Tukudishany Ukaliweny Wetu mu Mudimu wa Kulejan—mu Kukudish Chaku cha Kuyinkish Antu Atambwilinga Magazet

Chidia cha Usey: Antu avud asangaredininga magazet metu kasotiningap kwau kwilej Bibil pamwing netu. Pamwing ap akat kusangaredinanga kwau relijon wau ap amening anch kakwetingap chisu cha kwilej. Pakwez, pakatau kutang chisu ni chisu magazet metu akutwish kukudish rukat rau mulong wa Dizu dia Nzamb. (1 Pita 2:2) Mutu wa mulong winou wa pakampwil ukutwish kushik ku michim yau ap mashakamin mau makutwish pamwing kuswimp. Yisu yivud, kuyichirikin mu yisu yikemp kukez kusal anch twijikijana nau ni kukez kutukwash twijika yom yiyisangareshina ni yitadina. Chakin kamu, dilejan dia Bibil dikutwish kusambish.

Mutapu wa Kusal:

Pa ngond ni ngond, ukutwish kutenchik program wa kusambishang kuyinkish antu magazet masu ma Chinong cha Kalam ni ma Réveillez-vous ! Ap ukutwish kuyendil pa yisu yikwau pa ngond chakwel ulangwisha maswir mau ma kutang mutu wa mulong udia mu magazet wayishila ap kupan mukand ulejenau wa kupan wa pa ngond winou. Lam nawamp jinsangu jiwafundina.—Tal Mudimu Wetu wa Want wa pa Chiwong 2014, p. 3.
Irijeka piuchirikidina antu in awonsu. Pa ndond pa kupan kwau magazet chamwamu, sal usu wa kwisamb pamwing ni mwin chikumbu ni kasikesh urund uwamp pamwing nend chakwel ukudisha musangar wend.
Kimb mitapu kanang ya kusambish dilejan. Anch muntu winkishininga magazet wakwipul pa yom yilondinay Bibil pa mutu wa mulong kanang, mwinkisha mukand wa kwilej nich ukweta chakul ni isambinany pamwing pa mutu wa mulong winou. Kurutu uya, ukutwish kumwipul chipul chiukezanya kushinshikinany pa chisu chikwau ukeza kumuchirikin. Anch ukat kwisambang chisu ni chisu ni mu mutapu uwamp kusutil ku kusadil Bibil ap mikand yetu ya kwilej nich ijik anch utakedin dilejan dia Bibil. Ov, wamwinkisha mwin chikumbu broshir Rusangu Ruwamp ni wamulejin mu wiswimp mutapu wa kwilej Bibil? Ov, wamulejin mavideo am Ov, Mulong wak Kwilej Bibil? ni Ov, Yom Ik Yisadikininga pa Chisu cha Dilejan dia Bibil? Ap anch muntu kitiyap pasak kwilej nend, pakwez, mashakamin maswipining. Ov, chikwikalap chiwamp kudi ey kumuchirikin kand muntu winou?

Pakish Kusal Mwamu pa Ngond:

Fund majin ma antu ukutwish kuya kuyinkish magazet. Yinkisha manimero ma magazet masu ni yileja anch ukez kuyiletin manimero makwau.