Ikalany Tayad ni Kusambish Kwilej Bibil

1. Chom ik chikutubachika kuwanyish mudimu watwinkishay Yesu mu Mateu 28:19, 20?

¹ Yesu watwinkisha mudimu wa ‘Kwikadish in kwilej . . . , ni wa kulejan.’ (Mat. 28:19, 20) Chawiy lel, tuswiridin kwikal tayad ni kusambish kwilej Bibil pa yisu yawonsu, pakad anch ching dichiku dimwing kusu dia nsudiel ya rubing didia pakampwil dia kukimb malejan ma Bibil. Yitongijok yilondwilaku ey yikutwish pamwingap kutukwash.

2. Ov, nany tukutwisha kusambish kwilej nend Bibil?

² Mutapu wa Kukimb Dilejan dia Bibil: Chakwel tukimba nakash dilejan dia Bibil, tufanyidin kwikal ni mitapu yivud ya kumupwit muntu. Ov, wapakishap kal kumushejish muntu kapamp kamwing? Chikumangen chimwing ku États-unis chasala mwamu ngond wa kabuj. Musangar mudi ik wa kusambish malejan masu ma Bibil 42! Pakad kutong anch antu tukutana akusangar kwijik anch tuyilejining malejan ma Bibil. Piukuchirikanya pa chisu chikawau, mulong wak ukutwishanyap kwilej Bibil? Pakwez, chikwetap mulong anch kitiyijinap kwilej pa chisu chin cha. Ukutwish wadandamen kukudish musangar. Ov, wayipulap kal amutej ney, anamakwey a ku mujimbu, ambay ney a mudimu, ni ambay ney a ku shikol anch akutwish kukat kwilej Bibil pamwing ni yey? Ukutwish kand kuyipul in kwilej ey a Bibil anch akwet arund ap anamakwau a ku mujimbu asangaredina kwilej Bibil.

3. Chom ik cha mudimu chikutwisha kutukwash chakwel tusambish malejan metu ma Bibil, ni kwisu tukutwisha kuchisadil?

³ Chikutwisha Kutukwash: Chom cha mudimu cha usey chikutwisha kutukwash chakwel tusambisha malejan ma Bibil chidi trakt Aimeriez-vous Connaître la vérité ? Ukutwishany wamwinkishanyay in chikumbu anch itiyij buku mukwau ap bwat. Ukumusadilany pa chisu usadilany mudimu mu teritwar, Piusadilany mu mikombil, piutuminany mikand ku jindond jindjing, ni pa chisu uchirikidinany antu asangera. Ukutwishany kand washany ku yikumbu kwakad antu. Ov, mulong wak chiswapelap kudi en umusadilany trakt winou pa chisu chiudiany mu motak, mu magazin, ni ku mudimu wa makas? Paj wa kwinyim urumburil mu wiswimp mutapu wa kurijek dilejan dietu dia Bibil ni mitapu ya kusambish kwilej buku Chifundishinay Bibil.

4. Ov, mutapu ik tukutwisha kusadil trakt Uyakin chakwel tusambish dilejan?

⁴ Kupwa kwa kusha trakt kudi muntu, ufanyidin kulejan yipul yidia pa paj wa nsambishil ni kumwipul anch: “Yisu yipul yimwing ya ku yipul yiney usangaredina nakash?” Kupwa, shinshikinany pamwing chakul chidia mu trakt, ni tang ap lond mu wiswimp yidia pa paj wa kwinyim, wisu ulejena mutapu wa kurijek dilejan dietu dia Bibil. Ukutwish kand wamulej ndond ya kutan rusangu ripandakena mu mutu wa mulong udia mu buku Chifundishinay Bibil, mwinkisha mukand winou, ni irijeka mutapu wa kumuchirikin ni kudandamen nich minsamb.

5. Mulong wak tufanyidin kwikal tayad ni kusambish dilejan dia Bibil?

⁵ Teritwar wetu ukwet kand maswir ma kwilej chom ik chakin kamu chifundishinay Bibil. Kusutil ku kwikal tayad ni kusambish kwilej Bibil, tukez kuman ni musangar mutapu wa kuyikwash antu akwau chakwel tuyishikij mwinjil ya mwom.—Mat. 7:13, 14.