“Divu dikez kubudish yakudia. Nzamb, ndiy kamu Nzamb wetu ukeza kutuyukish.’—KUSENG 67:6

Ukutwish Kutambul Yiyukish ya Chikupu Yidiokila Kudiay Sakatang Wetu

Nzamb wamukana muprofet Aburaham anch, kusutil muntu umwing wa mu dijuku diend kwawiy kwafanyinau “michid yawonsu ya pansh” kutambul yiyukish. (Disambishil 22:18) Nany wafanyina kwikal muntu winou?

Pasutin kal mivu 2000, Nzamb wamwinkisha Yesu, muntu wading wa mu dijuku dia Aburaham usu wa kusal yilay yivud. Yilay yiney yamekesha patok anch yiyukish yamukanau Aburaham mulong wa michid yafanyina kuwanyin kusutil kudiay Yesu.—Galatia 3:14.

Yilay yasalay Yesu yamekesha patok anch Yesu ndiy watondau kudi Nzamb mulong wa kuyukish michid ya antu ni yamekesha kand mutapu Nzamb ukezay kumusadin Yesu chakwel ayiyukisha antu chikupu. Yilay yasalay Yesu yamekesha kamu mikadil yend yiwamp yadingay nich.

Riy—Yesu wayoka ayej.

Dichuku dimwing, ikundj umwing wading uyedina musong wa mak wamwilembila Yesu chakwel amwoka. Yesu wamukwata ni wamuleja anch: “Nikatil kukok!” Kapamp kamwing mwin musong wa mak wayerika.—Marko 1:40-42.

Muchim wa kupan—Yesu wayidisha antu.

Yesu kakatap anch antu achirika ni nzal. Yisu yivud, wayidisha tunan twa antu kusutil mu chilay cha kuvudish mikat ni ansh akemp. (Mateu 14:17-21; 15:32-38) Papwishangau antu awonsu kudia, awonsu ikutang kupwa kwashalang kand yakudia yikwau.

Ranaken—Yesu wayivumbula afu.

Pamumanay mwadiamufu wafisha mwanend ikundj kapokal wadingay nend, ni wading kumukwashang, Yesu “wamwovila riy” kupwa wamuvumbula mwan winou.—Luka 7:12-15.

YIYUKISH YA CHIKUPU YIKWIKALA PA DIVU

Yesu wamekeshin kal patok anch Nzamb ukwet usu wa kuyukish antu. Piswimp ap, pakuchirikay Yesu mudi mwakanay, Mwin Dikand Diawonsu ukumusadin Yesu mulong wa kusal kand yilay yijim nakash pa mangand mawonsu!

Mwom ukez kwikal wa mutapu ik pakezay Nzamb kuwanyish kushilamu kwend kwamukanay Aburaham? Antu awonsu amukatina ni amulishina Nzamb akez “kaswan ngand” ni akez “kuzangijal mu chisambu.” (Kuseng 37:11) “Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—Kujingunik 21:4.Musangar mud ik ukwikalaku wa kushakam chikupu pa mangand mizwila nich chisambu! Chakwel wileja yom yivud piur pa yiyukish yikuletay Nzamb kusutil ku umutakel wa Yesu mu machuku ma kurutu, tukwitin amboku kwandam pa pakend pa www.jw.org.