Sadil Kamukand “Mazu ma Kusambish Nich Dizu dia Nzamb”—Mulong wa Kusambish Nich Minsamb
1. Ov, kamukand ik kasu twatambula mulong wa mudimu wa kulejan?
1 Dichap dia katat dia Traduction du monde nouveau dikwet chikunku chimwing chidia kwisambishil chilondina anch: “Mazu ma Kusambish Nich Dizu dia Nzamb.” Ov, mutapu ik tukutwisha kusadil kamukand kinak kasu pitukata kwirijek mulong wa mudimu wa kulejan? Mulong mu chikunku chinech alonginamu maverse mambatena nich mitu ya milong ya Bibil kushalijan, chilik chimwing mudi mudinga mu buku Comment raisonner, akutwish kuyisadil nawamp kamu mulong wa kusambish nich minsamb.
2. Ov, mutapu ik tukutwisha kusadil kamukand “Mazu ma Kusambish Nich Dizu dia Nzamb” mu mudimu wa kulejan?
2 Ukutwish kusadil chipul 8 ni ukulond anch: “Tukat kuyendil mu wiswimp amutej mulong antu avud akat kwiyipulang anch: ‘Ov, Nzamb uyipupining antu chakwel amana mar?’ [Mu materitwar mamwing, chiwapining kumulej mwin chikumbu chipul.] Ov, utongin nchik? [Mulika akula.] Bibil wakwil kamu ku chipul chinech.” Tang ni isambina kapamp kamwing verse umwing ap maverse majimbwilau madia mu Bibil. Anch mwin chikumbu wamekesh musangar, ukutwish kumulej yipul 20 yidia kwisambishil ni mwipula chakwel atonda chimwing chiukeza kwisambinany piukeza kumuchirikin dichuku dikwau. Ap ukutwish kumwinkish umwing wa mikand yetu yitukata kutakel nich dilejan yikweta jinsangu jivud jimedina pa mutu wa mulong ukeza kwisambinany kamu.
3. Ov, mutapu ik tukutwisha kusadil kamukand “Mazu ma Kusambish Nich Dizu dia Nzamb” chakwel tusambisha nich minsamb mu teritwar mudia antu adia mu relijon wakad kwikal wa in Kristu?
3 Yipul 4 ni 13 kusutil ku 17 yikutwish kwikal pakampwil ya ukwash pitulejena mu materitwar mudia antu adia mu relijon wakad kwikal wa in Kristu. Chilakej, ukutwish kusadil jinsangu jidia mu chipul 17 ni ukulonda anch: “Tukat kuyendil antu mu wiswimp mudi in mudimu wa patok mulong wa majuku.” Ov, witiyin anch majuku mavud makat kurish nich yikokujol yivud lel unou? [Mulika akula.] Ambay a uruw avud amen kal mazu minam ma manangu anch madi ma ukwash nakash: “Chifanyidin ngachik kumulimish nfumwend.” [Ufanyidinap kujimbul anch mazu minam madia mu Efes 5:33. Anch wisambin ni mband, ukutwish pamwing ap kuchirikin mazu madia mu Efes 5:28.] Ov, utongin anch kusadil chiyul chinech kukutwish kwikal kwa usey mu uruw?
4. Ov, chom ik ukutwish kusal kwinsudiel kwa minsamb yey pamwing ni muntu kanang udia mu relijon wakad kwikal wa in Kristu?
4 Kupwa kwa minsamb yen, itenchika chakwel udandamena nich minsamb pa chisu chikwau. Pamwing ap ukutwish kutenchik chakwel wisambina piur pa verse umwing wa ku maverse makwau makwatijadina ni chipul wipwila. Pa chisu chiwanyidina, mwinkisha mwin chikumbu chisu chakwel ijika anch mazu ma manang ulondina madi makin ni madiola mu Bibil. Kwambatijan nich minsamb yen ni mutapu umenay muntu Bibil, ukuwinkish mukand utongina anch ukutwish kumusangaresh.—Tal wenjil udia mu Mudimu Wetu wa Want wa pa Kachirikin 2013.