Ov, Yilay Yitwishikin Chakin Kamu?—Yom Yisatu Yitadikinau Antu Avud

KUTADIK KWA 1: Yilay yitwishikinap kusadik mulong yikat kujiril yijil ya chitangil. Kutesh kwetu kwa yijil ya chitangil kwimedin pa yom yimenau in siyans anch yikat kushiken mu mangand. Pakwez, yijil yiney yiding chilik chimwing ni yijil ya gramer ya kwilej nich rudim—yikutwish kwikal yom yimwing ya pakampwil ku chijil chinech. Kutesh kwetu kwa “yijil” yiney kukutwish kwikal ni mupak. (Job 38:4) Mwin siyans wipanina kal ukutwish kusutish mwom wend wawonsu mu kwilej chijil chimwing cha chitangil. Pakwez yiney yawonsu yikwet chom chimwing “cha pakampwil” kudi ndiy, kushinshikin nawamp pa ronganyin rend ra chijil chinech. Mudi mukatau kulond anch, “Anch kusu kazau mujal umwing wakangany chidiap chakin kulond anch atuzau awonsu ading atok.”

Rusangu risipishena rimekeshining anch chiswapel kwitiyij yom yakad kuwanyin. John Locke (1632-1704) walejana rusangu rend piur pa Dutch ntimesh wa ngand ya Hollande ni mwant wa Siam: Pisambinay piur pa ul wend, Hollande, kudi mwant, ntimesh winou walejana anch ndjamb ukez kwendil pa mem. Mwant walika chitongijok chinech ni wamana anch ntimesh winou wading ukat kumudimb. Pakwez, ntimesh winou wisambina pa chom chimwing chadinga kand kal chimushikena mwant. Mwant kadingap wija anch pa chisu chikez mem kwikwat mikal diyal mulong wa mashik, ndjamb ukutwish kwendin pa mayal minam. Chinech chamekana kudi mwant anch chikutwishap kusalik mulong ndiy kadingap ni uman wawonsu.

Shinshikin bil yom yimwing yasalau katat yamekana anch yikutwishap kusadik pasutin kal dikum dia mivu:

● Avion ukutwish kusend antu 800 ni kusut pakad kwiman kudiokal ku New York kushik ku Singapour ni kusal a kilometre 900 pa saa umwing.

● Yikumangan yisadinau ku televizion yiyikwashin antu adia mu jingand kushalijan chakwel isamba muntu ni muntu umumen mukwau.

● Tunan twa miminy akat kututek mu kamushet kakemp kupandakanamu mushet wa alimet.

● Mwingang wa kubarilan ukutwish kumutek muntu rudung ap chikunku chikwau cha mujimbu.

Ov, chom ik tukutwisha kulond piur pa yom yiney? Tukutwish kulond anch: Anch antu akutwish kusal yom yamekana anch yikutwishap kusadik mu mivu yikemp yasutina, chimeken chakin kamu anch Nzamb watanga mangand mawonsu ni yom yawonsu yidiamu ukutwish kusal yom yamushena yitwakad kutwish kutesh nawamp ap kurumburil katat.a—Disambishil 18:14; Mateu 19:26.

KUTADIK KWA 2: Bibil ulejen yilay mulong wa kuyibachik antu chakwel itiyija. Bibil katulejinap kwitiyij yilay yawonsu. Pakwez, chidia chinyim chidi chakin. Bibil utubabeshin anch tufanyidin kubabal nakash pitukata kuchingejin mu yilay ni yisal ya kushimokish. Shinshikin pa kubabesh oku kwovikena patok: “Pakwezay Muyimp, ukez kwikal nich ukash wa Sakudimban, chad ukez kusal yilay ya mitapu yawonsu ni yishimushimu ya makasu.”—2 Tesalonik 2:9, 10.

Yesu Kristu wapana kand kubabesh anch antu avud akez kulond anch akat kumulondul pakwez kakezap kwikal in kumulondul akin. Amwing akez kand kumulej anch: “Nsalejetu, Nsalejetu! Twalejana dizu dia Nzamb mu dijin diey, twadiosha ayilembil avud mu dijin diey, twasala kand yilay yivud mu dijin diey!” (Mateu 7:22) Pakwez Yesu walonda anch ndiy kakezap kuyitiyij antu inay akat kumulondul bwat. (Mateu 7:23) Chimeken patok anch, Yesu kafundishap anch yilay yawonsu yidiokil kudi Nzamb bwat.

Nzamb kayilejap in kumwifukwil end anch ateka ritiy rau ching kusu pa yilay. Pakwez, ritiy rau rifanyidin kwimen nakash pa yom ya kashinsh.—Hebereu 11:1.

Chilakej, shinshikinany amboku, chilay chimwing chijikena nawamp pakach pa yilay yafundau mu Bibil, kuvumbuk kwa Yesu Kristu. Mivu yivud yasutina kupwa kwa chinship chinech, in Kristu amwing in Korint asambisha kwipul anch Yesu wavumbuka ap bwat. Mutapu ik wayikwashay kambuy Paul in Kristu inay? Ov, ndiy wayileja ching kusu anch “Ikalany nich ritiy rikash”? Bwat. Tal mutapu wayivurisha yom mutapu yasadika. Ndiy walonda anch Yesu “amujika, chad . . . ndiy wavumbuka wikal kand mwom mudi mufundilau mu Mukand wa Nzamb. Chad kwinyim kwa kuvumbuk, ndiy wamekana kudi Pita ni kudi atwimbuy awonsu dikum ni aad. Chad wamekana kapamp kamwing kudi in kwitiyij yitot yitan ni kusuta, antu inay avud achidi aom.”—1 Korint 15:4-8.

Ov, chading cha usey kudi in Kristu inay kwitiyij mu chilay chinech? Paul udandamedin kulejan anch: “Anch Kristu kavumbukap kwikal kand mwom, komb etu tukat kurumburil kwetu mazu ma Nzamb chamwamu, niyen kand ukat kwitiyijany kwen chamwamu.” (1 Korint 15:14) Paul wamana anch mulong winou wading wa usey nakash. Ap anch chilay cha kuvumbuk kwa Yesu chading chakin ap bwat! Ni Paul wading wij anch chilay chinech chading chakin mulong watesha uman wa yitot ya antu imena ayinau nich mes mau adingaku pa chisu chinicha. Chawiy lel, atuman inay itiya ap kufa pa ndond pa kutadik yom yimenau ni mes mau.—1 Korint 15:17-19.

KUTADIK KWA 3: Yilay yidi kwau yom yisadikina mu yitangil yakad kutesh nawamp kudi antu akad kwilej. In kwilej amwing apakishin kurumburil anch yilay yidia mu Bibil yidi kwau yinship ya chitangil yikata kushiken pakad chikas cha Nzamb. Awiy atongin anch chinech chisadil anch itiyija nakash rusangu ra Bibil. Anch chidi chakin anch yom yisadikina mu chitangil yikutwish kusadik pamwing nich yilay yimwing—mudi kuzal kwa divu, yipupu, ni kuwa kwa divu—kurumburil kwinoku kudiap kwau kwa chilik chimwing. Kukat kutadik chisu cha yilay chilejenau mu Mukand wa Nzamb.

Chilakej, antu amwing alonda anch chipupu cha kusambish chaletau pa Idjibit, kukarumun kwa mem ma Wit wa Nil chakwel mikala mash, kwading chakin kamu chibudikin cha divu disuz diadingau ni kudjibul mu mem ma Nil, pamwing ni yom yisuz yadinga mu mem. Pakwez, rusangu ra Bibil rilondin anch mem ma wit amakarumuna kwikal mash, kidiadingap divu disuz. Kutang kwa kushinshikin kwa Kubudik 7:14-21 kumekeshin anch chilay chinech chasadika pa chisu chabulay Aron mukombu wend pa mem ma wit wa Nil ku umutakel wa Moses. Ap anch kukarumuk kwa mem ma wit kwadiokala ku kushiken kwa yom ya chitangil, pa chisu chabulay Aron mukombu pa mem ma wit chading achinach chilay!

Mudi chilakej chikwau cha usey cha chisu cha chilay, tushinshikin yom yashikena padingau in Isarel piswimp ni kwandam mu Mangand ma Kushilamu. Njil yau ya kusutil yading yijikinau kudi Wit wa Yordan wadinga wizwila nich mabeb. Rusangu ra Bibil ritulejin yom yasadika anch: “Pashikau antu ading asendina Mushet ku Yordan, mend ma in kupesh madjata ku chikum. Mem mading ni kukurumuk mwiyand kudiokal mwi mpat mimana tunta, chintampu chilemp djat ni ku Adam.” (Joshua 3:15, 16) Ov, chinech chadinga chibudikin cha kuzal kwa divu ap kuwa kwa divu? Rusangu rilejenap chom. Pakwez chisu chasadika chinship chading chilay. Chasadika chakin kamu chisu chalonday Yehova chifanyidina kusal.—Joshua 3:7, 8, 13.

Chawiy lel, ov, kupwa kwa yiney kudi yom mudi yiney yisadikina mudi yilay? Bibil ulondin anch yidiaku. Kwambatan ni yitulejinay, yiney yidiap kusu yinship ya chitangil. Chakin, kupwa, ov, choviken kulond anch chitwishikinap yinship yiney kushiken mulong kusu anch yikatap kushikenang dichuku ni dichuku?

[Dizu didia Kwishin kwa paj]