‘El Dijin dia Nzamb Aditumbish’
1. Ov, wisu mutu wa mulong wa program wa chitentam cha munyingumuku wa muvu wa mudimu wa 2012, ni wimedin pa chom ik?
1 Dilau mudi ik twitapidila kal dia kulejan dijin dia Mwant mwin Mangand, Yehova! Nzamb amwinend ndiy watwijikisha dijin diend chakwel tudilejan, ni pakampwil kudiosh mu muvu wa 1931, etu Atuman a Yehova atwijika kusutil ku dijin diend. (Isay 43:10) Mwan kapokal a Nzamb, Yesu, wakasikesha dijin dia Nzamb nich usey ujim, ni waditeka pa ndond ya kusambish mu malembil mend ma sampul. (Mat. 6:9) Mazu mapanay Yesu mawiy mimedina pa mutu wa mulong wa program wetu wa chitentam cha munyingumuku cha muvu wa mudimu wa 2012. Mutu wa mulong udi anch: ‘El Dijin dia Nzamb Aditumbish.’
2. Ov, jinsangu ik tukeza kuchingejin?
2 Chom Tukeza Kutesh: Diskur da Diampos, dikwet mutu wa mulong ulondina anch “Kwijikish Dijin dia Nzamb Mudi Atushalapol a Chisu Chawonsu” dikez kwisambin mulong wak mudimu wa chisu chawonsu yidi njil yisangareshina mu mwom. Tukez kutesh kand sempozium ukweta mutu wa mulong ulondina anch: “Ipukany Kukwatish Dijin dia Yehova Usany,” ukez kutukwash kwipuk kuwil mu mipit yinying yijim. Yipul Chom ik chikeza kutukwash kulejan nich mushiku chisu chimekeshinau antu musangar ukemp? ni Chom ik chikeza kutukwash kuwanyish mudimu usongina ni ukwet chibudikin ik? akez kuyakul mu diskur dikweta mutu wa mulong ulondina anch “Mulong wak Dijin dia Nzamb Afanyidin Kuditumbish.” Diarubing tukez kusanger sempozium wa yikunku yinying piur pa mutapu tukutwisha kutumbish dijin dia Nzamb kusutil ku yitongijok, mazu, mipak yetu, ni mwikadil wetu. Antu asu akez kusanger pakampwil diskur dia patok dikweta mutu wa mulong ulondina anch “Yehova Ukez Kumekesh Katumb ka Dijin Diend Dijim pa Harmagedon.”
3. Ov, chisend ik tukweta, ni program winou ukez kutukwash mutapu ik?
3 Piswimp ap Yehova ukez kutumbish dijin diend. (Ezek. 36:23) Pa chisu chinech, tukwet chisend chamushena cha kuyikasikesh antu awonsu akweta kurumburik kwa dijin ditumbila dia Yehova. Tuchingejin anch program winou wa chitentam cha munyingumuku ukez kukwash muntu ni muntu pakach petu chakwel tuwanyisha yisend yetu ya usey mudi in kulejan a dijin dia Nzamb.