Kwangan kwa Magazet—Ukwash wa Kusambish Nich Malejan ma Bibil
1. Ov, mulong wak dirijek dia Yehova diayikasikesha pakur in kulejan chakwel akudisha chaku cha kwangan kwa magazet?
1 Antu avud kasotiningap kwilej Bibil pamwing netu, pakwez asangaredining kutang magazet metu. Chawiy lel, dirijek dia Yehova diayikasikesha pakur in kulejan chakwel akudisha chaku cha kwangan kwa magazet. Patanginingau antu yisu yawonsu magazet metu, yisu yimwing akwikal nich impu yijim ya Dizu dia Nzamb. (1 Pita 2:2) Chakin kamu, yom yitanginingau yikutwish kuyisangaresh ni kuyishikij ku kwitiy dilejan dia Bibil.
2. Ov, mutapu ik tukutwisha kukudish musangar wa antu tukwetinga chaku cha kuyangen magazet?
2 Twichilany ‘Mem’ pa Mbut ja Uyakin: Pa ndond pa kumushil ching kusu magazet, isamba pamwing ni mwin chikumbu ni pakish kukasikesh urund nend. Chinech chikez kukukwash wijika mashakamin mend, yom yisangaredinay ni yitiyij yend yawiy yikutwisha kukukwash chakwel ujingunina yom ya kulond. (Jinsw. 16:23) Twirijekany mulong wa kumuchirikin muntu ni muntu. Anch chitwishikin, tukwisambin mu wiswimp dinans dimwing ni kujimbul maverse madia mu magazet, chawiy kwichil mem pa mbut ja uyakin mu muchim wend. (1 Kor. 3:6) Tukufund dichuku dia ngond dia kumuchirikin muntu ni muntu, mukand twasha, mitu ya milong ni maverse twisambina.
3. Ov, mutapu ik tufanyidin kuyichirikin antu in awonsu tukwetinga chaku cha kuyangen magazet yisu ni yisu?
3 Ov, Tuyichirikidining Antu Chisu Chawonsu? Ufanyidin kuyichirikin kapamp kamwing pa ngond chakwel uyinkisha magazet masu antu in awonsu akwetinga chaku cha kumatambul. Pakwez, kwambatan nich mashakamin mey ni musangar wamekeshay muntu ni muntu, ukutwish kukwat mupak wa kuyichirikin yisu ni yisu. Chilakej, pa rubing rumwing ap jaad kupwa kwa kuyishil magazet, ukutwish kuyichirikin ni kulond anch: “Nez kal chakwel nikuleja dinans dimwing didia mu gazet nakushila.” Chinech chikutwish kulangwish impu ya muntu chakwel atanga mutu wa mulong wa pakampwil. Anch wamutangin, ukutwish kumwipul chom chitonginay piur pa mutu wa mulong winou ni kuwisambin mu wiswimp pamwing nend. Ap anch muntu usangaredin kutang mikand yetu, ukutwish kumuchirikin ni kumwinkish kand trakt, broshir, ap buku ulejenau kupan pa ngond win wang.
4. Chisu ni chisu, ov, chom ik tukutwisha kudandamen kusal anch antu in awonsu tukwetinga chaku cha kuyangen magazet asotin kwilej Bibil?
4 Kangal twachingelany chakwel mwin chikumbu atwita dilejan. Twikalany a kusambish. Ap anch ndiy walika dilejan dia Bibil pasak, pakwez chisu ni chisu ufanyidin kwisamb nend mutu wa mulong ulondina anch: “Yakul ku Yipul ya Bibil” udia mu Chinong cha Kalam ni kushinshikin anch ndiy usotining kwisamb ney. Pamwing ap ukutwish kusambish dilejan dia Bibil dia ku chis. Pakwez, anch ukutwishap kusambish dilejan, ukutwish kudandamen kumuletinanga magazet chakwel ukudisha musangar wend.