Dichuku dia Pakampwil dia Kusambish Malejan ma Bibil
1 Kusambish pa Chiwong, chikumangen ni chikumangen chikutond dichuku dimwing dia kwinsudiel kwa rubing rimwing pa ngond ni ngond chikutwisha kusal mudimu wa kusambish ching malejan ma Bibil, pamwingap rubing ra kusambish. Dichuku dined dikutwish dikal Diampos ap Diarubing, kulondwish nich dichuku diwapidila pol pen. Pa dichuku dined anch in chikumbu alik kwau kwitiyij dilejan dia Bibil, in kulejan afanyidin kuyinkish buku Chifundishinay Bibil ap magazet ma katat. Amakurump ni ankwash a mudimu awonsu afanyidin kwirijek chakwel asala nakash mu mudimu winou ni kuyikwash in kulejan chakwel asambisha malejan ma Bibil.
2 Komite wa Mudimu wa Chikumangen ukez katenchik nsudiel ya rubing yikutondau dichuku mulong wa kusambish malejan ma Bibil. Chisu ni chisu chifanyidin kuyivurishang in kulejan chakwel irijekang ni asala usu wa pakampwil chakwel asambisha malejan ma Bibil ku chikumbu ni chikumbu ni chisu chikuchirikau kuyital antu amekeshang kusanger.
3 Mutapu wa Kwirijek: Tukutwish kutan yiyul yilejena mutapu wa kusambish malejan ma Bibil mu wenjil wa Mudimu Wetu wa Want wa Chiwong 2006 ni pa paj wa 12 wa buku Comment raisonner. Amwing akutwish kutond kusadil trakt ulondila anch Ov, Usotil Wijika Uyakin? Chikwau kand, pa paj wa 3 wa Mudimu Wetu wa Want wa Kafumpul 2007, padi yiyul yilejena mutapu wa kusambish malejan ma Bibil pa chisu tuyila kuyital antu itiyija magazet. Akez kuyitond amakurump ni ankwash a mudimu mulong wa kutakel mu wiswimp, mu minit 10 ap 15 chikumangan cha mudimu wa chingand, ni chifanyidin kwisambin chiyul chimwing ap yaad yilejena mutapu wa kusambish malejan ma Bibil ap kand kusal chakumenaku.
4 Chakin kamu, antu awonsu kakutwishap itiyij ileja Bibil ap kudandamen nich kwilej Bibil chisu chilemp. Chom chinech chikutwishap cha tuchirish kwinyim, mulong Yehova ndiy ukata kuyikakin antu adia mudi amikoku mu dirijek diend. (Yoh. 6:44) Chisend chetu kichidiap ching kusu cha kukun mbut ja uyakin pakwez chidi kand cha kwichil mem chakwel mbut jitanda mij, ni mu chisend chinech mudi kand mudimu wa kwilej Bibil ni antu akweta michim yitentamina. Anch twasal mwamu, tukwitapil dilau dia kwikal in mudimu nend Nzamb.—1 Kor. 3:9.