Yehova Uyikumangejin Antwend Akweta Musangar

“Yikumangejany antu, amakundj, ni amband, ni an, ni ngez.”—KUV. 31:12.

MUTAPU IK UKUTWISHA KWAKUL?

Ov, mutapu ik chitwishikina kulond anch yitentam yadinga yom yimwing yamushena mu rusangu ra antu a Yehova?

Ov, usu ik wasalau in Isarel avud a pasak mulong wa kukumangan ku misambu mu Yerusalem?

Ov, mulong wak ufanyidinap kuburen chitentam?

1, 2. Ov, mikadil ik ya yitentam ya uteokras tufanyidina kushinshikin?

YITENTAM ya mangand mawonsu ni ya distrikt yikadil kal yinship mu rusangu ra katat ra Atuman a Yehova yikutwishau kuvurik kudi antu avud pakach petu. Antu avud pakach petu akumangana ku yinship yiney yisangareshina, pamwing ap ku yitentam yivud mu dikum dia mivu.

² Pasutin kal tunan twa mivu, antu a Nzamb niyawiy atenchika yitentam yitumbila. Tukez kwisambin piur pa yom yimwing yalejanau mu Bibil piur pa yitentam yisadikina nlel unou, tukuman yom yidia chilik chimwing pakach pa yitentam ya pasak ni yisadikina nlel unou, ni kushinshikin pa yiyukish tutambwila kusutil ku kukumangan ku yitentam yiney.—Kus. 44:1; Rom 15:4.

YITENTAM YAMUSHENA, YA PASAK NI YA KATAT

3. (a) Ov, yom ik yadingau ni kusal ku yitentam ya kusambish ya antu a Yehova yilejanau mu Bibil? (b) Mutapu ik wadingau ni kuyitazuk in Isarel chakwel akumangana pamwing?

³ Kukumangan kwishin kwa Mukandu wa Sinay kwading kukuman kujim nakash kwa kusambish kwa antu a Nzamb mulong wa kutambul malejan ma muspiritu mafundinau mu Bibil. Chading chakin kamu chinship chamushena mu rusangu ra difukwil diakin. Pa chisu chinech chamushena, pakad kuyivuramen antu akumangana, Yehova wayileja in Isarel usu wend payinkishay Chijil chend. (Kub. 19:2-9, 16-19; tang Kubudik 20:18; Kuvurik Yijil 4:9, 10.) Chinship chinech chamekesha mutapu wadingay Nzamb kuyibangin in Isarel. Kupwa, Yehova watenchika mutapu wa kuyitazuk antwend. Ndiy wamuleja Moses anch asala jimpuny jaad ja utad wa argent, jikezau kusadil mulong wa kutazuk “chisak chawonsu” chakwel chikumangana “ku chis cha mwinkand wa kukumangen.” (Kuch. 10:1-4) Tongin bil piur pa mutapu yadinga yinship yiney yisangareshina mud ik!

4, 5. Ov, mulong wak yitentam yasalay Moses nenday Joshua yading ya usey pakampwil?

⁴ Kwinsudiel kwa mivu 40 yashakamau in Isarel mwi mpay, pa chisu chimwing chikash mu rusangu ra muchid winou usu, Moses wayikumangeja ambay nend in Isarel. Padingau piswimp ni kwandam mwi Ngand ya Kushilamu. Chading chisu chiwanyidina kudi Moses cha kuyivurish anamakwend yom yawonsu yasalay Yehova mulong wa awiy ni yawonsu yikezay kuyisadil.—Kuv. 29:1-15; 30:15-20; 31:30.

⁵ Pamwing ap pa chitentam chinech chimwing, Moses wisambina piur pa kukumangan pakad kujing ni kuyilej antu a Nzamb. Mu mivu ya kwiswedish pa chisu cha Musambu wa Ankunku, amakundj, amband, an, ni aeny adinga mu Isarel ading akat kuyikumangej pa ndond jatonday Yehova ‘chakwel niyau atesha, ileja kumwov [Yehova] Nzamb wau wom chakwel kand alama ni kusadil mazu mawonsu ma yijil yend.’ (Tang Kuvurik Yijil 31:1, 10-12.) Chawiy lel, kwinsambishil kwinoku kwa rusangu ra antu a Nzamb, chimeken patok anch awiy afanyidina kukumangan chisu ni chisu mulong wa kutesh dizu dia Yehova ni rutong rend. Papwishau in Isarel kukwat Ngand ya Kushilamu, awiy ading ayinyingumwokin kudi michid yakad kumwijik Nzamb, Joshua wayikumangeja in Isarel awonsu nich rutong ra kukasikesh mupak wau wa kushal ashinshamena kudi Yehova. Kupwa, antu achipa kumusadil Nzamb.—Jos. 23:1, 2; 24:1, 15, 21-24.

6, 7. Mutapu ik chitwishikina kulond anch yitentam ya katat ya antu a Yehova yadinga ni yinship yijim-yijim?

⁶ Mu rusangu ra katat ra antu a Yehova, kwading kand yitentam yimwing yamushena—yinship yimwing yamekesha kuya kurutu kwa mijikit ya uteokras ap ronganyin ra Mukand wa Nzamb. (Jinsw. 4:18) Chitentam chimwing chijim cha kusambish cha in Kwilej Bibil chasadika kupwa kwa Njit ja Mangand Mawonsu ja I mu muvu wa 1919 ku ul wa Cedar Point, Ohio, mu États-Unis. Ku chitentam chinech kweza antu 7 000, ni kwasambisha kampany umwing wa kulejan pa mangand mawonsu. Mu muvu wa 1922, ku chitentam cha machuku chidivu pa ndond yiney yimwing, Josef F. Rutherford wakasikesha nakash mujikit winou, wayileja in kukumangan ading amuteshina anch: “Ikalany antu ashinshamena ni atuman akin a Mwant. Yangany kurutu mwi njit djat ni pakeza kwikal Babilon mudi mwi mpay. Lejanany uruu kwindond yawonsu. Mangand mafanyidin kwijik anch Yehova udi Nzamb ni Yesu Kristu udi Mwant wa Want. Dined didi dichuku dipandikenamu machuku mawonsu. Mwant wasambish kal kuyikel! Udiany antwend. Chawiy lel, lejanany, lejanany, lejanany, Mwant ni want wend.” Antu akumangana, ni antu a Nzamb adia mu mangand mawonsu, asangara nakash pa kutesh mazu minam.

⁷ Mu Columbus, ku ul wa Ohio, mu muvu wa 1931, in Kwilej Bibil itiyija nich musangar dijin dia Atuman a Yehova. Kupwa mu muvu wa 1935, mu Washington, Mukadivar Rutherford wajingunina “chisak chipandiken kujimb,” chalejanau mu Kujingunik anch “iminy kurutu kwa nkwas ni kurutu kwa Mwan a mukoku.” (Kuj. 7:9-17, TMK) Mu muvu wa 1942, mukach mwa Njit ja Mangand Mawonsu ja II, Nathan H. Knorr wasal diskur dimwing diamushena dilondina anch “ La paix de demain — sera-t-elle de longue durée ? ” Ndiy wisambina piur pa “nnam usuz” wa Kujingunik 17 ni kulond anch kukez kwikal chisu cha kulejan nakash kupwa kwa njit jinej.

8, 9. Ov, mulong wak yitentam yimwing yamekana kwikal yamushena pakampwil?

⁸ Chom cha pakampwil chasadika ku Chitentam cha Uteokras ku ul wa Cleveland, mu Ohio mu muvu wa 1946, chadinga diskur diasalay Mukadivar Knorr dilondin anch “ Problèmes de reconstruction et d’expansion. ” Pasangaray nakash mulong wa diskur dined diamushena, muntu umwing pakach pa in kukumangan wafunda anch: “Nading nich chisend cha kwikal kwinyim kwend pa chimet urel winiwa, ni padingay ni kulejan piur pa mudimu wa kulejan ni kurumburil mutapu wa kujimbish Betel ni chikumbu cha kuchapin ma buku mu Betel wa Brooklyn, antu akumangana adandamena kubul nkash tupamp tuvud. Ap anch muntu kelap kutwish kuman nawamp chifu kudiosh ku chimet, chading chiswapel kuman musangar wau.” Ku chitentam chimwing cha mangand mawonsu chasadika mu ul wa New York mu 1950, antu asangara pa kutambul Les Écritures grecques chrétiennes — Traduction du monde nouveau (mu Inglish), Bibil wafundau wa kusambish mu rudim ra katat wachirisha dijin dia Nzamb pa ndond pafanyidina mu Dizu diend.—Jer. 16:21.

⁹ Ku yitentam kwayikumangejay Yehova Atuman end ashinshamena kupwa kwa chisu cha rupompat ni kupwa kwa kujidik yikala kand yikash. Adolf Hitler wachipa kuyishesh Atuman a Yehova adinga mu Allemagne, pakwez antu 107 000 pakach pau izwisha ndond yadingay pasak kukumangej amasalay end mu ul wa Nuremberg ku chitentam cha muvu wa 1955. Antu avud pakach pa antu akumangana katwishap kwimik kudil kwau mulong wa musangar! Pakach pa antu 166 518 akumangana ku yitentam yadinga ni mutu wa mulong “ La piété ” yitentam yasalau mwi ngand ya Polonge mu muvu wa 1989 kwading antu avud adiokala ul wading utazukinau anch Union soviétique ni Tchécoslovaquie, ni akwau adiokala ku jingand jikwau ja mwi Mputu wa Kwingangel. Kudi antu amwing akumangana kading kapamp kau ka kusambish ka kukumangan kwa antu a Nzamb 15 ap 20 ni kusut. Tongin bil pa musangar wadingaku mu muvu wa 1993 ku Chitentam cha Mangand Mawonsu “ L’enseignement Divin ” chasadika mu Kiev, mu Ukraine, kwabatishau antu 7 402—uvud upandakena nakash wa antu abatishau kal ku chitentam pakach pa Atuman a Yehova.—Isay 60:22; Hag. 2:7.

10. Ov, yitentam ik yiukata kuvurik pakampwil, ni mulong wak?

¹⁰ Kwading pamwing ap yitentam yimwing ya distrik ap ya mangand mawonsu yashala mu manangu mey. Ov, uvurikin chitentam chey cha kusambish ap pamwing ap ku chitentam watambwila dibatish? Yiney yading yinship yimwing yamushena ya muspiritu kudi ey. Yikwata nich usey nakash yitentam yiney yakad kuvuramen!—Kus. 42:4.

YISU YA MUSANGAR

11. Ov, ditenchik ik diatekay Nzamb piur pa misambu ya pa muvu ni muvu mu Isarel wa pasak?

¹¹ Yehova wita anch in Isarel akumangana mu Yerusalem mulong wa misambu yisatu ya pa muvu ni muvu—Musambu wa Mabot Makad Chivish, Musambu wa Mbing (watazukau anch Pentekot), ni Musambu wa Ankunku. Pa chinech, Nzamb wayileja anch: “Amakundj ey awonsu akez kwimekeshang kurutu kwa [Yehova] Nsalejau tupamp tusatu pa muvu.” (Kub. 23:14-17) Pamanau anch misambu yiney yading ni usey umwing ujim nakash wa muspiritu, mitu yivud ya majuku yakumangana ni majuku mau mawonsu.—1 Sam. 1:1-7; Luka 2:41, 42.

12, 13. Ov, kukumangan ku misambu ya pa muvu kwarumburika chom ik kudi in Isarel avud?

¹² Tongin bil pa kurumburik kwa weny winou kurutu kwa dijuku dia in Isarel. Chilakej Josef nenday Mariy afanyidina kusal a kilometre 100 mwinjil ya kudiokal ku Nazaret kushik ku Yerusalem. Ov, utongin anch awiy ela kusal a saa inch mu weny winou, wa kwend ni an akemp? Rusangu rilejena mutapu wayay Yesu ku Yerusalem padingay nsand rimekeshin anch antu adia mu dijuku dimwing ni arund chitwishikin asala weny winou pamwing. Awiy amana chisu cha kusal weny ni kwisuk pamwing ni kutenchik ndond ya kulal mwi ndond yakad kwijidin kudi awiy. Chikwau kand, kwadingap ubaj wa kwel anch nsand wa mivu 12 mudi Yesu ikala kwend ni want ipau kanang. Tongin bil mutapu yadinga yom yiney yikasikena kuvuramen, pakampwil kudi ansand!—Luka 2:44-46.

¹³ Papalanganau in Isarel pol pa mimbu ya ngand jau, antu akumangana ku misambu yiney adiokala ku michid yivud. Pa Pentekot wa muvu wa 33 C.C., in Yuda ni antu akarumuka akasa weny wa kuya ku Yerusalem kudiokal ku jingand mudi Itali, Libi, Kret, Aziy, ni Mesopotamy.—Mid. 2:5-11; 20:16.

14. Ov, mutapu ik watambulau in Isarel yiyukish yidiokila ku misambu ya muvu ni muvu?

¹⁴ Kudi in Isarel ashinshamena, chom chijim ni cha kushinshikin chading mwikadil wa muspiritu wa ma weny minam—kumwifukwil Yehova nich mushiku pamwing ni tunan twa antu asangera misambu. Ov, chinech chela kwikal ni usu ik padi in kukumangan? Chakwel chikutwish kwikal mu umutakel wa Yehova wapanay kudi antwend piur pa Musambu wa Ankunku anch: “Ukez kusangerany ku musambu wen, en ayinen, ni anen amakundj, ni anen amband, ni atushalapol en, ni amilomb en, ni in Levi, ni aeny, ni an anshon, ni adiaafu ashicha mu misumb yen. Mu machuku sambwad ukez kusalany musambu wa [Yehova] Nzamb wen pa ndond yatonday kal ndiy. [Yehova] Nzamb wen ukez kukuyukishany mu yakwangul yen yawonsu, ni mu midimu yen yawonsu ya makas, chakwel wez wizulany nich musangar.”—Kuv. 16:14, 15; tang Mateu 5:3.

OV, MULONG WAK TUSANGAREDIN YITENTAM YA KATAT?

15, 16. Ov, usu ik wasala chakwel ukumangana ku yitentam? Mulong wak usu winou udi wa usey nakash?

¹⁵ Yitentam yiney ya pasak yiletina yilakej yiwamp nakash mud ik kudi antu a Nzamb nlel unou! Ap anch yom yivud yakarumukin mu yitot ya mivu, pakwez yitentam yidandamedin kwikal ya usey. Pa chisu cha Bibil, antu adinga ni kwipan nakash chakwel kukumangan. Antu avud asadin chilik chimwing nlel unou. Mwaning, yiyukish yitambwilau yipandakenamu usu wawonsu ukutwishau kusal. Yinship yiney yading—ni yidandamedin kwikal—yisu ya usey nakash ya muspiritu. Yitwinkishin jinsangu ja usey nakash chakwel tulama urund wa piswimp nakash ni Nzamb. Yitentam yitubachikin kusadil yom tukata kwilej, ni yitukwashin kwipuk milong, ni yitukasikeshin kushinshikin pa yom ni yisakin yikeza kutukasikesh pa ndond pa kutuziyish.—Kus. 122:1-4.

¹⁶ Musangar chidi chom chimwing chikata kumekanang pakach pa in kukumangan. Rapor umwing wafundau piur pa chitentam chasadika mu muvu wa 1946 ulejen anch: “Chading chom chamushena pa kuman tunan tuvud twa atuman twashakamang kal nawamp, ni chisangareshin nakash pa kutesh antu avud awangina nich musangar miminy ya Want mulong wa kumushiman Yehova.” Rapor winou walejana kand anch: “Departema wa Midimu ya in Kwipan wafunda majin ma antu a kusal mudimu pakach pa in kukumangan, ikundj mwawonsu amuteka ku departema nich musangar wa kuyisadil ambay nau atuman.” Ov, wasangarap kal mwamu niyey ku yitentam ya distrik ap ya mangand mawonsu?—Kus. 110:3; Isay 42:10-12.

17. Ov, mutapu ik wakarumunau mutapu wa kutenchik yitentam nlel unou?

¹⁷ Yom yimwing ya karumukin mu mutapu wadingau ni kutenchik yitentam. Chilakej, antu amwing pakach pa antu a Nzamb avurikin chisu kwadinga yitentam ya machuku chinan! Kwading yikunku ya pamanch, ya muten, ni ya urel. Mudimu wa chingand wading ni wawiy chikunku cha program. Yikunku yikemp yadinga ni kusambish pamanch pa muten wa chidivu, ni kwading yikunku yiyila djat ni uchiku pa muten wa chidivu kand. In kwipan asalanga mudimu ukash pa chisu chilemp mulong wa kwisuk yakudia mulong wa in kukumangan. Nlel unou program ukweta machuku makemp ma chitentam, kwisuk yakudia kurutu kwa chisu kudi muntu ni muntu mu dijuku diend, kuyikwashin antu avud kutesh nawamp program mwawonsu wa yakudia ya muspiritu.

18, 19. Ov, mikadil ik ya yitentam uchingejina kurutu, ni mulong wak?

¹⁸ Yisu yimwing yikash ya chitentam yiding yikunku ya program wa mangand mawonsu. “Yakudia [ya muspiritu] pa chisu chiwanyidina,” yikat kutukwash kutesh nawamp uprofet ni malejan ma Bibil, kusutil ku ma diskur ni ku mikand yisu yipaninau ku yitentam yiney. (Mat. 24:45) Mikand yiney yikat kuyikwash antu a kashinsh chakwel asangera uyakin wa Bibil. Dram wamushena wimedina pa Bibil ukat kuyikasikesh ansand ni amakurump chakwel ashinshikin pa yibachikin yau ni ilama nich yibachikin yiyimp yidiokila ku yitongijok yiyimp yidia mu mangand. Diskur dia dibatish ni diawiy ditukwashin kutongijokin pa yom ya usey mu mwom ni kwikal nich musangar wa kuman mutapu umekeshinau antu akwau kwipan kwau kudi Yehova.

¹⁹ Mwaning pakach pa yom yivud ya difukwil dishitwila, yitentam yikat kuyikwash antu a Yehova akweta musangar chakwel amusadila mu mutapu uwanyidina mu yisu ya mar. Yikumangan yiney yikasikeshin muspiritu, yiletin yisu ya kwikal ni arund asu, yitukwashin kusanger uumwing wa akadivar pa mangand mawonsu, ni kusutil yikumangan yiney Yehova ukat kuyiyukish ni kuyilam antwend. Chakin kamu, muntu ni muntu pakach petu ukez kusal usu wa kwirijek chakwel akumangana ni atana yiyukish yidiokila ku chikunku ni chikunku cha chitentam ni chitentam.—Jinsw. 10:22.

[Chipich chidia pa paj wa 30]

Chitentam cha mangand mawonsu, chasadika mu New York mu muvu wa 1950

[Chipich chidia pa paj wa 32]

Mozambique

[Chipich chidia pa paj wa 32]

Corée du Sud