Imenap Ayinau Rukat

YOMARA ni ampanyend​—Marcelo ni Hiver—​ashich mu kaul kakemp kadia mu Gwatemala. Yomara wasambisha kwilej Bibil ni Atuman a Yehova, kupwa ampanyend niyau asambisha kwilej Bibil. Pakwez kwading chikokujol. Awonsu asatu ad amputames, ni kadingap kija kutang mifund ya braille. Chawiy mukadivar wilejang nau Bibil ndiy wayitanginang maparagraf ni maverse ma Bibil.

Chikokujol chikwau chading piur pa yikumangan. Ayinau kadingap kakweta mutapu wa kuya ku Chot cha Want cha piswimp ni kwol kwau, pading pitina kusal aminit 40. Pakwez akadivar mu chikumangen atenchika mulong wa kusambish kuyitwalang ku yikumangan yawonsu. Ni pasambishau kusal yikunku ku yikumangan ya mukach mwa rubing, akadivar ayikwashang kulam mu manangu yom yikulondau.

Mwi Ngond wa 5, 2019, yikumangan yasambisha kusadikin mu ul wau. Pa chisu chinicha, ambay a uruw adia ayibol ashemunikina mu ul winiwa. Itekina mupak wa kuyikwash awonsu asatu kutang ni kufund braille, ap anch ambay a uruw inay ayinau kadingap kija kumutang ni kumufund. Aya ku Bibiliyotek kwilej braille ni mutapu wa kuyifundishay antu akwau.

Kupwa kwa angond akemp, awonsu asatu ijika kutang nawamp braille, ni chinech chayikwasha kuya kurutu mu spiritu pakad kulab.a Katat Yomara, Marcelo, ni Hiver ad ayibol a rawonsu. Marcelo ud nkwash a mudimu. Rubing rakabuj akat kwipan nakash mu mijikit ya mu spiritu. Mushiku wau ukat kuyibachik antu akwau kuyimburij.

Anamaku inay asatu ajikitishin nakash mulong wa mutapu uyikwashinau ni rukat riyimekeshidinau mu chikumangen. Yomara ulondin anch: “Kudiosh kamu kapamp kakusambish twamanijana nau, Atuman a Yehova akat kutumekeshin rukat rakin ra win Kristu.” Marcelo niyend ulondin anch: “Tukwet arund awamp nakash mu chikumangen, ni tud mu dijuku dia pa mangand mawonsu didia mu umwing mulong akatijadin.” Yomara ni ampanyend achingedin nich impu kuman dichuku divu dikwikala paradis.—Kus. 37:10, 11; Isay 35:5.