Twijikishany Dijin dia Nzamb
1. Ov kwilej piur pa dijin dia Nzamb kukutwish kwikal ni usu ik piur pa antu?
1 Ov mutapu ik wakula chisu wileja kapamp ka kusambish dijin dia Nzamb? Mutapu wa kwakul wa antu avud ufaniken nich wa mband umwing walonda anch: “Chisu namana kapamp ka kusambish dijin dia Nzamb mu Baibel, nadila. Chankasikesha nakash pa kwijik anch nikutwish kwijik chakin kamu ni kusadil dijin dia Nzamb amwinend.” Kud ndiy, kwilej dijin dia Nzamb rading rizau ra usey nakash mu kumwijik Yehova mud muntu ni kutwish kukwat nend urund.
2. Mulong wak chidi cha kuswapej kudi etu kulejan dijin dia Yehova kud antu akwau?
2 Mulong wak Kwijikish Dijin dia Nzamb? Kwijik dijin dia Nzamb kuwejidinaku kwilej ngikadil yend, jintong jend ni yisal yend. Tufanyidin kand kwijik dijin dia Nzamb chakwel kutambul dipandish. Paul wafunda anch: “Muntu mwawonsu ukutazuka pa dijin dia Nsalejetu [Yehova, NW] ukez kupand.” Pakwez Paul warumburila kand anch “akutwish nchik kumutazuk,” anch antu kilejinap bil dijin dia Yehova ni kutek ruchingej mwi ndiy? Chawiy lel chidi cha kuswapej nakash kud in Kristu kuyijikish akwau dijin dia Nzamb ni kurumburik kwadi kwawonsu. (Rom 10:13, 14) Pakwez, kudi kand diyingish dimwing dijim nakash ditufanyidina kwijikish dijin dia Nzamb.
3. Disu diyingish dia kusambish dia kulejan kwetu?
3 Mu muvu wa 1920, antu a Nzamb ajingunina mu Mifund ya Baibel mulong utadila mangand mawonsu wambatena nich kuchidij kwa win-mangand wa Nzamb ni kutumbish dijin diend. Kurutu kwa Yehova kushesh antu ayimp chakwel kudiosh usany utekinau pa dijin diend, chifanyidin “kuwijikish pa divu pawonsu” uyakin piur pend. (Is. 12:4, 5, NW; Eze. 38:23) Chawiy lel, diyingish dietu dia kusambish mulong wa kulejan didi dia kumushiman Yehova patok ni kutumbish dijin diend kurutu kwa antu awonsu. (Heb. 13:15) Rukat mulong wa Nzamb ni mutej netu ritubachikin kusal sens mudimu winou utwinkinay Nzamb.
4. Mutapu ik ushikedinau Atuman’a Yehova ku kwijikan kusutil dijin dia Nzamb?
4 “Antu Mulong wa Dijin Diend”: Mu muvu wa 1931 twatambula dijin Atuman’a Yehova. (Is. 43:10, NW) Kusambish kamu pinipa, antu a Nzamb akat kwijikish dijin dia Nzamb mu chilik chakwel anch buku Prédicateurs, pa paj wa 124, ulondil anch: “Pa mangand, muntu mwin mwawonsu ukata kusadil dijin Yehova nich want ipau akat kumuman niyend mud Kaman wa Yehova.” Ov akwij niyey mutapu winou? Kujikitish kwetu mulong wa kuwap kwa Yehova kufanyidin kutubachik ‘kuyukish dijin diend,’ kulond piur pend mu yisu yin yawonsu yifanyidina.— Kus 20:7; 145:1, 2, 7.
5. Ov yaku yetu yikwet usu ik mu kusend kwetu kwa dijin dia Nzamb?
5 Chitudia “antu mulong wa dijin diend,” tufanyidin kulam yijil yend. (Mid. 15:14; 2 Tim. 2:19) Chom cha kusambish chikatau antu kuman piur pa Atuman’a Yehova yisu yivud yidi yaku yau yiwamp. (1 Pi. 2:12) Kitusotinap ap pakemp kujondish dijin diend kusutil kujip yijil ya Nzamb ap kusutil kutek difukwil diend pa ndond ya kaad mu mwom wetu. (Lev. 22:31, 32, NW; Mal. 1:6-8, 12-14, NW) Pakwez, tumekeshany kusutil mulad wa mwom wetu anch tumen nich usey nakash chisend chetu cha kusend dijin dia Nzamb.
6. Ov yiyukish ik tukutwisha kwikal nich kudiosh kamu katat ni chikupu?
6 Nlel, tumen kuwanyin kwa mazu malonday Yehova anch: “Kudiosh kwingangel djat ni kurand, dijin diam dikez kujimb pakach pa michid.” (Mal. 1:11, NW) Tudandamenany kwijikish uyakin piur pa Yehova ni ‘kuyukish dijin diend ditumbila chikupu ni chikupu.’—Kus. 145:21.
[Caption on page 1]
[Study Questions]