“Kiwijanyap Dichuku Ap Chisu”

“Chawiy, babalany, mulong kiwijanyap dichuku ap chisu.”—MAT. 25:13.

OV, MUTAPU IK UKUTWISHA KWAKUL?

Ov, mitapu ik yimwing tukata kutaninamu yiyukish ya kuburen kwijik dichuku ap chisu cha disudiel?

Mutapu ik ukatau azizidilau many kudandamen kucha ku mes?

Ov, mu mitapu ik tukutwisha kumekesh anch tudi tayad mulong wa kwez kwa Kristu?

1-3. (a) Ov, mikadil ik yimekeshina manans maad malejanau mu yishimu ya Yesu? (b) Ov, ku yipul ik tuswidina kwakul?

TONGIN bil anch mukurump umwing udia piur wakwit chakwel umutwala nich motak ku chikumangan chimwing cha usey nakash. Chisu chikemp kurutu umusenda chakwel uya nend ku chikumangan chinech, wajingunin anch mu motak wey mwikil kasarony uwanyidina mulong wa weny. Usotin kusal yom swaa chakwel ulanda kasarony. Piusadila mwamu, mukurump washik. Ndiy watalol pakwez kakumenap. Kupwa wamwit muntu mukwau chakwel amutwala. Kupwa wachirik waman anch mukurump wayankal wakusha. Ov, mutapu ik ukutwisha kwiyov?

² Katat tongin bil anch udi mukurump ni watonda antu asatu ija mudimu chakwel asala midimu yimwing ya usey. Wayirumburil mutapu wa kusal mudimu winou, ni awonsu asatu itiyij kwa kwisotil. Kupwa, piuchirikina chisu chikwau, waman anch antu aad kusu awiy asala mudimu wau. Chikwau kand, muntu walikang kusal mudimu wasambish kwit dilikishin. Pakwez kapakishangap kusal ap kusu kapamp kamwing. Ov, mutapu ik ukutwisha kwiyov?

³ Mu yishimu yend piur pa ayangadim akad kal kwachik ni ya matalent, Yesu wasadila mikadil mudi yiney mulong wa kulejan mulong wak mu machuku mansudiel in Kristu amwing azizidilau many akeza kumekesh anch adi ashinshamena ni akweta manangu, pakwez akwau bwat.a (Mat. 25:1-30) Ndiy wakasikesha mulong winou palonday anch: “Chawiy, babalany, mulong kiwijanyap dichuku ap chisu”—ap chisu chikezay Yesu kulet dirumburish dia Nzamb pa mangand ma Satan. (Mat. 25:13) Tukutwish kusadil chiyul chinech nlel unou. Ov, mutapu ik tukutwisha kutaninamu mu kucha ku mes, mudi mwatukasikeshay Yesu kusal? Ov, anany amekesha anch adi tayad mulong wa kukolik? Ni chom ik tufanyidina kusal chakwel kucha ku mes?

CHIYUKISH CHIDIOKILA KU KUCHA KU MES

4. Ov, mulong wak ‘kucha ku mes’ kurumburikinap kutal ku saa?

⁴ Mijikit yimwing, mudi kusal mu chapu, kuya ku mutal dokter, ap kwendin mu mwotak wa transport, kwitin kulimish program. Mu mijikit yikwau, mudi kujimish kasu, ap kuyikwash antu anch mar ma chitangil mashiken, kutal ku saa kukutwish kwikal mudi kampuw, kuyip, ap ubaj. Mu mikadil mudi yiney, chidi cha usey nakash kushinshikin pa mudimu tukweta pa ndond pa kutal ching kusu pa program. Pashejina piswimp ditenchik dined dia yom, mudimu wa kushinshikin pa yom yiletinay Yehova mulong wa kukolik udi wa usey nakash. Kucha ku mes mudi mufanyidinau in Kristu kusal kurumburikinap kutal pa saa bwat. Pakwez, kudi mitapu yitan mu tukutwisha kutaninamu yiyukish kusutil ku kuburen kwijik dichuku ni chisu chikeza kwez disudiel.

5. Ov, mutapu ik kuburen kwijik dichuku ni chisu kutukwashin kumekesh yidia mu muchim wetu?

⁵ Cha kusambish, kuburen kwijik kwetu chisu chikeza kushik disudiel kutukwashin kumekesh chidia chakin kamu mu muchim wetu. Chawiy lel, kuburen kwijik kutwinkishin kalimish, kutukwashin kusadil want ipau wetu mu kumekesh kushinshaman kwetu kudi Yehova. Ap anch tuchingejin kupand kwinsudiel kwa ditenchik dined, tukat kumusadil Yehova mulong tumukatin, tumusadidilap ching kusu mulong wa kutambul mwom. (Tang Kuseng 37:4.) Tusangaredin mu kusal rusot rend, ni tumen anch Nzamb utufundishin chakwel tutaninamu ayinetu yiyukish. (Isay 48:17) Bwat, yijil yend kiyikasikenap nakash kudi etu.—1 Yoh. 5:3.

6. Pitukata kumusadil Nzamb nich rukat, mutapu ik ukatay kwiyov ni mulong wak?

⁶ Chiyukish cha kaad cha kuburen kwijik dichuku ni chisu chidi anch tukwet chisu cha kusangaresh muchim wa Yehova. Pitukata kumusadil mulong tumukatin—pakad kusal mulong wa dichuku ap mulong wa difut kampand—tupanin ukwash kudi Yehova ku kwakul ku chipul cha kufish nich kwa makasu kwamufishau nich kudi mukankuny nend, Satan. (Job 2:4, 5; tang Jinswir 27:11.) Anch twashinshikin pa kusansan ni mar maletay Djabul, tukasikeshin nich musangar ukaleng wa Yehova ni kulik umutakel uyimp wa Satan.

7. Ov, mulong wak utongin anch kwikal nich mwom wa kwipan kudi kuwamp?

⁷ Cha kasatu, kusal kwetu pakad kwikal nich dichuku kanang mu manangu kutukasikeshin kwikal nich mwom wa kwipan. Antu amwing akad kumwijik Nzamb nlel unou itiyijin niyawiy mudi mutwija anch mangand makezap kulab. Mulong akwet wom wa mar mamwing makeza kushiken, akwet chitongijok ech: “Tudiany, tunany, mulong diamashik tukufany kwetu.” (1 Kor. 15:32) Ku mutambu ukwau, etu twovilap wom. Tulikin kwiyauril kudi akwau ni kwisotil rusot retu ayinetu. (Jinsw. 18:1) Pakwez, tukat kwidiul ayinetu ni kusadil kwa kwisotil chisu chetu, usu wetu, ni yom yikwau mulong wa kulejan rusangu ruwamp ra Want wa Nzamb kudi antu akwau. (Tang Mateu 16:24.) Tusangaredin kumusadil Nzamb, pakampwil kusutil ku kuyikwash antu akwau chakwel ashikena ku kumwijik.

8. Ov, chilakej ik cha Bibil chilejena mulong wak tufanyidin kumuchingejin nakash Yehova ni Dizu diend?

⁸ Chiyukish cha kanying chidiokila ku kuburen kwetu kwijik dichuku ap chisu chidi anch mwikadil winou utukwashin kumuchingejin nakash Yehova ni kusal usu wa kusadil Dizu diend mu mwom wetu. Chom chimwing chijikena nakash mu mwikadil wetu wa untu wa chitil udi chibachikin chetu cha kwichingejin ayinetu. Paul wayileja in Kristu awonsu anch: “Chifanyidin muntu mwawonsu utongila anch: ‘Niminy daang mu ritiy,’ ababal, chamwamu ukuwa.” Kupwa kwa Yoshua kuyitwal antu a Nzamb mwin Ngand ya Kushilamu, antu tunan makum maad ni tusatu ashadisha dilau dia Yehova. Paul ulondin anch “yom yiney yawonsu . . . ayifunda mulong wa kutubabesh nich etu. Mulong etu tudi piswimp ni disudiel dia mangand.”—1 Kor. 10:8, 11, 12.

9. Ov, mutapu ik yoziu yikutwisha kututokish ni kutushejish piswimp ni Nzamb?

⁹ Mutapu wa katan mutukutwisha kutaninamu yiyukish ya kuburen kwijik chisu chikeza kushik disudiel usadil anch mar ma katat matukasikesha. (Tang Kuseng 119:71.) Machuku ma nsudiel ma ditenchik dined madi “ma mar nakash.” (2 Tim. 3:1-5) Antu avud adia mu mangand ma Satan atukisin, chawiy lel akutwish kutupompat mulong wa ritiy retu. (Yoh. 15:19; 16:2) Anch twitudish ni twakimb umutakel wa Nzamb mu yoziu yiney, ritiy retu rikez kwikal ritenchikinau ap kwikal zwang mudi kusutil ku kasu. Tufanyidinap kulik. Pakwez, tukez kushej piswimp ni Yehova mudi mutwakad kutongin.—Jak. 1:2-4; 4:8.

10. Ov, chom ik chisadila anch chisu chimekana mudi chisutin swaa?

¹⁰ Chisu chisutina chikwet mupak. Anch tukwet midimu yivud ya kusal ni twipan nakash pa ndond pa kutal ku saa, chisu chikutwish kumekan mudi chisutin swaa. Chilik chimwing, anch twipan nakash mu mudimu wamushena watwinkishau kudi Yehova chakwel tusala, dichuku ni chisu chinech yikutwish kushik pakad etu kuchingejin. Pa chinech, azizidilau many avud atushila chilakej chimwing chamushena. Chirikinany amboku mu wiswimp pa yom yashikena kupwa kwa kumutek Yesu mudi Mwant mu 1914 ni talany mutapu wamekeshau antu amwing anch ading tayad pakwez akwau bwat.

AZIZIDILAU MANY AMEKESHIN AYINAU ANCH ADI TAYAD

11. Kupwa kwa muvu wa 1914, mulong wak azizidilau many amwing ashikena ku kulond anch Mwant wading ulabin?

¹¹ Vurik yishimu yalejanay Yesu piur pa ayangadim akad kal kwachik ni ya matalent. Anch ayangadim inay ap aswik isambinau mu yishimu yiney ading ija chisu chikezay kushik Mwant wa mudimu ap ngatan, awiy kelap kwikal nich kuswir kwa kucha ku mes. Pakwez, awiy kijikap, chawiy chasala anch ikala nich kuswir kwa kwikal tayad. Ap anch azizidilau many ading achingedin mu dikum dia mivu muvu wa 1914 mudi muvu umwing wa pakampwil, pakwez kadingap ija nawamp chom chela kwez kushiken. Pamanau anch yom yasadikap mudi mwadingau achingejin, chamekana mudi anch Ngatan wading ulabin. Mukadivar umwing wavurika anch, “Antu akemp pakach petu atonga nakash anch tukez kuya mwiur pa rubing ra kusambish ra Mwinkind [1914].”

12. Ov, mutapu ik wamekesha azizidilau many ayinau kushinshaman ni kubabal?

¹² Tongin bil mutapu chela kuziyishan pa kuchingejin anch disudiel diezin ni kupwa diezinap! Chikwau kand, akadivar arisha nich rupompat radiokala kwi Njit ja Mangand Mawonsu ja I. Kupwa kwikala chisu chakad kusal, mudi cha tul. Pakwez mu muvu wa 1919, ayitazuka chakwel alanka! Yesu weza mu tempel wa muspiritu wa Nzamb, ni chisu cha kusop chawanyina. Pakwez antu amwing awa mu kusop kwinoku ni kupwa ashadisha chisend chau cha kudandamen mu “yisakin” ya Mwant. (Mat. 25:16) Chamekana mudi kadingap nich mushiku wa kuwejaku kand many mau ma muspiritu, mudi ayangadim ayisup. Mudi kashalapol muyimp, awiy kasotap kwipan ayinau mulong wa yisakin ya Want. Pakwez, azizidilau many avud, amekana kwikal ashinshamana daang ni ading nich rusot rikash ra kumusadil Mwant ap pa chisu cha mar ma njit.

13. Ov, chisak cha kashalapol chasala nchik kupwa kwa muvu wa 1914, nich chom ik chisadinau nlel unou?

¹³ Kupwa kwa muvu wa 1914, Chinong cha Kalam chalejana patok anch: “Akadivar, antu adia pakach petu akweta chitongijok chiwamp pantaliken ni Nzamb kakatap kuziy mulong wa yitenchik Yend yawonsu yikwatinay. Tusotinap kusadik kwa rusot retu ayinetu bwat, chawiy lel pitwamana anch twading twidimbina piur pa yom twadinga tuchingejina mu Mwinkind wa muvu wa 1914, twasangara anch Mwant kakutwishap kuswimp yom yatenchikay kal mulong wa kutusangaresh. Tusotinap anch asala mwamu. Tusotin ching kusu kutesh nawamp yom yitenchikinay ni jintong Jend.” Azizidilau many a Mwant akwet ni nlel unou mwikadil winou wa kwitudish ni kwipan. Kakatap kwimekeshang mu kulond anch ayipepidil kudi spiritu, pakwez akwatin kal mupak wa kutakel “yisakin” ya Mwant pa divu. Ni katat “chisak chipandakena kujimb” cha “amikoku akwau,” in Kristu akweta ruchingej ra kushakam pa divu, akat kwimburij kucha kwau ku mes ni mushiku wau.—Kuj. 7:9; Yoh. 10:16.

IKALANY AYINEN TAYAD

14. Ov, mutapu ik kutulamina kulamat kudi antu asadidilay Nzamb mulong wa kupan ya kudia ya muspiritu?

¹⁴ Mudi musadinau kudi in Kristu azizidinau many, yid ya chisak chipandakena kujimb yilamatin kudi antu atekay Nzamb mulong wa kupan yakudia ya muspiritu. Mudi chibudikin, chimeken mudi anch akat kuwejaku ku many ma muspiritu madiokila ku Dizu dia Nzamb ni ku spiritu wend. (Tang Kuseng 119:130; Yohan 16:13.) Patambwilau dikasikesh dined, niyawiy amekeshin ayinau anch adi tayad mulong wa kuchirik kwa Kristu, ni kudandamen kusal ap mu yoziu yikash. Chilakej, mu rukan rimwing ra in Nazi, akadivar ading cha kusambish ni kopi umwing wa Bibil. Chawiy lel asambisha kulembil chakwel atambula yakudia ya muspiritu. Kupwa ayileja anch kudi mukadivar umwing mwin rukan watwisha kwandjik mu udjindj ma nimero mamwing masu ma Chinong cha Kalam mu rukan kusutil ku kumajindjik mu mwend wend wa dibay. Umwing wa pakach pa apanda, Mukadivar Ernst Wauer, walejana anch: “Yehova watukwasha mu mutapu umwing wamushena chakwel tulama mu manangu yitongijok yimwing yikasikeshina yadinga mu mitu ya milong.” Kupwa ndiy walonda kand anch: “Nlel unou, chiswapel nakash kutambul yakudia ya muspiritu, ov, tudandamedin kuyisanger? Nikwet ruchingej anch Yehova ukwet yiyukish yivud yikatay kuyilamin antu akata kumuchingejin, ashinshamena, ni adila ku mes mend.”

15, 16. Ov, mutapu ik watambulau ambay amwing a uruw yiyukish mulong wa mushiku wau, ni chom ik ukutwisha kwilej kusutil ku yom yiney yashikena?

¹⁵ Amikoku akwau niyawiy asadin mudimu ukash mu mudimu wa Mwant, mu kuyikwash nakash anamakwend a Kristu. (Mat. 25:40) Chinyim ni kashalapol muyimp, ukweta usweral wa mu chishimushimu cha Yesu, awiy asotin kwipan nakash ni kusal usu wau mu kutek bil yisakin ya Want pa ndond ya kusambish. Chilakej, payitazukau, Jon nenday Masako chakwel akapana ukwash mu teritwar mulondiau rudim ra a chinois, pa kusambish asota kulik. Pakwez, kupwa kwa kushinshikin mikadil yau mu malembil, ashikena mu kukwat mupak wa kuya kwinikwa.

¹⁶ Awiy atambula yiyukish yivud mulong wa usu wau wasalau. Alonda anch: “Kunoku, mudimu wa kulejan udi chom chamushena.” Asambisha kutakel malejan sambwad ma Bibil. Yom yivud yamushena yashikena. Awiy ashikena ku kulond anch, “Tumujikitishin Yehova dichuku ni dichuku mulong wa kutukwash chakwel twikala kunoku.” Pakwez, kudi kand akadivar ni anambaz akwau amekesha mupak wau wa kusal nakash mu mudimu wa Nzamb chikalap nchik chisu chikeza kwez disudiel. Tongin bil pa tunan twa antu ileja ku Shikol ya Gilead ni asambisha mudimu wa umishoner. Mulong wak tukutwishap kushinshikin pa mudimu winou wa pakampwil kusutil ku kutang mutu wa mulong “ Nous faisons de notre mieux ! ” wafundau mu Chinong Cha Kalam cha Mwinkind 15, 2001, mu Français? Piukeza kutang rusangu riner ramushena piur pa dichuku dimwing mu mudimu wa umishoner, tongin bil piur pa mitapu ukutwisha kusadil chakwel kuwejinaku ku mudimu wey wa kumushiman Nzamb ni mudi chibudikin, musangar wey.

DANDAMEN NIYEY KUCHA KU MES

17. Ov, kuburen kwijik dichuku ap chisu chidi chiyukish mutapu ik?

¹⁷ Chimeken patok anch, kuburen kwetu kwa kwijik dichuku ni chisu cha disudiel dia ditenchik dined kwikala chiyukish kudi etu. Pa ndond pa kwakam ap kuziy, tumen ayinetu anch tudi piswimp ni Yehova, Tatukwetu wa rukat, pitukata kwipan mulong wa kusal rusot rend. Kudandamen kukwat rukasu mu chikas chetu, ap kulejan, ni kwipuk kampuw kukez kutuletin musangar nakash mu mudimu wa Mwant wetu.—Luka 9:62.

18. Ov, mulong wak tusotinap kulik ritiy retu?

¹⁸ Tushejina kal piswimp nakash ni dichuku dia dirumburish dia Nzamb. Kwikil muntu pakach petu usotina kumwovish Yehova ap Yesu kuyip. Awiy atwinkisha chisend chimwing chamushena cha mudimu mu machuku minam ma nsudiel. Tusangaredin mudi ik ruchingej rikwetau mud etu!—Tang 1 Timote 1:12.

19. Mutapu ik tukutwisha kwirijek yisu yawonsu?

¹⁹ Ap anch ruchingej retu ridi ra kwikal nich mwom mwiur ap mu Paradis pa divu, tusalany usu wa kushal ashinshamena mu mudimu wetu watwinkishau kudi Nzamb wa kulejan ni kwikadish in kwilej. Ni katat twijap dichuku ap chisu chikeza kwez dichuku dia Yehova, ni ov, tuswiridin chakin kamu kwijik? Tukutwish ni tukez kudandamen kwirijek yisu yawosu. (Mat. 24:36, 44) Tukwet ruchingej anch, anch twadandamen kumuchingejin nakash Yehova ni kutek Want wend pa ndond ya kusambish, tukezap kuziy bwat.—Rom 10:11.

[Dizu didia Kwishin kwa paj]

[Chipich chidia pa paj wa 26]

Ap mu mikadil yikash, kimb yakudia ya muspiritu

[Chipich chidia pa paj wa 27]

Chisu chisutin swa pitukata kushinshikin pa mijikit ya win Kristu