Kampany wa Kwijikish Chivurikish Ukusambish pa Rish 1
1. Ov, chisu ik tukeza kusambish kwijikish Chivurikish ni mulong wak kampany wa muvu winou ukwikal wa chisu chilepinaku pakemp?
1 Diakatan, pa Rish 1, tukez kusambish kampany wa muvu wa kuyitazuk antu akwau chakwel akumangana ku Chivurikish pamwing netu. Chivurikish chikez kusadik pa Rish 26, chawiy kulond anch kampany ukez kwikal wa chisu chilepinaku pakemp kupandakanamu mivu yasutina. Kampany winou ukez kuyinkish antu avud chisu cha kutambul diladikij, pakampwil anch ashich ndond yidia chikumangen chikweta teritwar mujim nakash.
2. Ov, yitenchik ik yitenchikinau mulong wa kutambul makopi ma maladikij ni kuwanyish teritwar mwawonsu?
2 Yitenchik Yikutenchikau: Amakurump akez kupan umutakel piur pa mutapu wa kuwanyish teritwar mwawonsu, kuwejaku ni maladikij makushau ku yikumbu yakad kutanau antu. Anch kudi kand maladikij mavud makupan kupwa kwa kusal mudimu wa ku chis ni chis mu materitwar, akutwish kumangan kand mu mudimu wa kupan uman wa patok. Kalam wa mudimu ukez kushinshikin anch kudi maladikij mavud mamekena ni matekinau pa ndond ya mikand ap pa ndond ya magazet chakwel amasenda kudi in kulejan, pakwez chifanyidinap kutek maladikij mawonsu kapamp kamwing. Tufanyidin kusend ching kusu uvud uwanyidina wa maladikij tuswirdina mulong wa rubing rumwing pa chisu.
3. Ov, chom ik tufanyidina kulam mu manangu chisu tupanininga diladikij?
3 Ov, Yom ik Tukeza Kulond? Chiwampin nakash kulond mu wiswimp pitusotina kukimb antu avud anch chitwishikin. Paj wa 4 ukwet chakumenaku cha sampul tukutwisha kusadil mu teritwar wetu. Chakin kamu, tufanyidinap kuya swa anch mwin chikumbu umekeshin musangar ap ukwet yipul ya kwipul. Chisu twipanina mu kupan maladikij pa jimbing, tufanyidin kand kupan magazet anch chitwishikin. Pa Rish 2, tukez kushinshikin pa kupan maladikij pa ndond pa kusambish malejan ma Bibil.
4. Ov, mulong wak tufanyidina kwipan nich mushiku mu kampany?
4 Tukwet ruchingej anch antu avud akez kwinung netu pa chisu cha Chivurikish. Diskur dikez kurumburil chidia chakin kamu Yesu. (1 Kor. 11:26) Dikez kulejan mutapu utukwashina rufu rend. (Rom 6:23) Dikez kand kukasikesh mulong walk chidia cha usey kudi etu kumuvurik. (Yoh. 17:3) El amboku, etu awonsu twipana nich mushiku mu kampany winou!