Ov, Ukutwish Kwitiyij Yilay Yafundau mu Bibil?
ANCH akulejin rusangu rimwing ramushena, ov ukinakin wa muntu wakulejina rusangu riner ukutwishap kusal anch witiyija ap bwat rusangu riner? Ukinakin winou ukezap kwimen kusu pa mutapu ulejenay rusangu riner pakwez ukwimen kand pa uyakin wa rusangu rend. Kupwa kand, anch mu mivu yivud ukat kukulejang ching kusu uyakin ni kakatap kukudimbang kapamp ap kamwing, ukwikal nich mayingish mawamp ma kwitiyij yom yikulejinay katat.
Chilik chimwing nich yilay yafundau mu Bibil. Kwikil muntu pakach petu wadingaku pasadika yom yiney. Pakwez tukutwish kuman anch rusangu ra Bibil ridi rakin—ap anch ridi chakin kamu uyakin. Ov, mulong wak? Kudi kand yom yivud yimekeshina ukinakin wa rusangu ra yilay yifundinau mu Bibil.
Yilay yivud ayisala ndond yidia antu avud. Tunan twa antu twayimana, ap ma miliyon ma antu mashikena ku kuman yilay yiney. (Kubudik 14:21-31; 19:16-19) Kayisalap mu ujindj bwat, ap kulemp ni antu.
Yilay yamekana kusutil ku kuswapej kwau. Kiyadingap mulong wa kuyisangaresh antu, ap kwimekesh kudi antu awonsu. Yisu yivud, yilay yafundau mu Bibil ayisala pakad kuchingejin, ni antu amwing ita ukwash. (Marko 5:25-29; Luka 7:11-16) Mu mitapu yiney katenchikap yom kusutil ku kusal chilay.
Kasalap yilay mulong wa kwitutul, katumb, ap kwikal ayinau ampich bwat. Pakwez, yasadika mulong wa kumushiman Nzamb. (Yohan 11:1-4, 15, 40) Antu asala usu wa kutambul mapit kusutil ku yilay yiney ayifisha nich.—2 Ant 5:15, 16, 20, 25-27; Midimu 8:18-23.
Yilay kushalijan yilejanau mu Bibil yimekeshin anch yadingap kusu yisal ya antu bwat. Chilakej, aninetisha karung ni rinkind, mem amakarumuna mikal nviny, imika ruval ni kumunakish, ayoka ayej, amputames asambisha kuman. Yilay yiney yawonsu ni yikwau yivud yimekeshin anch kudi usu umwing upandakenamu usu wa muntu wasala anch yilay yiney yawonsu yisadika.—1 Ant 17:1-7; 18:41-45; Mateu 8:24-27; Luka 17:11-19; Yohan 2:1-11; 9:1-7.
Ap akankuny amana yilay yiney katadikap anch yasadikap bwat. Pamuvumbulay murund nend Lazar, akankuny a Yesu a chirelijon katadikap piur pa kufa kwa Lazar. Ov, awiy asala nchik? Lazar wasala machuku manying mwi nzay. (Yohan 11:45-48; 12:9-11) Ap anch pasuta yitot ya mivu kupwa kwa rufu ra Yesu, antu afunda Talmud wa in Yuda adandamena kwitiyij anch Yesu wading ni usu wa kusal yilay. Awiy atadika ching kusu piur pa musul wa usu winou. Chilik chimwing, payitwalau in kwilej a Yesu ku dirumburish dia in Yuda, awiy kayipulap anch “Ov, wasalanya chilay?” Pakwez ayipula anch: “Kusutil ku usu ik ap ku dijin ik wasalanya yom yiney?”—Midimu 4:1-13.
Chawiy lel, ov, ukutwish kwitiyij anch Bibil utulejin piur pa yilay? Kwambatan nich yom twamena, chimeken patok anch rusangu ra Bibil piur pa yilay rikwet uman umwing wa kashinsh. Kudi mayingish makwau masadila anch tuchingejina mu jinsangu jinej ja Bibil. Chilakej, pakatay Bibil kwisambin pa chinship kanang, ukat kutulej chisu, ndond, ni majin ma antu isambidinau. Ap akankuny a Bibil ashimwoka pa kuman ukinakin wa rusangu rend, mutapu ufundinau kachom ni kachom mu Bibil. Yitot ya mauprofet ma Bibil yawanyina, ap mu tuyom tukemp nakash, kachom pa kachom. Chikwau kand, Bibil ukwet yiyul yivud yikutwisha kusal anch urund wa antu wikala wa musangar—yiyul yiney yayikwasha antu a chimbu chawonsu cha mivu ni akweta mikadil kushalijan. Mu urund wa antu, yiyul yidia mu Bibil yamekana anch yidi ya ukwash kupandakanamu yiyul yawonsu.
Anch kandikal wikala nich ruchingej rikash mudiay Bibil, mulong wak ukutwishap kwitekin chisu cha kumushinshikin nakash? Anch wapandikesh ronganyin ra Bibil, ruchingej rey ra Bibil rikez kupandakan. (Yohan 17:17) Ukez kuman anch ukutwish kuchingejin mu yom yikatay kukulej piur pa yilay yasadika pasak. Anch wasambish kwitiyij mu jinsangu jinej, ukez kwikal nich mifulandal yiwamp ya kuchingejin pa yom yilejenay Bibil anch yikeza kusadik mu machuku ma kurutu.
[Chipich chidia pa paj wa 5]
Akankuny a Yesu katadikap kufa kwa Lazar