Yawonsu Yiney Mulong Kwau wa Kusip!

KWADING ayangadim aad ading endina pamwing mu Musumb wa Baguio mu Filipine. Amana prezantwar, pakwez kasejapaku. Nambaz Helen wading ku prezantwar wayisipisha. Ayangadim inay adandamena kusut, pakwez ashimoka mutapu wayisipishau kud Helen.

Kupwa, pading pachirikinau ayangadim inay kwol kwau mu bis, amana ku Chot cha Want kwading kufundinau jw.org nich mamuny majim. Avurika anch mawiy mamuny mamanangau kand ku prezantwar pasutangau. Ashirika mu bis aya ku Chot cha Want, ni amana program wading ulimikinau pa chis cha Chot ulejena chisu chikata kukumangan yikumangen kushalijan.

Ayangadim inay akumangana ku yikumangan yalondulaku. Pading pandaminau mu Chot cha Want, akashimuka pamumanau Helen! Avurika kapamp kamwing anch ndiy muntu wayisipishina. Helen ulondin anch: “Pading pansejidinau piswimp, niyakamisha nakash. Natonga anch pamwing ap kud chom chiyimp nasalang.” Pakwez ayangadim inay amurumburila Helen mutapu wading yom.

Ayangadim inay asangera yikumangan ni iyova nawamp kwikal pamwing ni akadivar ni anambaz; iyova kamu mud kwol kwau. Pamanau antu akwau akat kukomb mu Chot cha Want kupwa kwa yikumangan, niyau ita anch akutwish kukwash. Changadim umwing wayil kal mwi ngand yikwau, pakwez changadim mukwau ukat kukumangan pakad kujing ni wasambishin kal kwilej Bibil—yawonsu yiney mulong kwau wa kusip!