Ov, Uvurikin?

Ov, watangin nawamp manimero ma Chinong cha Kalam cha muvu winou? Akul lel ku yipul yilondwilaku ey:

Mutapu ik uday Yehova chilakej chiwamp piur pa mutapu wa kuyikwat amband?

Ukat kuyisadin pakad kasolikany ni kameningap anch amakundj ad a usey nakash kuyisutamu amband. Nzamb ukat kuyitesh amband, kubangin yovil ni milong yirishinau nich. Ni uyichingejidin mulong wa kusal mudimu wend.—w24.01, paj 15-16.

Mutapu ik tukutwisha kusadin Efes 5:7, ulondina anch: “Kangal wibombany nau”?

Mu verse winou, kambuy Paul utukasikeshin kulik kwibomb ni antu akad kuziyin kwi mbil ja Yehova. Antu inay akutwish kwikal antu tusutishina nau chisu pamwing mes ni mes ni antu tukata kwisamb nau pa tupend twa kupalangeshin jinsang.​—w24.03, paj 22-23.

Nsang ik ja makasu tufanyidina kubabel?

Tufanyidin kubabel nsang jakad musul jidokila kud akadivar nau anambaz, uruu udokila kud antu twakad kwijik ni kud in kupumbok amekeshina mud asangaredin uyakin.​—w24.04, paj 12.

Yom ik twija ni yom ik twakad kwijik piur pa mutapu ukurumburishay Yehova antu anay: Mwant Salomon, antu afa mu musumb wa Sodom ni Gomor ni afa ku Mabeb?

Twijap kamu nawamp anch Yehova wayisheshin kal chikupu. Pakwez twij anch ud Nzamb wa ranaken rijim.​—w24.05, paj 3-4.

Kwijik anch Nzamb ud “Diyal” kutwinkishin kashinsh ik? (Kuv. 32:4)

Yehova ud mpwembu yetu. Ud wa kuchingejin, ukat kuwanyish kushilamu kwend chisu chawonsu. Ni kakuswimpangap, wuntu ni ntong jend yikuswimpangap.​—w24.06, paj 26-28.

Yom ik yikutwisha kukukwash kwijidin chikumangen chisu?

Muchingejina Yehova. Ndiy ukukukwash mud mwayikwashay atushalapol end akwau pasak. Ipuk kufanakesh chikumangen chey chisu ni chiwadokalang. Ipana nakash mu chikumangen chey chisu, ni sal usu wa kwikal ni arund asu.​—w24.07, paj 26-28.

Malejan ik tudoshina ku yishimu yisatu yida mu Mateu shapitre 25?

Chishimu cha amikoku nau ampemb chimekeshin usey wa kushal ashinshamena kud Yehova. Chishimu cha atujik ababela ni ayisup chitukasikeshin kwikal irijekina ni achila ku mes. Ni chishimu cha atalant chimekeshin usey wa kwikal in mushiku ni in kusal mudimu ukash.​—w24.09, paj 20-24.

Kabway ka tempel wa Salomon kading kakwet kulep ik?

Mu 2 Jinsangu 3:4, mamaniskri mamwing makur malondin anch kabway kading kakwet kulep kwa kuya piur kwa “akude 120,” charumburik anch ametre 53. Pakwez makwau makuchingejin malondin anch “akude 20,” charumburik anch ametre chidivu. Chitongijok cha akude 20 chitanijadin ni kujimb kwa mbumbu ja tempel.​—w24.10, paj 31.

Chom ik chirumburikina kwikal nkwash a mudimu ‘watina mband umwing’? (1 Tim. 3:12)

Chirumburikin anch watin ching kusu mband umwing ni kafanyidinap kusal yisal ya masandj. Chikwau kand, kafanyidinap kwizez nau amband akwau.​—w24.11, paj 19.

Mulong wak tukutwish kulond anch mu Yohan 6:53 Yesu karumburilap yom yifanyidinau antu kusal pa chisu cha Yakuda ya Urel ya Mwant?

Yohan 6:53 ulejen usey wa kuda mujimbu wa Yesu ni kuna mash mend. Yesu walonda mazu minam mu Galaliya mu muvu wa 32 C.C, kud in Yuda ading afanyidina kumekesh ritiy muday ndiy. Wasala mwamu muvu umwing kurutu kwa kutek mufulandal wa Yakuda ya Urel ya Mwant mu Yerusalem. Kwinikwa Yesu wayileja antu akuyikelay nend pamwing mwiur.​—w24.12, paj 10-11.