Dandamenany Kuyikadish in Kwilej
1. Chom ik chifanyidinau antu kusal chakwel apanda?
1 Rapor wa mudimu wa muvu wa 2014 wamekeshin mushiku ni usu wasadinau antu a Nzamb mulong wa kulejan rusangu ruwamp ra Want. (Mat. 24:14) Kusutil ku kusal mudimu wa kulejan wa ku chikumbu ni chikumbu, kampany wa pakampwil wa kupan ma trakt ni maladikij, ni mudimu wetu wa kupan uman patok, twashikedin ku kuyilej antu avud rusangu ra Bibil kupandakanamu pasak. Chakwel antu inay apanda, tufanyidin kuyikwash ikala in kwilej a Yesu kusutil ku kwilej nau Bibil.—1 Tim. 2:4.
2. Yipul ik tufanyidina kwiyipul yikutukwasha kwikal nich mushiku wa kufundish Bibil?
2 Ikal ni Mushiku wa Kufundish Bibil: Ang muntu wasanger kwilej, ov, ukutwishap kusal usu wa kwijik dijin diend ap adres wend, ni kumuchirikin swa mulong wa kusambish nend dilejan dia Bibil? Chisu ik cha nsudiel wasambisha kwilej nend Bibil piwatanijana nend kapamp ka kusambish? Chisu ik kand wasambishina malejan ma Bibil ni antu winkishina magazet? Wamekeshin ma video, Mulong wak Kwilej Bibil? ni Mutapu ik Ukata Kusadik Dilejan dia Bibil? kudi ambay ney a mudimu, a ku shikol, amutej ney, anamakwey, ni antu akwau wija? Piusadina mudimu wa kulejan ni tebur wa kutek mikand, usadining usu wa kuyilej antu asendining mikand ya kwilej nich Bibil anch ukutwish kwilej nau pakad kufut?
3. Chom ik chitinau chakwel tulejana nawamp uyakin?
3 Ukwash wa Yehova ni wa Yesu: Papanay mbil ya ‘kuyikadish in kwilej’ walonda anch “yangany,” Yesu walonda anch tufanyidin kwikasikesh ni kulet chilakej. Ndiy katushap ayinetu, pakwez watushilamu anch ukez kwikal niyetwetu. (Mat. 28:19, 20) Chikwau kand, Yehova watwinkisha spiritu wend utumbila, mudi chom cha mudimu ni kufumb tuswiridina mulong wa kuyilej antu uyakin. (Zak. 4:6; 2 Kor. 4:7) Tukutwish kulembil chakwel twikala ni ‘rusot ni usu’ wa kwipan mu mudimu winou wa usey nakash.—Fil. 2:13.
4. Mulong wak tufanyidin kudandamen kuyikadish in kwilej?
4 Kulejan rusangu ruwamp kutuletidining musangar nakash. Pakwez, musangar wetu ukat kupandakan anch muntu tufundishina uyakin ni tukwashina wimbomb netu mwi ‘njil yitwadila ku mwom.’ (Mat. 7:14; 1 Tes. 2:19, 20) Cha usey chidi anch, kusutil ku kudandamen kuyikadish in kwilej, tumusangareshin Yehova “mulong kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.”—2 Pita 3:9.