Nidandamedin Kwilej

Navadikina mu musumb ukemp wa Illinois uda piswimp ni Chicago mu Etas-Unis mu muvu wa 1927. Anvaj am ading ni an atan​—Jetha, Don, am, Karl, ni Joy. Etu awonsu twading tukatin kumusadin Yehova ni muchim wetu wawonsu. Jetha amutazuka ku kalas ka kaad ka shikol ya Galad mu muvu wa 1943. Don amutazuka ku Betel wa Brooklyn, New York, mu muvu wa 1944, Karl amutazuka ku Betel mu muvu wa 1947 ni Joy amutazuka mu muvu wa 1951. Chilakej chau chiwamp chankwasha niyam kwipan nakash mu mudimu wa Yehova.

MUTAPU TWIJIKA UYAKIN MU DIJUKU DETU

Tatuku ni Maku atangang Bibil ni mushiku ni ading amukatin Nzamb nakash. Atufundisha kand niyetu anau kumukat Nzamb. Pakwez tatuku kachingejinap kand egliz kupwa kwa kusal mu usalay pa chisu cha Njit ja Kusambish ja pa Mangand Mawonsu. Maku wasangara nakash mulong tatuku wachirika mukash. Chawiy wamwela anch: “Karl, el tuya ku egliz mud mutapu twasalang.” Pakwez tatuku wamwakula anch: “Nikutwadinaku kwam, pakwez am nikwandamap mukach.” Maku wamwipula anch: “Mulong wak?” Tatuku wamwakula anch: “Kwi njit nad kuman antakel a relijon umwing akat kuyiyukish amasalay a mitambu yawonsu! Ov, mwamu Nzamb wad ku mitambu yawonsu yaad?”

Kupwa, padingay Maku ku egliz, Atuman a Yehova aad eza kwol kwetu. Amwinkisha Tatuku mabuku maad mading ni mutu wa mulong ulondina anch Lumière, mading marumburila mukand wa Kujingunik. Tatuku wakata nakash mabuku minam ni wamatambula. Pamanay kamu Maku mabuku minam, wasambisha kumatang. Kupwa dichuku dimwing watanga jurnal wading uyitazukina antu awonsu ading akatina kukumangan ku dilejan da Bibil dikusadika kusutin buku Lumière. Maku wakwata mupak wa kuya. Pashikay, mband umwing ipal wazurila ku chis. Wading ukwet buku wend ku chikas, Maku wamwipula anch, “Buku winou umwilejinany kwinoku?” Mband winou wamwakula anch: “Inge, andam kwey mwanam.” Rubing rambakenap, Maku watusenda etu an awonsu ni twasambisha kukumangan rubing rawonsu.

Dichuku dimwing pitwading mu chikumangan, ntakel wanleja kutang Kuseng 144:15, ulondina anch antu awonsu amwifukwidina Yehova akweting musangar. Verse winou wampukuna kamu nakash, kuwejaku ni 1 Timote 1:11, ulondina anch Yehova ud ‘Nzamb wa musangar,’ ni Efes 5:1, utukasikeshina ‘kumwimburij Nzamb.’ Najingunina anch nifanyidin kwikal ni musangar wa kumusadin Sakatang wam ni kumujikitish mulong wa dilau nikweta da kumusadin. Yom yiney yaad yikala ya usey nakash mu mwom wam.

Chikumangen cha piswimp chading mu Chicago, mu akilometre 32. Pakwez twakumanganang. Ni ronganyin ram ra Bibil rakula. Nivurikin dichuku dimwing, mukadivar watakelang wamutonda Jetha mulong wa kwakul. Pakulay nalonda mu muchim anch: ‘Nad kamu nij yom yiney. Nafanyinang kuzambul chikas mulong wa kupan chakul.’ Chawiy nasambisha kwirijek ni kupan yakul yam. Cha usey nakash, napama mu spiritu pamwing nau anamakwam. Ambatisha mu muvu wa 1941.

ANFUDISHA KUD YEHOVA KU YITENTAM YA REJON

Pakampwil nivurikin chitentam cha rejon cha muvu wa 1942, chasadikina mu Cleveland, Ohio. Antu avud ading mu misumb 50 ni kusut ya Etas-Unis alondula program kusutin telefon. Dijuku detu dading dishich mu minkand pamwing ni majuku makwau mavud piswimp ni ndond yading yisadikidina chitentam. Njit ja Kaad ja pa Mangand Mawonsu jad kand kal jipwa ni Atuman a Yehova adandamena kuyipompat. Urel umwing, namana yisak ya akadivar imika ma motak mau amatadish pol ni akish kasu ka motak. Awonsu akwata mupak wa kusha muntu umwing mu motak mulong wa kusal ukalam uchuku. Mwamu anch kwez kanvundangesh, akadivar afanyina kwakish kasu ka motak mulong wa kubwik nich mes mau in kuletish kanvundangesh ni kuyitazuk akadivar akwau chakwel ayikwash. Antu akwau afanyina kwez mau mulong wa kukwash. Nalonda mu muchim anch: ‘Atushalapol a Yehova ayitenchikin kamu nawamp mulong wa chom chin chawonsu!’ Mulong niyova anch nid mu diking, natwisha kulal tul nawamp, kwikil chom chiyimp chashikena.

Mu kusut kwa mivu, pinandadamena kutongijokin pa chitentam chinech, najingunina anch maku kadingap ni wom ap yakamish. Wamuchingejinang kamu Yehova ni dirijek dend. Nikezap kavuramen chilakej chend chiwamp.

Machuku makemp kurutu kwa chitentam, Maku wikala chibol wa rawonsu. Chawiy watangang matu nakash ku madiskur mading misambidina mudimu wa chisu chawonsu. Pitwading tuchirikina ku chikumbu, walonda anch: “Nikatin kamu kudandamen ni mudimu wa uchibol, pakwez nikutwishap kuubomb ni midimu ya ku chikumbu.” Chawiy watwita ukwash. Twitiya, chawiy wamwinkisha mwan ni mwan chisend cha kurijek kapalakany kamwing ap twaad kurutu kwa chakuda cha pamanch. Anch twaya ku shikol, wasalang usu wa kwikal ni kashinsh anch tupalakany twawonsu tud twakurijek, kupwa wayangang chad mu mudimu wa kulejan. Maku wading kamu mband ukwatikena nakash, pakwez kayiduulangap anend. Pitwezang ku chikumbu mulong wa kuda kupwa kwa kudokal ku shikol, twamutanang maku washikang kal. Machuku mamwing anch twadokal ku shikol, twayangang nend mu mudimu wa kulejan. Ni mwamu, twamanang kamu chirumburikina kwikal chibol.

MUTAPU NASAMBISHA MUDIMU WA CHISU CHAWONSU

Nasambisha uchibol panading ni mivu 16. Ap anch Tatuku wad kand kal ikal Kaman, wading ukatin yom nading nisadina. Dichuku dimwing urel, namuleja tatuku anch chikalap nchik usu nisadina mu mudimu wa kulejan, nimenap kwam muntu wa kwilej nend Bibil. Kupwa kwa chisu chikemp, namwipula anch: “Ov, chiswapel tusambish kwilej ney Bibil?” Watongijoka mu chisu chikemp, kupwa wangakula anch: “Nimenap kwam diyingishin da kulikin.” Chawiy, tatuku ndiy muntu wa kusambish kwilej nend Bibil. Chading kamu chom cha pakampwil kud am!

Twileja buku “La vérité vous affranchira.” Kupwa kwa chisu kanang, najingunina anch Tatuku wading winkwashin kwikal mwin kwilej muwamp wa Bibil ni kwikal mwin kufundish muwamp. Chilakej, dichuku dimwing urel kupwa kwa kutang paragraf umwing, wanleja anch: “Novil kamu yom yilondinay buku. Pakwez ey mutapu ik wija anch buku ulondin yom yakin?” Nirijekap kwam mulong wa kwakul ku chipul chinech, chawiy namuleja anch: “Nikutwishap kukwakul pinap, pakwez nikukwakul chisu tukwileja kapamp kakwau.” Ni natwisha kutan chakul. Natana maverse mading movikeshina nawamp yom yading yifundinau mu buku. Kupwa, nikala ni chaku cha kukimbijol mulong wa kwirijek nawamp. Chinech chankwasha am ni tatuku kupam nawamp mu spiritu. Tatuku wasadina yom yading yilejinay ni amubatisha mu muvu wa 1952.

NADANDAMENA KWILEJ KU BETEL

Nadokala ku chikumbu ni mivu 17. Jethaa wikala mishoner, ni Don, amutazuka ku Betel. Awonsu aad ading akatin yisend yadingau nich, ni chinech chankasikesha nakash. Chawiy nizwisha formiler wa Betel ni wa Shikol ya Galad kapamp kamwing, ni nasha yom mu makas ma Yehova. Antazuka ku Betel mu muvu wa 1946.

Mu kusut kwa mivu, nikala ni yisend kushalijan ku Betel, chawiy nikala ni dilau da kwilej yom yivud. Mu mivu yawonsu 75 nikweta ku Betel, nilejin mutapu wa kuchap mabuku ni kutal milong ya nfalang. Nilejin kand kusadin ku Departema ukata kutum ni kutambul yom. Cha usey nakash nisangaredin nakash mafundish mawonsu ma mu spiritu tukata kutambul ku Betel kusutin difukwil da pamanch ni maprogram makwau.

Nileja kand yom yivud kusutin mwancham ikundj Karl, watazukau ku Betel mu muvu wa 1947. Wading mwin kwilej ni mulej muwamp wa Bibil. Dichuku dimwing namwita kwinkwash kurijek diskur nafanyina kusal. Namurumburila Karl anch nakumangejang kal yom yivud mulong wa kurijek nich diskur pakwez nijap mutapu wa kuyisadin. Wankwasha kusutin kwingipul anch: “Joel, wisu mutu wa mulong wa diskur dey?” Kapamp kamwing nadoshinaku dilejan. Nafanyina kwam kusadin yom yading yirumburila mutu wa mulong wa diskur dam ni kulik kuwejolamu yikwau. Nikuvuramenangap dilejan dined.

Mulong wa kwikal ni musangar ku Betel, tufanyidin kwipan nakash mu mudimu wa kulejan, chinech chikutwish kukukwash kuman yom yisangareshina nakash. Nivurikin nawamp chom chimwing chasadika urel umwing mu musumb wa New York. Am ni mukadivar umwing twaya kumutal mband umwing watambula Chinong cha Kalam ni Lankany! Twiyijikisha kud ndiy ni twamuleja anch: “Urel winou, tuyikwashin antu kwilej yom yikasikeshina yida mu Bibil.” Watwakula anch: “Ang yoma ya Bibil, andamany.” Twatanga nend ni kwisambin maverse kushalijan malondina piur pa Want wa Nzamb ni ngand yisu yikweza mu machuku ma kurutu. Wasangara nakash, chawiy rubing rambakenap, wayitazuka arunend kushalijan kwez kwol kwend pa chisu cha dilejan da Bibil. Mu kusut kwa chisu ndiy ni nfumwend ikala atushalapol ashinshamena a Yehova.

NILEJA KUSUTIN MUKAJAM

Nakwata mupak wa kwatan. Kupwa kwa mivu 10 namana nambaz nafanyina kwatijan nend. Yom ik yankwasha kuman mband muwamp? Namulembila Yehova ni natongijokina pa yom nafanyina kusal kupwa kwa kwatan.

Kupwa kwa chitentam cha rejon cha muvu wa 1953 chasadikina mu Yankee Stadium, namanijana ni nambaz umwing dijin dend Mary Aniol. Asala shikol ya Galad pamwing ni Jetha. Mary wading mbay a mudimu wa mpanyam. Nich musangar, Mary wanleja yom yivud piur pa chisend chend cha umishoner mu Caribbean ni piur pa malejan ma Bibil matakedinay kal mu kusut kwa mivu. Pitwasambisha kwijikijan umwing ni mukwau, twajingunina anch etu awonsu twading tukwet mipak ya mu spiritu yimwing. Rukat retu rakula ni twatijana mwi Ngond wa 4, muvu wa 1955. Mu mitapu yivud, Mary wamekesha anch wading chipan cha Yehova ni chilakej chiwamp cha kwimburij. Wasangerang yisend yin yawonsu yamwinkishangau. Wasalang mudimu nakash, wayimbanginang antu akwau ni muchim umwing, ni watekang kand Want wa Nzamb pa ndond ya kusambish. (Mat. 6:33) Twasala nend mudimu wa munyingumuku mu mivu yisatu, ni mu muvu wa 1958, atutazuka etu awonsu ku Betel.

Nileja yom yivud kusutin Mary. Chilakej, chisu chikemp kupwa kwa kwatijan, twasambisha kutang Bibil pamwing, twatangang piswimp maverse 15. Anch muntu wapwish kutang, twisambinang maverse twatangang ni kuman mutapu tukutwisha kumasadin mu mwom wetu. Mary wanlejang chisu chawonsu yom yilejay ku Galad ni mu mudimu wa umishoner. Yom nileja kusutin ndiy yankwasha kuwapish mutapu wam wa kufundish ni kwijik mutapu wa kuyikasikesh anambaz.​—Jnsw. 25:11.

Mary mukajam mukatish wafil mu muvu wa 2013. Nichingejin kamu nakash kumuman mwi ngand yisu! Pakwez pa chisu chinech, nikwatin mupak wa kudandamen kwilej ni kumuchingejin Yehova ni muchim wam wawonsu. (Jnsw. 3:​5, 6) Nikat kutan dikasikesh ni musangar kusutin kutongijokin pa yom yikusalau atushalapol a Yehova mwi ngand yisu. Chinech chikwikal kand chisu cha kwilej yom yivud piur pa Mulej wetu Mujim! Inge, nikwetap mazu ma kumujikitish nich mulong wa yom yawonsu yanfudishinay kal ni mulong wa ranaken rend rijim ridandamedinay kwinmekeshin.