukish yakad kumekan? (b) Chom ik chalonday Paul mulong wa kuyikasikesh in Kristu a ku Korint?

¹⁶ Mwaning, chisu chimwing chamushena chikat kuyichingel antu amekeshina kushinshaman kwau kudi Yehova mu machuku minam makash! Ap anch yiyukish yijim kandikal yimekana, kuyilam mu manangu kukez kutukwash kushinshikin pa yom yidia chakin kamu ya usey ni kwipuk kushadish manangu metu nich yom yipwitina manangu ya ditenchik dined dia yom. (Luka 21:34; 1 Tim. 6:17-19) Pa chisu cha dilejan ni kwifukwil mu dijuku, mu kwambamb ni ambay netu akaritiy, ni mu kwisamb ni in kwilej Bibil ni in kusanger, londany amboku nich chirungul piur pa ruchingej retu ramushena. Chinech chikez kutukwash kulam yom yiney mu manangu ni mu michim yetu. Mwawiy mwasalay kambuy Paul payikasikeshay ambay nend in Kristu. Ndiy wayisenda, ni kuyilej, yom yawonsu yikwatijadina nich Mivu Kanan ya Kuyikel kwa Kristu. Pakish kutongin pa kurumburik kwawonsu kwa mazu ma Paul madia mu 1 Korint 15:24, 25, 28.—Tang.

17, 18. (a) Ov, mutapu ik wadingay Yehova ni “kutakel yawonsu” kwinsambishil kwa rusangu ra muntu? (b) Ov, chom ik chikezay Yesu kusal mulong wa kuchirish uumwing ni kwovijan?

¹⁷ Kwikil mazu mawamp nakash malejena kusadik kwa yom yiney mudi yalonday anch “chad mwamu Nzamb ukez kutakel yawonsu.” Chinech chirumburikin ik? Tongin bil pasak mu Eden, padingau antu awanyidina Adam nenday Ev, mu dijuku dia Yehova dia mangand mawonsu mu kwovijan ni mu chisambu. Yehova Mukaleng wa Mangand Mawonsu, wayikela pa yitang yend yawonsu, angel ni antu. Ading akat kwambamb nend muntu ni muntu, akat kumwifukwil, ni ndiy wading ukat kuyiyukish. Ndiy wading ukat “kutakel yawonsu.”

¹⁸ Urund winou wa piswimp wapwil payibachikau antu chakwel abwambwila ku ukaleng wa Yehova. Pakwez, kudiosh muvu wa 1914, Want wa Mesia wasambishin pakemp-pakemp kuchirish uumwing ni urund winou. (Efes 1:9, 10) Mu Mivu Kanan ya Kuyikel, yom yamushena yidia katat “yakad kumekan” yikeza kwikal yakin. Chawiy chikeza kwez “disudiel,” kupwa kwa Mivu Kanan ya Kuyikel kwa Kristu. Ov, chom ik chikeza kushiken? Ap anch amwinkishin kal “ulabu wawonsu wa mwiur ni wa pansh,” Yesu kakatap kukimbang want bwat. Ndiy kakwetap rutong ra kusend ndond ya Yehova bwat. Nich kwitudish ndiy “ukez kapan Want kudi Nzamb Tatuku.” Ndiy ukez kusadil mwikadil wend wa pakampwil ni ulabu wend mulong wa “kupan uyaj kudi Nzamb.”—Mat. 28:18; Fil. 2:9-11.

19, 20. (a) Ov, mutapu ik ukutwishau antu awonsu akutakelau kudi Want kumekesh anch itiyijin ukaleng wa Yehova? (b) Ov, ruchingej ik rijim rituchingedina?

¹⁹ Kupwa, antu awonsu akeza kwikal mwishin mwa wintakel wa Want pa mangand, akez kuyishikij ku kuwanyin. Akez kulondul chilakej cha Yesu, ni kwitudish ni kwitiy kwa kwisotin ukaleng wa Yehova. Awiy akez kwikal ni chisu cha kumekesh anch asotin kusal mwamu mu kushinshaman pa chirung cha kupakiu kwa nsudiel. (Kuj. 20:7-10) Kupwa, ambwambol awonsu—a ukauntu ni a muspiritu—akez kuyishesh chikupu. Chikez kwikal chisu cha musangar ni cha kuzangijal mud ik! Dijuku didia pa mangand mawonsu dikez kumushiman Yehova nich musangar, ndiy ukeza “kutakel [yom] yawonsu.”—Tang Kuseng 99:1-3.

²⁰ Ov, yom yiney yikez kusadik kurutu mu uyaj wa Want yikubachikinap kutek manangu mey ni usu wey pa kusal rusot ra Nzamb? Ov, ukutwish kwipuk kwikal udimbinau kudi ruchingej ni dikasikesh dia makasu didiokila ku mangand ma Satan? Ov, ukez kukasikesh mupak wey wa kupan ukwash ni kukasikesh ukaleng wa Yehova? Mekesh amboku kusutil ku yisal yey anch usotin kusal mwamu chikupu. Kupwa ukez kusanger chisambu ni mwom uwamp mu mivu kanan—ni kurutu!

[Chipich chidia pa paj wa 16]

Pakezay kupwish mudimu wend mudi Mwant, Yesu ukez nich kwikepish kuchirish Want wend kudi Tatukwend