Yisu Yikwau ya Kumujikitish Yehova
1. Ov, ditenchik ik disu dikeza kutukwash chakwel ‘tumujikitisha Yehova nakash’?
1 Ngond wa Rish wasutina ou, ditenchik disu diasadika, kusutil ku kuyinkish in kulejan chisu cha kusal mudimu wa uchibol nkwash wa asaa 30 itinau pa Rish ni pa Ndol mwawonsu ni mwi ngond mwezinay chisu ni chisu kalam wa munyingumuku. Anch kalam wa munyingumuku wakwendilany mukach wa angond aad, in kulejan akez kupan ma saa 30 mitinau kudi muntu mwin mwawonsu ukutwisha kutond kusal mudimu wa uchibol nkwash mwi ngond umwing ap kuwejaku ngond mukwau. Ayibol ankwash awonsu akutwish kukumangan ku chikumangan chawonsu chikusalay kalam wa munyingumuku ni ayibol a rawonsu ni a pakampwil. Chinech chirumburikin anch anch tukutwishap kuwanyish masaa 50 mitinau, tukutwish kand ‘kumujikitish Yehova nakash’ kusutil ku kusal mudi ayibol ankwash tupamp tunying mu muvu nich masaa 30 mitinau kuwanyish!—Kus. 109:30; 119:171.
2. Ov, yom ik yikeza kuyisangaresh in kulejan akusala mudimu wa uchibol nkwash pa chisu chezinay kalam wa munyingumuku?
2 Pa Chisu Chezinay Kalam wa Munyingumuku: Katat in kulejan avud akutwish kusal nawamp mudimu wa uchibol nkwash pa chisu chezinay kalam wa munyingumuku ni kusanger kukwashijan kusutil ku kulejan nend pamwing. (Rom 1:11, 12) Anch chitwishikin, ayibol ankwash avud akez kurijek chakwel atambula konje wa dichuku dimwing mu rubing mulong wa kulejan pamwing ni kalam wa munyingumuku. Pakwez, awiy asadininga mudimu wa ku mujimbu mu machiku ma rubing akutwish kumwit kalam wa munyingumuku anch ukez kulejan nau pamwing Diampos ap Diarubing. Chikwau kand, dikasikesh mud ik dikezau kutan ayibol ankwash chisu chikezau kukumangan ku chikumangan cha ayibol pamwing nau ayibol a rawonsu ni ayibol a pakampwil!
3. Ov, mulong wak chirung cha Chivurikish chidi chisu chiwamp nakash cha kusal mudimu wa uchibol nkwash?
3 Pa Rish ni pa Ndol: In kulejan atana yiyukish ku ditenchik dia kusal mudimu wa uchibol nkwash nich masaa 30 mitinau mwi ngond umwing pa chisu cha Chivurikish akutwish katat kuwejaku kand “yakupesh ya kushiman” yau! (Heb. 13:15) Awonsu aad, Rish ni Ndol adi angond awamp nakash mulong wa kutanduril mudimu wetu wa kulejan mudi ayibol ankwash. Muvu ni muvu pa chisu chinech, twipanining mu kampany wa musangar wa kuyitazuk antu chakwel eza kukumangan ku Chivurikish. Chikwau kand, mulong in kulejan avud atanduriling mudimu wau wa kulejan pa chisu cha Chivurikish, tukutwish kusal mudimu pamwing ni in kulejan kushalijan. Kupwa kwa Chivurikish, tukuyilondul antu amekesha musangar kusutil ku antu akumangana netu ni kukudish musangar wau chakwel eza kukumangan ku diskur dia pakampwil. Ov, muchim wey ukez kukubachik chakwel witekina yisu yikwau ya kusal mudimu wa uchibol nkwash?—Luka 6:45.