Yilay Yidia Piswimp ni Kusadik

ANCH mwingang umwing wa kubarilan watek program wa kusal mudimu umwing ukash pa mujimbu wey, ov ukwiyov nchik anch watesh anch kandikal asalangap kubarilan kwa mutapu winou? Chakin kamu ukwov wom. Pakwez, chikwikal nchik anch watesh anch dokter winou ukat kuyitakelang in kubarilan akwau asadila nend pamwing ni anch watwishin yitot ni yitot ya kubarilan kwa chilik chimwing? Ov, ukezap kwikal nich ruchingej anch ukez kukukwash?

Mangand mayedina mutudia nlel unou maswiridin “mwingang wa kubarilan” mukash. Kusutil ku Dizu diend, Bibil, Yehova Nzamb washilamu anch ndiy ukez kuchirish Paradis pa divu dined. (2 Pita 3:13) Pakwez, chakwel anch yiney yishikena, antu ayimp akez bil kuyidiosh awonsu. (Kuseng 37:9-11; Jinswir 2:21, 22) Mikadil yawonsu yiyimp tumena nlel unou afanyidin kuyidiosh kurutu kwa kuchirish paradis. Chilay chikez kusadik chakwel yom yiney yishikena!—Kujingunik 21:4, 5.

Atuman a Yehova itiyijin anch kukarumuk kwinoku kukash kukez kwikalaku. Mulong wak? Mulong yilay yasalay kal Yehova Nzamb yimekeshin anch ndiy ukwet usu wa kuwanyish kushilamu kwend. Ilikej yilay musamban yafundau mu Bibil ni kushilamu kupaninay mulong wa machuku ma kurutu.

Ukutwish kudandamen kwilej piur pa kushilamu kwa Bibil mulong wa machuku ma kurutu. Pakudila ritiy rey, ni ruchingej rey rikez kukul—ruchingej ra kushakam pa chisu ukeza kutan yiyukish yidiokila ku yilay yikezay Yehova kusal.

[Kamushet/​Yipich chidia pa paj wa 7]

CHILAY:

YESU WADISHA TUNAN TWA ANTU NICH MABOT NI ANSH AKEMP.—MATEU 14:13-21; MARKO 8:1-9; YOHAN 6:1-14.

KUSHILAMU:

“Divu diasongisha mabuj mend. Nzamb, Nzamb wetu ukatuyukish.”—KUSENG 67:6.

KURUMBURIK KUDI ETU:

KWIKIL MUNTU UKEZA KUMAN KAND MAR MA NZAL.

CHILAY:

YESU WASALA ANCH AMPUTAMES ASAMBISHA KUMAN.—MATEU 9:27-31; MARKO 8:22-26.

KUSHILAMU:

“Mes ma amputames makez kaburik, ni matu ma atujikamatu makez kajukuk.”—ISAY 35:5.

KURUMBURIK KUDI ETU:

AMPUTAMES AWONSU AKEZ KUMAN.

CHILAY:

YESU WAYOKA AYIBID.—MATEU 11:5, 6; YOHAN 5:3-9.

KUSHILAMU:

“Ayishet akez kamatok mudi atubaj.”—ISAY 35:6.

KURUMBURIK KUDI ETU:

AKWETA ULIM WAWONSU WA KUMUJIMBU AKEZ KUYOK.

CHILAY:

YESU WOKA MAYEJ KUSHALIJAN.—MARKO 1:32-34; LUKA 4:40.

KUSHILAMU:

“Kwikil muntu ap kusu umwing ushicha mwi ngand yetu ukeza kinan kand mulong wa kuyel.”—ISAY 33:24.

KURUMBURIK KUDI ETU:

MAYEJ MAWONSU MALETINA ULIM AKEZ KUMADIOSH. TUKEZ KWIKAL NICH UKASH WA KUMUJIMBU UWANYIDINA.

CHILAY:

YESU WAPWISHA MAR MA YITANGIL.—MATEU 8:23-27; LUKA 8:22-25.

KUSHILAMU:

“Awiy akez katung yikumbu ni kushakamamu ni ayinau. Akez kadim yir ya mitond ya nviny ni kudia mabuj mau. Midimu yau yawonsu yikusalau yikez kawanyin.”—ISAY 65:21, 23.

“Nikez kakukasikesh. Nikez kakuchidij kudi in kukuzengol, ni ampopol.”—ISAY 54:14.

KURUMBURIK KUDI ETU:

MAR MA CHITANGIL MAKWIKALIKUP KAND.

CHILAY:

YESU WAYIVUMBULA AFU.—MATEU 9:18-26; LUKA 7:11-17.

KUSHILAMU:

“Afu awonsu adia mwi nzay . . . akez kuvumbuk.”—YOHAN 5:28, 29.

“Karung wabudisha afu adingamu. Rufu ni ndond ya afu niyau abudisha afu adingamu. Awonsu ayirumburish mudi mwading yisalijok yau.”—KUJINGUNIK 20:13.

KURUMBURIK KUDI ETU:

AKATISH NETU AFILA KAL AKEZ KUYIVUMBUL.