Yipul ya in Kutang

Mutu wa mulong “Dijin Diey Aditumbish” udia mu Chinong cha Kalam cha Ngond wa 6, 2020 wovikesha mutapu ik nawamp yitiyij yetu piur pa dijin dia Yehova ni ukaleng wend?

Mu mutu wa mulong winiwa twileja anch kud mulong umwing wa usey nakash uyitadina yitang yawonsu yikweta manangu: kutumbish dijin dijim dia Yehova. Mulong utadina ukaleng—charumburik anch kwijik anch mutapu wa kuyikel wa Yehova wawiy upandakena kuwap ap bwat—ukwatijadin ni mulong ujim wa kutumbish dijin dia Yehova. Chilik chimwing, mulong wa kushinshaman kwa antu niwawiy ukwatijadina ni mulong ujim wa kutumbish dijin dia Yehova.

Mulong wak chad tukasikeshina anch mulong ujim wimedin pa dijin dia Yehova ni kuditumbish? Twisambinany mayingishin masatu.

Chakusambish, mu chir cha Eden, Satan waswingisha dijin dia Yehova, charumburik anch kalimish kend. Chipul chamwipulau Ev kud Satan chamekesha anch Yehova kadiap mwin kupan ni mbil jayitekinay antu end jading jikash nakash. Chawiy Satan watadika yom yalonday Yehova, ni wamukwata makasu. Mwamu wamufukejina Yehova. Wikala “Djabul,” charumburik anch “mwin kafukej.” (Yoh. 8:44, NWT.) Mulong Ev witiya makasu ma Satan, walika kumuziyin Nzamb ni mwamu wabwambwila ku ukaleng wend. (Dis. 3:1-6) Kushik ni nlel, Satan udandamedin kumufukejin Yehova, ukat kupalangesh makasu piur pend. Antu akata kwitiyij makasu minam akat kushiken kumubwambwil Yehova. Chawiy kud antu a Nzamb, kufukejin dijin ditumbila dia Yehova kud kuburen kutentam kuyimp nakash. Wawiy musul wa mar ni uyimp wawonsu udia mu mangand.

Cha kaad, mulong wa uwamp wa yitang yawonsu, Yehova ukutumbish dijin diend, ukudishitwish ku masaal mawonsu. Chinech chawiy chom cha usey nakash ku mes ma Yehova. Kwawiy kulondinay anch: “Nikumekesh katumb ka dijin diam dijim.” (Ezek. 36:23) Ni Yesu wamekesha patok chom chifanyidina kwikal cha usey nakash mu malembil ma atushalapol awonsu ashinshamena a Yehova, palonday anch: “Dijin diey aditumbish.” (Mat. 6:9) Tupamp ni tupamp, Bibil ukasikeshidin nakash pa usey wa kutumbish dijin dia Yehova. Shinshikinaku yilakej yikemp: “Mwinkishany Yehova katumb kawanyidina dijin diend.” (1 Jnsg. 16:29; Kus. 96:8, NTW.) “Wangany kushiman kwa dijin diend.” (Kus. 66:2) “Nikez katumbish kand dijin diey chikupu.” (Kus. 86:12) Kapamp kamwing pakach pa tupamp twalonday Yehova amwinend kudiokal mwiur kashikena ku tempel mu Yerusalem palonday Yesu anch: “Tatuku, tumbish dijin diey!” Kupwa Yehova wakula anch: “Naditumbish kal, nikez kaditumbish kand!”​—Yoh. 12:28, TMK.a

Chakasatu, rutong ra Yehova rikukwatijan ching ni dijin diend, ap kalimish ka dijin diend. Shinshikin yom yiney: Yom ik yikusadika kupwa kwa kupak kwansudiel kukusadika kupwa kwa Mivu Kanan ya Winyikel wa Kristu? Ov, yitang yikweta manangu yikudandamen kand kwaurok piur pa mulong ujim wa kutumbish dijin dia Yehova? Mulong wa kwakul ku chipul chinech, tuvurikany bil yom yaad yikwatijadina ni mulong winou—kushinshaman kwa antu ni ukaleng wa pa mangand mawonsu. Ov, antu akushala ashinshamena akudandamen kand kuyipak mulong wa kumekesh kushinshaman kwau? Bwat. Akwikal awanyidina ni apakinau kal mu chilik chiwanyidina. Akutambul mwom wa chikupu. Ov, yitang yikweta manangu yikudandamen kand kwisambin, ap kwaurok piur pa ukaleng wa pa mangand mawonsu? Bwat. Mutapu wa kuyikel wa Yehova ukwijikan rawonsu anch wawiy upandakena kuwap. Chad chid nchik piur pa dijin dia Yehova?

Dijin dia Yehova akuditumbish chad rawonsu, akudishitwish ku masaal mawonsu. Dijin dia Yehova dikudandamen kwikal dia usey nakash kud atushalapol end awonsu mwiur ni pansh. Mulong wak? Mulong akuman yom yishimokishena yikudandamenay Yehova kusal. Tal yom yiney: Mulong nich kwikepish Yesu ukuchirish winyikel wawonsu kud Yehova, Nzamb “ukutakel yawonsu.” (1 Kor. 15:28) Kupwa chad, antu pa divu akusanger “want ipau wa uyaj [wa] an a Nzamb.” (Rom 8:21) Ni Yehova ukuwanyish rutong rend ra kubomb yitang yawonsu yikweta manangu mwiur ni pa divu chakwel asal dijuku dimwing dijim didia mu uumwing.​—Efes 1:10.

Kupwa kwa yom yiney yawonsu kuwanyin, mutapu ik ukwiyovau antu awonsu adia mu dijuku dia Yehova, mwiur ni pansh? Chakin kamu, tukwikal ni maswir nakash ma kudandamen kushiman dijin dipandakena kuwap dia Yehova. Nfund a kuseng David amupepila kufund anch: “Atumb kwend [Yehova] Nzamb . . . Ditumba kwau dijin diend dia uyaj chikupu.” (Kus. 72:18, 19) Chikupu ni chikupu tukudandamen kutan mayingishin masu ni masangareshina ma kusal mwamu.

Dijin dia Yehova dimekeshin yom yawonsu piur pend. Anch twatong piur pa dijin dia Yehova, Tukat kuvurik rukat rend. (1 Yoh. 4:8) Tukudandamen chisu chawonsu kuvurik anch Yehova watutanga mulong utukatin, wapana difut mulong utukatin, ni wamekesha anch mutapu wend wa kuyikel utentamin mulong utukatin. pakwez tukudandamen kuman mutapu utukatinay Yehova. Chikupu ni chikupu, tukwov ja kumusejin piswimp nakash mud Tatukwetu ni kushiman dijin diend dipandakena kuwap.—Kus. 73:28.