Kafumpul Ukwikal Ngond wa Pakampwil Mulong wa Mudimu wa Kulejan!

1. Ov, kampany ik wa pakampwil ukusadika pa mangand mawonsu pitushejina piswimp ni chivurish cha muvu 100 cha Want?

¹ Chivurikish cha mivu 100 cha kuvadik kwa Want wa Nzamb chisejin piswimp. Chisangareshin mud ik anch twamutumbish Yehova kusutil ku kampany wa pakampwil! Pa chisu cha Kafumpul tukez kwipan mu kupalangesh pa mangand mawonsu trakt musu ukweta mutu wa mulong ulondina anch: Ov, Kwisu Tukutwisha Kutan Yakul ku Yipul Yijim ya Mwom? Trakt winou ukuyikasikesh in kutang chakwel akimba yakul ya Bibil ni ulejen mutapu kapend ka jw.org kakutwisha kuyikwash.

2. Ov, mutapu ik tukutwisha kupan ukwash ku ‘mazu makash ma kumushiman [Yehova]’ makeza kwovakan pa Kafumpul?

² Mazu Makash ma Kushiman Nich: Mulong wa kuyikwash in kulejan atandurila mudimu wau wa kulejan, atenchikin kal ditenchik dia pakampwil mulong wa in kulejan in awonsu akusota kusal mudimu wa uchibol nkwash pa ngond wa Kafumpul. Pa ngond winou, in kulejan ababatishau kal akez kusutish asaa 30 itinau chakwel asala mudimu wa uchibol nkwash. Mulong ngond wa Kafumpul ukwikal nich machuku matan ma Diakatan, Diampos ni Diarubing, in kulejan avud asadininga mudimu wa ku mujimbu ap ayilinga ku shikol mu rubing akez kutwish kusal mudimu wa uchibol nkwash. Anch ukwet dilejan dia Bibil diyila kurutu ap mwan usotina kwikal mwin kulejan, mwijikishamu pakad kulab ntakel wa chisak cha amakurump. Chikwikal chisangareshina mud ik kudi antu inay asu kwinung netu pa kusalau mudi in kulejan pa ngond winou wa pakampwil! Ap anch ayibol a rawonsu akwikal ni konje pa ngond wa Kafumpul kupwa kwa kuwanyish asaa au ayitiningau pa muvu, chitwishikin kudi awiy kurijek program wau chakwel ipana nakash mu kampany winou wa pakampwil. Katat, chawiy chisu cha majuku cha kwisambin mutapu ukezau kupan ukwash ku ‘mazu makash ma kumushiman [Yehova]’ makeza kwovakan pa Kafumpul.​—Esi. 3:11; Jinsw. 15:22.

3. Ov, ruchingej ik ridiaku ritadina kampany winou wa pakampwil?

³ Ap anch etu awonsu twipana mu makampany ma chilik chimwing pasak, tukwet ruchingej anch kampany winou ukez kwikal kamu wa pakampwil. Ov, tukutwish kuwanyish uvud usu wa asaa, kwikal in kulejan ap kusal mudimu wa uchibol nkwash pa Kafumpul? Pitukushika kwinsudiel kwa muvu wa mudimu wa 2014, el amboku Yehova ayukisha usu wa antu end adia pa mangand mawonsu kusal ngond wa Kafumpul kwikal ngond umwing wa kupan uman ujim nakash!​—Mat. 24:14.