Mutapu Ukeza Mangand Minam Kushik Kwinsudiel

“Kiudianyap mu mididim chakwel dichuku dined dikukashimwishany mudi mwij.”—1 TES. 5:4.

OV, UKUTWISH KURUMBURIL?

Ov, yom ik yakad kumekan yalejanau mu maverse minam malondwilaku?

1 Tesalonik 5:3

Kujingunik 17:16

Daniel 2:44

1. Ov, chom ik chikeza kutukwash kucha ku mes ni kurish nich yoziu?

YINCHIP yimwing yikash yikez kushiken piswimp ap. Kuwanyin kwa uprofet wa Bibil kulejen ukashinsh wa yom yiney, chawiy lel tufanyidin kucha ku mes. Ov, chom ik chikeza kutukwash kusal mwamu? Kambuy Paul utukasikeshin anch tufanyidin “kutal ku yakad kumekan ku mes.” Mwaning tufanyidin kulam mu manangu difut dietu dia mwom wa chikupu, mwiur ap pa divu. Mudi mulejena verse winou, Paul wafunda mazu minam mulong wa kuyikasikesh ambay nend akaritiy chakwel ashinshikin piur pa yibudikin ya musangar yikezau kutambul mulong wa mwom wau ushinshamena. Kusal mwamu kukez kuyikwash kand chakwel arisha nich yoziu ni kuzengol.—2 Kor. 4:8, 9, 16-18; 5:7.

2. (a) Chakwel twikala nich ruchingej rikash, chom ik tufanyidina kusal? (b) Ov, chom ik tukeza kushinshikin mu mutu wa mulong winou ni ukeza kulondul?

² Chiyul cha Paul chikwet chany chimwing cha usey: Chakwel anch tulama daang ruchingej retu, tufanyidin kutal yom yakad kumekan ku mes yidia kurutu kwetu. Tufanyidin kushinshikin piur pa kurumburik kwa yinship yakad kumekan ku mes. (Heb. 11:1; 12:1, 2) Shinshikinany amboku, yinship dikum yikeza kushiken kurutu yimedina nakash pa ruchingej retu ra mwom wa chikupu.a

OV, CHOM IK CHIKEZA KUSHIKEN KURUTU KWA DISUDIEL?

3. (a) Ov, chom ik chikeza kushiken chilejenau mu 1 Tesalonik 5:2, 3? (b) Ov, chom ik chikezau kusal kudi antakel a chipolitik ni anany akeza kwinung nau?

³ Chom chimwing chikeza kushiken kurutu achilejana kudi Paul mu mukand wayifundinay in Tesalonik. (Tang 1 Tesalonik 5:2, 3.) Ndiy upwitidin manangu piur pa “dichuku dia [Yehova].” Mudi mulejenau pinap, “dichuku dia [Yehova]” dirumburikin chirung chikeza kusambish nich kusheshik kwa relijon wa makasu ni kushik kwi njit ja Harmagedon. Pakwez, kurutu kwa dichuku dia Yehova, antakel a mangand akez kulond anch tukwet “Chisambu ni kwikang!” Yiney yikutwish kwisambin piur pa chinship chimwing ap yivud. Michid yikutwish kutong anch yapwish kal milong yau yikash. Ov, chikwikal nchik piur pa antakel a chirelijon? Niyawiy adi mu mangand, chawiy lel, chitwishikin anch inunga ni antakel a chipolitik. (Kuj. 17:1, 2) Antakel a chirelijon akez kuyilikej aprofet a makasu a mu Yuda wa pasak. Yehova wayileja anch: “Akat kulond anch: ‘Yom yawonsu yiwapil.’ Pakwez kwikil chom chiwamp.”—Jer. 6:14; 23:16, 17.

4. Chinyim ni antu awonsu adia mu mangand, ov chom ik tukata kujingunin?

⁴ Chikalap nchik kulond anch tukwet “Chisambu ni kwikang!” yom yiney yikez kumekesh anch dichuku dia Yehova diasambish kal. Chawiy lel Paul walonda anch: “Anamakwetu in Kristu, kiudianyap mu mididim chakwel dichuku dined dikukashimwishany mudi mwij. En awonsu udiany antu ija yom ya kutok.” (1 Tes. 5:4, 5) Chinyim ni antu adia mu mangand, etu tukat kujingunin kurumburik kwa Mukand wa Nzamb piur pa yinship yikata kushiken. Ov, mutapu ik ukeza chakin kamu kuwanyin uprofet winou piur pa kulond anch tukwet “Chisambu ni kwikang!”? Tufanyidin kuchingel ni kuman. Pakwez, tufanyidin kusal usu wa “kuchish ku mes ni kubabal.”—1 Tes. 5:6; Sof. 3:8.

“MWANT MBAND” WASHADISHA DILAU DIEND

5. (a) Ov, mutapu ik makeza “mar mapandikena” kusambish? (b) Ov, “mwant mband” ik ukeza kushesh dilau diend dia kupand?

⁵ Ov, yinship ik yakad kumekan yikeza kwikalaku? Paul walonda anch: “Pakez kulondau antu anch tukwet ‘Chisambu ni kwikang,’ pawiy pinipa kamu kusheshik kukez kuyikashimwish.” Chom cha kusambish chidi “kusheshik [kwa] kuyikashimwish” ap kurish nich “Babilon Mujim,” marelijon mawonsu ma makasu, matazukinau anch “mband wa kusochik.” (Kuj. 17:5, 6, 15) Kushesh marelijon mawonsu ma makasu, kuwejaku ni Kristendom, kukez kwikal disambishil dia “mar mapandakena.” (Mat. 24:21, TMK; 2 Tes. 2:8) Kudi antu avud, chinship chinech chikez kwikal cha kukashimwish. Ov, mulong wak? Mulong pa chinech, mband wa kusochik ukeza kwiman amwinend mudi “mwant mband” kakezap ‘kudil rufu, bwat.’ Pakwez ukez kujingunin kapamp kamwing anch ndiy washadishin dilau diend dia kupand. Pakwez akez kumushesh swa kapamp kamwing, “dichuku dimwing.”—Kuj. 18:7, 8.

6. Ov, nany ukeza kumushesh relijon wa makasu?

⁶ Dizu dia Nzamb dilejen anch mband wa kusochik akez kumushesh kudi “nnam wa chidiany” ukweta “misengu dikum.” Dilejan dia buku wa Kujingunik dilejen anch nnam wa chidiany udi Nations Unies (UN). “Misengu dikum” yirumburikin winyikel wawonsu wa chipolitik umukasikeshina “nnam [winou] usuz.”b (Kuj. 17:3, 5, 11, 12) Ov, mutapu ik ukeza kushiken kusheshik kwinoku? Michid ya UN yikez kubuu mapit ma mband wa kusochik, kumekesh patok untu wend wakin, kumudia, ni “akumwosh kasu.” Kusheshik kwend kukez kwikal kwa nsudiel.—Tang Kujingunik 17:16.

7. Ov, chom ik chikeza kumubachik “nnam wa chidiany” chakwel asa njit?

⁷ Uprofet wa Bible ulejen kand chom chikeza kumubachik chakwel amwasa njit jinej. Chimeken anch Yehova ukez kutek mu michim ya anyikel a chipolitik “kusal rusot rend,” ra kumushesh mband wa kusochik. (Kuj. 17:17, TMK) Relijon usotina njit udandamedin kulet kanvundangesh mu mangand; chawiy lel, michid yikutwish kwiyov anch kumushesh mband wa kusochik kuwapidil mulong wa kuwanyish yisakin ya michid yau. Pakwez, pakezau anyikel kwas njit, awiy akez kutong anch awanyishin “rusot” rau ayinau. Pakwez, chikumekan patok anch akat kuyisadil kudi Nzamb chakwel ashesha marelijon mawonsu ma makasu. Chawiy lel, mu mutapu wamushena, chikunku chimwing cha ditenchik dia Satan chikez kwas njit ku chikunku chikwau, ni Satan kakutwishap kukangesh mwikadil winou.—Mat. 12:25, 26.

KURISH NJIT NI ANTU A NZAMB

8. Ov, Njit ik jikezau kusal kudi “Gog, mwant uyikedila . . . mwin ngand ya Magog”?

⁸ Kupwa kwa kusheshik kwa relijon wa makasu, atushalapol a Nzamb, akez kumekan anch adi “zong nich chisambu” ni pakad “mpwembu.” (Ezek. 38:11, 14) Ov, chom ik chikeza kushiken chisak chinech cha antu chimekena mudi chidi chakad diking chidandamedina kumwifukwil Yehova? Chimeken anch akez kuyas njit kudi “yisak ya amasalay a usu.” Dizu dia Nzamb dilejen njit jinej mudi njiy jikwasay “Gog, mwant uyikedila . . . mwin ngand ya Magog.” (Tang Ezekiel 38:2, 15, 16.) Ov, mutapu ik tufanyidina kuman njit jinej?

9. (a) Ov, rutong ik ra pakampwil rikwetay mwin Kristu? (b) Ov, yom ik tufanyidina kusal katat mulong wa kukasikesh ritiy retu?

⁹ Kwijik kurutu kwa chisu piur pa njit jinej pantaliken ni antu a Nzamb kufanyidinap kutwakamish nakash. Pakwez, rutong retu ra pakampwil rifanyidinap kwikal kukolik kwetu, tufanyidin kutongin piur pa kutumbishiu kwa dijin dia Yehova ni kuchidij ukaleng wend. Chawiy lel, Yehova walonda tupamp 60 ni kusut anch: “Akushalap aom akez kwitiy anch am nidi [Yehova].” (Ezek. 6:7) Chikwau kand, tuchingejin nakash kuwanyin kwa uprofet winou wa Ezekiel, nich ruchingej anch “[Yehova] wij mutapu wa kuyikamunin mu mar antwend atumbila.” (2 Pita 2:9) Katat, tusotin kusadil chisu chawonsu tukweta, mulong wa kukasikesh ritiy retu chakwel tutwisha kulam ukashinsh wetu kudi Yehova chikalap nchik yoziu yikutwisha kutushiken. Ov, chom ik tufanyidina kusal? Tufanyidin kulembil, kwilej Dizu dia Nzamb, kutongijokin pa dizu dined, ni kulejan rusangu ra Want kudi antu akwau. Kusutil ku kusal mwamu, tulamin daang ruchingej retu ra mwom wa chikupu, mudi chom chikata “kuchidij.”—Heb. 6:19; Kus. 25:21.

MICHID YIKEZ KUMWITIYIJ YEHOVA

10, 11. Ov, chom ik chikeza kumekesh kusambish kwa Harmagedon, ni chom ik chikeza kwikalaku pa chisu chinicha?

¹⁰ Ov, yom ik yamushena yikeza kusadik pakezau kuyas njit atushalapol a Yehova? Yehova, kusutil kudi Yesu ni chisak chend cha mwiur cha amasalay, ukez kuyikol Antwend. (Kuj. 19:11-16) Njit jiney jawiy jikeza kwikal “njit [ja] pa dichuku dijim dikurumburishay Nzamb Mwin Dikand Diawonsu”—ap anch Harmagedon.—Kuj. 16:14, 16.

¹¹ Piur pa njit jiney, Yehova ulejen kusutil Ezekiel anch: “‘Nikez kumuzadish mwant Gog nich mar ma mitapu yawonsu.’ Yam [Yehova] Nsalejey nalondila. ‘Antwend akez kutapijan ayinau nich jimpak jau ja musamun.’” Pakezau kwov wom, antu adia ku mutambu wa Satan akwikal mu kanvundangesh ni akusambish kujipijan ayinau—isalay ni isalay. Pakwez, kusheshik kwinou kukez kumushiken ni Satan amwinend. Yehova ulejen kand anch: “Kasu ni mayal makasu yikez kumuwil ndiy [Gog] ni yisak yend ya amasalay ni amasalay amichid yivud adiay nend.” (Ezek. 38:21, 22) Ov, chibudikin ik chikeza kwikalaku kusutil ku chisal chinech cha Nzamb?

12. Ov, michid akez kuyibachik kusal ik?

¹² Michid yikez kujingunin anch kusheshik kwau kudiokil kwi mbil ja Yehova amwinend. Chawil lel, mudi in Idjibit a pasak adinga ayilondwila in Isarel pa Karung Usunz, amasalay a Satan akez pamwing ap kudil nich wom ukash anch: “[Yehova] uyirishidin kuyipompat in Idjibit”! (Kub. 14:25) Mwaning michid yikez kumwitiyij Yehova ku usu. (Tang Ezekiel 38:23.) Tudi piswimp mud ik ni kusambish kwa yinship yiney?

KWIKIL USU UKWAU WA MANGAND UKEZA KULANK

13. Ov, chom ik twija piur pa chikunku cha nsudiel cha chirumbidij chilejenau kudi Daniel?

¹³ Uprofet udia mu buku wa Daniel utukwashin kwijik pisu tudia mu kusut kwa chisu. Daniel ulejen chirumbidij cha muntu chikweta yikunku ya utad kushalijan. (Dan. 2:28, 31-33) Chirumburikin ma usu ma mangand malondulijadina madinga ni usu ukash padi antu a Nzamb, pasak ni nlel unou. Ma usu minam madi Babilon, Mediy ni Peris, Grek, Rom—ni kupwa, pa chirung chetu, usu ukwau wa mangand. Dilejan dia uprofet wa Daniel dimekeshin usu winou wa nsudiel wa mangand mudi yidjatil ni miny ya ku mend. Mwinjit ja I ja Mangand Mawonsu, Grande-Bretagne nenday États-Unis ata urund umwing wa pakampwil. Mwaning, chikunku cha katan cha chirumbidij chamanay Daniel udi Winyikel wa Dikand dia Mangand Mawonsu dia Angleterre ni in Amerik. Yidjatil yidia chikunku cha nsudiel cha chirumbidij, yimekeshin anch kwikil kand usu ukwau wa mangand mawonsu wa antu ukez kwikalaku. Chikwau kand, yidjatil ni miny yidia chikunku cha utad ujal, chikunku chikwau cha kam yimekeshin kuziy kwa Winyikel wa Dikand dia Mangand Mawonsu dia Angleterre ni in Amerik.

14. Ov, usu ik wa mangand mawonsu ukeza kuyikel pakeza kushik Harmagedon?

¹⁴ Uprofet winou ulejen anch Want wa Nzamb, ufanikeshinau nich diyal dijim diadiokala ku mukandu wa ukaleng wa Yehova mu muvu wa 1914. Diyal dined disejin katat piswimp ni chom chifanyidinay kushesh—yidjatil ya chirumbidij. Ku Harmagedon, yidjatil ni yikunku yikwau ya chirumbidij akez kuyishesh. (Tang Daniel 2:44, 45.) Chawiy lel, Winyikel wa Dikand dia Mangand Mawonsu dia Angleterre ni in Amerik ukez kwikal uchidi usu uyikedila mangand mawonsu pakeza kushik Harmagedon. Chikez kwikal chom chamushena mud ik pa kupan uman wa kuwanyin kwawonsu kwa uprofet winou!c Ov, chom ik chikezay Yehova kumusal Satan amwinend?

MUTAPU UKEZAU KUMUSAL MUKANKUNY MUJIM WA NZAMB

15. Kupwa kwa Harmagedon, ov, chom ik chikeza kuyishiken Satan ni ayilembil end?

¹⁵ Chakusambish, Satan ukez kwimen amwinend mutapu ukezau kusambish ni kupwish kushesh ditenchik diend diawonsu didia pa divu. Kupwa, akez kushinshikin katat padiay Satan amwinend. Kambuy Yohan ulejen yom yikwau yikeza kushiken. (Tang Kujingunik 20:1-3.) Yesu Kristu—“mwangel . . . ukwet nfungul ya dibuku diakad musul”—ukez kumukwat Satan nau ayilembil end, ni kuyidjibul mu dibuku diakad musul, ni kuyilam mwinimwa ni pakupwila mivu kanan. (Luka 8:30, 31; 1 Yoh. 3:8) Chisal chinech chikez kurumburik nzau ja kusambish ja kumuchany nnak ku mutu kwend.d—Dis. 3:15.

16. Ov, chom ik chikeza kurumburik kudi Satan kumudjibul mu “dibuku diakad musul”?

¹⁶ Ov, “dibuku [ik] diakad musul” mukezau kumudjibul Satan nau ayilembil end? Dizu dia Grek aʹbys·sos diasadilau kudi Yohan dirumburikin anch “kulep nakash ap kupandakan kulep.” Adikarumwin kand anch “wakaad kwijikan, wakad nsudiel,” ni “kwi ndond kwakad disudiel.” Chawiy lel, kudi kwindond kulemp nakash nich antu awonsu amwitiyijina Yehova ni mwangel wend watekay ukweta “nfungul ya dibuku diakad musul.” Kwinikwa, Satan ukez kwikal mu mwikadil wakad kwikalaku mudi rufu “chakwel kakutwishap kuyidimb in michid kapamp kakwau.” Chakin kamu, “ntambu [winou] wonyina” akez kumufung!—1 Pita 5:8.

YINSHIP YITWADILA KU CHIRUNG CHA CHISAMBU

17, 18. (a) Ov, yinship ik yidia kand yakad kumekan twashinshikina kwinsambishil? (b) Kupwa kwa yinship yiney, ov, chirung ik tukeza kusanger?

¹⁷ Yom ya usey ni yinship yamushena yidi kurutu kwetu. Tutadil kurutu chakwel tumana mutapu ukezau antu kulond anch tukwet “Chisambu ni kwikang!” Kupwa tukupan uman wa kusheshik kwa Babilon Mujim, njit jikezay kwas Gog wa Magog, njit ja Harmagedon, ni kumudjibul kwa Satan nau ayilembil end mu dibuku diakad musul. Kupwa kwa yinship yiney, pakezau kuyishesh antu ayimp awonsu, tukez kwandam mu chikunku chisu cha mwom—Mivu Kanan ya Kuyikel kwa Kristu, mutukeza kusanger “kuvul kwa chisambu.”—Kus. 37:10, 11.

¹⁸ Kuwejaku ku yinship yitan twashinshikina kwinsambishin, kudi kand “yom [yikwau] yakad kumekan” yitusotina “kutal ni mes metu.” Tukez kushinshikin pa yinship yiney mu mutu wa mulong wambakedina.

[Mazu madia kwishin kwa paj]

[Kamushet/​Yipich chidia pa paj wa 9, 10]

YINSHIP YITAN YIKEZA KUSHIKEN:

1 Kulond anch tukwet “Chisambu ni kwikang!”

2 Michid yikez kumwas njit ni kumushesh “Babilon Mujim”

3 Kuyipompat antu a Yehova

4 Njit ja Harmagedon

5 Satan nau ayilembil end akuyidjibul mu dibuku diakad musul