Tukudishany Kusanger Kusutil ku Kupan Magazet
1. Mutapu ik tukutwisha kusadil kupan magazet mulong wa kukudish kusanger?
1 Antu avud tukata kusankan mu mudimu akat kutwak nawamp ni kutambul mikand yetu nich musangar pakwez akat kwidjidjek kwitiyij dilejan dia Bibil diakad kujing. Mutapu umwing wa kukudish kusanger kwau udi kusutil ku kupan magazet. Chisu upanina magazet, fund dijin dia muntu ni adres, dichuku wambambang nend, nimero witiyangay, ni mufund wisambinangany, pamwing ni chom chawonsu wamanang anch chikutwish kumekesh kusanger kwa muntu. Anch nimero ni nimero musu wa magazet washik, kimb manans makeza kuyital antu ukata kwangenang, ni yinkisham chisu uyila ni kuyendil. (1 Kor. 9:19-23) Mu kusut kwa chisu, yom yatanginau mu majurnal metu yikutwish kusosil kusanger kwau ni kuyishikij ku kusot kwilej yivud.
2. Mulong wak chidi cha kuswapej kud antu kumukimb Yehova katat, ni yom ik tukutwisha kusal nakash chakwel kuyikwash?
2 Twij kamu nawamp, anch, antu avud kakwikalap kwau atushalapol a Yehova kusutil ku kwitangin kwau ayinau magazet. Mulong chidi cha kuswapej kud antu kumukimb Yehova katat, ov, yom ik tukutwisha kusal nakash chakwel kuyikwash? (Sof. 2:2, 3; Kuj. 14:6, 7) Tukutwish kukudish kusanger kwau kusutil ku kuyitangin nawamp mufund ututondina chisu ni chisu tupanina magazet.
3. (a) Mutapu ik tukutwisha kurijek yikunku ya minsamb yimedina pa mufund wa Bibil? (b) Mitu ya milong ik yiyikwatina antu nakash mu teritwar wen?
3 Mufund Umwing wa Kwisambin: Tongin pa antu ukata kutwadil magezet, ni rijek yikunku ya misamb yimedina pa mufund wa Bibil mulong wa maswir ma pakampwil ma muntu ni muntu. (Filp. 2:4) Chilikej, anch muntu wafishin katat mukatish nend, ukutwish kwez ni kumutal tupamp tuvud chakwel kwisambin yom yilondilay Bibil piur pa mwikadil wa afu ni ruchingej ra divumbuk. Malejan madia mu buku Comment raisonner mu mitu ya milong yijim “Rufu” ni “Divumbuk” ukutwish kumasadil chakwel kurijek minsamb yiney yimedina pa mufund wa Bibil. Minsamb yikwau yitadila mitu ya milong, mud ya mutapu ukudioshau mayej, upal, ni rufu, ukutwish kuyiwejinaku. Chom chijim chidi kutan mutu wa mulong umusangarishina muntu ni kumulej pakemp-pakemp yilondinay Bibil pa mulong winou.
4. Mulong wak chidi cha usey kwovikesh nawamp chisu tusadidila Mifund, ni mutapu ik tukutwisha kusal mwamu?
4 Ovikesh Nawamp: Ap anch chaku chidi cha kupipesh nakash minsamb mud yiney ni kuyiswipish, chitin yuvud kupandikan kutang kusu kwau mufund utondinau. Satan wabwikin kal manangu ma antu ku rusangu ruwamp. (2 Kor. 4:3, 4) Ap antu ija Bibil aswiridin ukwash chakwel kumwov kurumburik. (Midimu 8:30, 31) Chawiy, itekinaku chisu cha kurumburil ni kufanakesh mufund, nakash mud ukutwisha kusal mu diskur ku Shikol ya Mudimu wa Uteokras. (Midimu 17:3) Ijik anch muntu ukat kuman usey wa kusadil Dizu dia Nzamb mu mwom wend amwinend.
5. Mutapu ik kuchirikin kupan magazet kukutwisha kukukwah kusambish dilejan dia Bibil?
5 Anch muntu usanger mulong wa yom yilejinay, tandurish pakemp-pakemp minsamb chakwel kuwejaku verse wa Bibil umwing ap maad chisu chawonsu usadila kuchirikinamu. Kimb mutapu wa kusadil broshir Nzamb Witin ap buku Ronganyin. Mu mutapu winou, kuchirikin kupan magazet kukutwish kukukwash kusambish dilejan dia Bibil.
[Caption on page 1]
[Study Questions]