Diladikij dia Pakampwil
1. Ov, chisu ik chikeza kusambish kampany wa kupan diladikij dia yitentam ya muvu wa 2014?
1 Anch usotil kurijek yakudia ya pakampwil mulong wa arund ney ap mulong wa dijiku diey, chitin kusal usu nakash ni chitin kand nfalang chakwel wirijeka nawamp, ufanyidin chakin kamu kwikal nich chirungil chisu cha kupan mapaper ma diladikij. Chilik chimwing kand, asadin mudimu ukash mulong wa kurijek musambu wa muspiritu ukeza kusadik ku yitentam yetu ya distrikt ni ya mangand mawonsu ya muvu wa 2014. Mbing jisatu kurutu kwa kusambish chitentam chetu, tukez kwikal nich chisend cha kuyitazuk antu akwau chakwel eza kukumangan. Ov, yom ik yikeza kutukwash chakwel tupalangesha mapaper ma diladikij nich chirungil?
2. Ov, chom ik chikeza kutubachik chakwel twipana nakash mu kampany?
2 Tukez kwikal abachikinau chakwel twipana nakash mu kampany anch twatongin nich musangar pa yiyukish yivud tukutana muntu ni muntu ku musambu wa muspiritu utwikishinay Yehova ku yitentam yetu. (Isay 65:13, 14) Tufanyidin kuvurik kand anch, kampany wetu wa pa muvu uletining yibudikin yiwamp. Antu amwing tutazukininga akez kukumangan pamwing netu ku chitentam. Chikalap nchik uvud wa antu akeza kukumangan, pakwez usu wetu ukash utwasadina pa chisu cha kampany ukez kumushiman Yehova ni kumekesh riy rend.—Kus. 145:3, 7; Kuj. 22:17.
3. Ov, mutapu ik ukezau kupan mapaper ma diladikij?
3 Chisak ni chisak cha amakurump chifanyidin kukwat mupak piur pa mutapu ukutwisha chikumangen kupan mapaper ma diladikij mavud, kuwejaku kand mutapu wa kumasha ku yikumb ya antu akad kwikalaku ap kumapan kudi antu mu mudimu wa kupan uman wa patok mu teritwar. Anch Diampos dia kusambish dia ngond diawil mu machiku ma kampany, chifanyidin kukashikeshin pa kupan mapaper ma diladikij pa ndond pa kusambish malejan ma Bibil. Musangar mud ik tukez kwikal nich kupwa kwa kampany, wa kwijik anch twipana nich chirungil ni twayitazuka antu avud anch chitwishikin chakwel inunga netu ku musambu wa muspiritu utwinkishinau kudi Yehova!