Mivu Chitot ya Kulejan Want!
1. Ov, antu a Yehova ayikasikesha kusal ik pasutin kal mivu chitot?
1 “Mwant wasambish kal kuyikel! Udiany antwend. Chawiy lel, lejanany, lejanany, lejanany, Mwant ni want wend.” Nich mazu minam masangareshina malondau kudi Mukadivar Rutherford pasutin kal mivu chitot, antu a Yehova ayikasikesha kupalangesh uruu wa Want pa mangand mawonsu. Wawiy mutapu twasadina! Mudi mwasalau in Kristu a kusambish, niyetu twalejana rusangu ruwamp ra Want “kudi awonsu atangilau mwishin mwa diur.” (Kol. 1:23, TMK) Anch twashinshikin pa mivu chitot yasutina, ov, yom ik twasala mulong wa kulejan Want wa Nzamb? Ov, mutapu ik tukutwisha kudandamen kulejan Want winou pitushejina piswimp nich chivurikish cha mivu 100 cha kuvadik kwa Want?
2. Ov, mutapu ik mikand yetu yakasikeshinanga pa Want wa Nzamb?
2 Yom Yitwasala Pasak: Mu makum ma mivu, mikand yetu yakasikeshinanga pa Want wa Nzamb. Kudiosh 1939, gazet wetu wa pakampwil wading nich mutu wa mulong ulondina anch: Chinong cha Kalam chilejen Want wa Yehova. Gazet winou wisambidining chisu chawonsu pa Want ni yom yikeza kuwanyish Want winou. Gazet Réveillez-vous ! niyend ukasikeshidin pa Want wa Nzamb mudi wawiy kusu uchingejinau antu. Chisangareshin mudi ik pa kwijik anch magazet minam maad amakarumwin ni amapalangeshin nakash pa mangand mawonsu nlel unou!—Kuj. 14:6.
3. Ov, milad ik yimwing yitwasadinanga mulong wa kulejan Want?
3 Antu a Yehova asadinanga milad kushalijan chakwel alejena Want. Pa chirung cha kusambish, twasadinanga miotak ni maradio yikweta yijimbish ya dizu ni mafono ma ku makas. Milad yiney yatukwashanga kupalangesh rusangu ruwamp kudi antu avud pa chisu chiwanyidina ap anch kwading ching in kulejan a Want akemp. (Kus 19:4) Mu mivu ya katat, twabudishin jinsangu pa jw.org, jilejena Want kudi mamiliyon ma antu—kuwejaku antu adia mu jingand mulikishinau mudimu wetu wa kulejan.
4. Ov, twipana mu milad ik ya pakampwil?
4 Antu a Yehova ipana kand mu milad ya pakampwil chakwel apalangesha uruu wa Want. Chilakej, kwinsambishil kwa muvu wa 1990, twasala usu wetu wawonsu mulong wa kutanduril mudimu wetu wa kulejan wa ku chis ni chis kusutil ku kupan uman wa patok mu mapark, mu jindond ja kuchingel motak ni mu jindond ja kwisakin. Katat kamu ak, twatenchika mudimu wa kupan uman wa patok pakampwil mu misumb yijim yidia pa mangand mawonsu. Chikwau kand, yikumangen yivud yipana mu kupan uman wa patok mu materitwar ma pol pau kusutil ku kusadil tumaordinater tukemp (tutazukinau anch tablette) ni makart ma elekitronik makweta yipich yisangareshina ni mikand mu jindim jivud ayilonga mwindond yadingau antu in kwisakin. Chakin kamu, mudimu wa kulejan wa ku chis ni chis udandamedining kwikal mulad wetu wa pakampwil wa kulejan nich Want.—Mid. 20:20.
5. Ov, yisu ik yimwing ya mudimu yikeza in kulejan avud pakach petu kwikal nich pa muvu usu wa mudimu?
5 Yom Yitukusala Kurutu: Nich muvu wa mudimu usu ukusambisha pa Mwinses, in kulejan avud akez kusambish kusal mudi ayibol a rawonsu. Ov, ukutwish kwinung pamwing nau? Anch ukutwishap, ov, ukutwishap kusal mudi chibol nkwash pa chisu ni chisu? Ap anch ukutwish kusal mudi chibol ap bwat, Yehova ukez chakin kamu kuyukish kwipan kwey kwawonsu wipanina mulong wa kwipan nakash mu kulejan Want.—Mal. 3:10.
6. Ov, mulong wak ngond wa Mwinkind ukez kwikal ngond wa pakampwil?
6 Ngond wa Mwinkind 2014 ukez kwikal ngond wa chivurikish cha mivu 100 ya kuvadik kwa Want. Mu mutapu usangareshina, dichap dia antu awonsu dia Chinong cha Kalam cha ngond winou dikushinshikin pa Want wa Nzamb. Ov, mulong wak ukutwishap kusal usu wa kusend uvud kanang wa dichap dined mu makas anch chitwishikin? Pituchingedina machuku ma kurutu, el amboku muntu ni muntu pakach petu adandamena ‘kulejan rusangu ruwamp ra Want wa Nzamb’ kudi antu awonsu akeza kutesh.—Mid. 8:12.