Chikas cha Yehova Chiswipinap

1. Mutapu ik wamekeshay Moses anch umuchingejidin Yehova chisu chayitakelay in Isarel kubudik mu Idjibit?

PAKACH pa antu amekesha ritiy alejenau mu buku wa Hebereu pad Moses, muntu wamekesha ritiy rikash. (Heb. 3:2-5; 11:23-25) Wamekesha ritiy chisu chayitakelay in Isarel kubudik mu Idjibit. Kovap wom wa Farao ni chisak chend cha amasalay. Wamuchingejina Yehova, ni wayitakela antu kwauk pa Karung Musuz kupwa wayitakela kand mwi mpay. (Heb. 11:27-29) In Isarel avud alika kumuchingejin Yehova anch ukuyibangin, pakwez Moses wadandamena kumuchingejin. Moses wading ni mayingishin ma kwikal ni ritiy, mulong kusutin chilay, Nzamb wayinkisha ya kuda ni mem mulong wa kuwanyish maswir ma antu padingau mwi mpay.a​—Kub. 15:22-25; Kus. 78:23-25.

2. Mulong wak Nzamb wamwipula Moses anch: “Ov, chikas cha [Yehova] chiswipil”? (Kuchind 11:21-23)

² Ap anch Moses wading ni ritiy rikash, pakwez, muvu umwing kupwa kwa kuyibudish in Isarel mu Idjibit Moses wasambisha kwiyipul anch Yehova ukuyinkish kamu antwend mbij mud Mwayikanay. Mulong mwi mpay mwading mamiliyon ma antu, Moses katonginap mutapu wafanyinay Yehova kuyinkish antu awonsu mbij ja kuda. Chawiy Yehova wamwipula Moses anch: “Ov, chikas cha [Yehova] chiswipil?” (Tang Kuchind 11:21-23.) Pinap mazu “chikas cha [Yehova]” mamekeshin spiritu wa Nzamb ap usu wend wa kusal nich yom. Chawiy, Yehova wamwipula Moses anch: ‘Ov, utongin anch nikukangany kusal yom nalonda kusal?’

3. Mulong wak yom yamushikena Moses nau in Isarel yitutadin niyetu?

³ Ov, wiyipwilap kal anch chakin kamu Yehova ukuwanyish maswir mey ma kumujimbu ni ma dijuku dey? Chikal mwamu ap bwat, el tushinshikinany chilakej cha Moses ni in Isarel. Akanganya kwikal ni kashinsh anch Nzamb ukutwish kuyiwanyishin maswir mau. Tukushinshikin maverse mamwing makutukwasha kwikal ni kashinsh anch chikas cha Yehova chidap chiswip mulong wa kutukwash.

ILEJINA KUSUTIN CHILAKEJ CHA MOSES NI IN ISAREL

4. Yom ik yayibachika in Isarel kusambish kwidjidjek anch Yehova ukuwanyish maswir mau?

⁴ Mulong wak in Isarel asambisha kwidjidjek anch Yehova ukuwanyish maswir mau? Muchid wa Isarel ni “yisak ya mitapu ni mitapu” ya antu ading akad kwikal in Isarel ading mwi mpay kushik mu chisu kanang pading padokilau mu Idjibit mulong wa kuya mwi Ngand ya Kushilamu. (Kub. 12:38; Kuv. 8:15) Chisak cha antu ading akad kwikal in Isarel aziya kuda mana ni in Isarel avud aziya, chad awonsu inana. (Kuch. 11:4-6) Antu asambisha chad kutong yakuda yadingau nich mu Idjibit. Mulong amuswidosha nakash, Moses watonga anch ufanyidin kuyikimbin antu mbij, pakwez kadingap kija kwa kujitan.​—Kuch. 11:13, 14.

5-6. Yom ik tukutwisha kwilejin ku yibachikin ya chisak cha antu akad kwikal in Isarel pad in Isarel?

⁵ Chimeken anch antu ading akad kwikal in Isarel aburena muchim wa kujikitish mulong wa yom yawonsu yayinkishau kud Yehova ni in Isarel asambisha kutong mud awiy. Chom mud chinech chikutwish niyetu kutushiken. Anch tushich nau antu akad kujikitish, niyetu tukutwish kusambish kuburen kujikitish mulong wa yom yitwinkishinay Yehova. Chikutwish kushiken mwamu anch twasambish kutongin pa yom twadinga nich kwinsambishin ap anch twov ris ra yom yikwetau antu akwau. Pakwez, tukwikal ni musangar anch twakudish muchim wa kujikitish chikalap nchik yishiken.

⁶ In Isarel afanyina kuvurik anch Nzamb wayinkisha kashinsh anch chisu chikushikau mwi ngand yau akusanger yom yivud ya kumujimbu. Kushilamu kwinoku kwafanyina kuwanyin mwi Ngand ya Kushilamu, kadap chisu chadingau mwi mpay. Chilik chimwing, pa ndond pa kushinshikin pa yom twakad kwikal nich mu mangand minam, tufanyidin kutongin pa yom yatukaninay kal Yehova mwi ngand yisu. Tufanyidin kand kutongin pa maverse makutwisha kukasikesh ritiy retu muday Yehova.

7. Mulong wak tufanyidin kwikal ni kashinsh anch Yehova ukwet mutapu wa kutukwash chisu chawonsu?

⁷ Ukutwish kwiyipul mulong wak Nzamb wamwipula Moses anch: “Ov, chikas cha [Yehova] chiswipil?” Chimeken anch Yehova wamwipula Moses chipul chinech mulong wa kumutongish piur pa yom yaad: (1) Kand kal aburenangap usu. (2) Usu wend ukwetap mimbu. Ap anch in Isarel ading mwi mpay, Yehova wading kamu ni usu wa kuyinkish mbij jivud nakash. Nich “chikas chend cha usu,” Nzamb wamekesha anch ukutwish kuyikwash antwend ndond yawonsu yidau. (Kus. 136:11, 12) Chawiy, chisu turishina ni yikokujol, tufanyidin kwikal ni kashinsh anch Yehova ukumukwash umwing ni umwing wa pakach petu chikalap nchik ndond yiday.​—Kus. 138:6, 7.

8. Mutapu ik tukutwisha kwipuk kusal yom mud yasalau antu avud mwi mpay? (Tal kand chipich.)

⁸ Yehova wawanyisha kushilamu kwend ni wayitumina antwend angwad avud. Pakwez in Isarel kamujikitishap Nzamb mulong wa ­chilay chinech. Chinyim ni chinech, antu avud ikala chad ni ris kupandakan. Uchuku ni muten, anonang angwad avud kupandakanamu ading aswirikedinau. Yehova wajimana mulong wa “antu ading akweta rid riyimp,” ni wayipupa. (Kuch. 11:31-34) Tukutwish kwilejin ku chilakej chinech. Tufanyidin kucha ku mes chakwel kangal twikal ni ris. Twikala ampich ap atuzwendj, tufanyidin cha kusambish kukumangejin ‘mapit mwiur’ kusutin kwikal mu urund wa piswimp ni Yehova ni Yesu. (Mat. 6:19, 20; Luka 16:9) Anch twasal mwamu, tukutwish kwikal ni kashinsh anch Yehova ukubangin maswir metu.

9. Kashinsh ik tufanyidina kwikal nich piur pa ukwash wa Yehova?

⁹ Yehova ukat kuyikwash kand atushalapol end nlel. Chirumburikinap anch tukutwishap kuburen yom ya ku mujimbu ap kwov nzal.b Pakwez Yehova kakutulikap. Ukutukwash mu yikokujol yetu yin yawonsu. Mutapu ik tukutwisha kumekesh anch tuchingejin anch Yehova ukuwanyish maswir metu? El tushinshikinany yishiken yaad: (1) Chisu turishina ni milong ya nfalang ni (2) chisu tutenchikina yom mulong wa machuku ma kurutu.

ANCH TWARISH NI MILONG YA NFALANG

10. Milong ik ya nfalang tukutwisha kurish nich?

¹⁰ Payila mangand minam kushik kwinsuden, milong ya nfalang yikupandakan kuyip. Milong ya chipolitik, jinjit, mar madokila ku yom yatangau, ni yipupu yikutwish kutushikij: kushadish mudimu, kuburen yom ya ku mujimbu, ap kudokal ndond tushicha. Chikutwish pamwing ap kutwit kukimb mudimu kwi ndond yisu ap kutong ja kubuukin kwi ndond yindj mulong wa kuwanyish maswir ma dijuku detu. Yom ik yikutwisha kutukwash kukwat mipak yimekeshina anch tuchingejidin chikas cha Yehova?

11. Yom ik yikutwisha kukukwash kurish ni milong ya nfalang? (Luka 12:29-31)

¹¹ Chom cha kusambish ni cha usey ufanyidina kusal kud kumulej Yehova yakamish yetu. (Jnsw. 16:3) Mwita chakwel akwinkish manang uswirikedina mulong wa kukwat mipak yiwamp ni chakwel akukwash kushimpish muchim mulong wa kwipuk ‘kunenganan’ piur pa milong yey. (Tang Luka 12:29-31.) Mwilembina chakwel akukwash kusanger yom yida kamu ya usey mu mwom. (1 Tim. 6:7, 8) Kimbijol mu mikand yetu mutapu wa kurish nich milong ya nfalang. Antu avud alondin anch mavideo ni mitu ya milong yida pa jw.org yisambidina piur pa nfalang yayikwasha.

12. Yipul ik yikutwisha kumukwash mwin Kristu kukwat mupak uwamp mulong wa dijuku dend?

¹² Antu amwing itiya midimu yayita kusha majuku mau, pakwez avud ajingunin kal anch wadingap mupak wa manang. Kurutu kwa kwitiy mudimu usu, kangal washinshikin ching kusu kwau pa nfalang ukutambula, pakwez shinshikin kand pa urund wey ni Nzamb. (Luka 14:28) Iyipula anch: ‘Yom ik yikushikena mu uruw wetu anch namusha mbay nam wa uruw mu chisu chilemp? Ov, nikwikal ni mutapu wa kukumangan, kusal mudimu wa kulejan ap kusutish chisu ni akadivar nau anambaz?’ Anch ukwet an, ukutwish kwiyipul kand chipul chinech cha usey: ‘Mutapu ik nikutwisha kuyikwash an am ni kuyilil “mu dipup ni mu umutakel wa Yehova” anch nidap nau piswimp?’ (Efes 6:4) Chisu ukwatina mupak, lik yitongijok ya Nzamb yikutakel pa ndond pa kulondul yitongijok ya antu a mu dijuku ap aruney akad kulimish mbil ja Bibil.c Tony, uda mu Aziy wa kurand, amuleja tupamp tuvud kusal mudimu mwi ngand yindj. Pakwez, kupwa kwa kulembil ni kwisamb ni mukajend, wakwata mupak wa kulik midimu yiney ni kupipej mashakamin. Nlel Tony ulondin anch: “Nikadin ni dilau da kuyikwash antu avud kumwijik Yehova ni anetu amukatin Yehova nakash. Dijuku detu dileja anch ang twadandamen kusadin chiyul chilejenau mu Mateu 6:33, Yehova ukuwanyish maswir metu.”

CHISU TUTENCHIKINA YOM MULONG WA MACHUKU MA KURUTU

13. Yom ik tufanyidina kusal mu mutapu wisikena mulong wa kurijek mwom wetu wa kurutu?

¹³ Ruchingej retu mu ukwash wa Yehova akutwish kuripak chisu tushinshikidina mutapu ukwikala mwom wetu mu machuku ma kurutu. Bibil utukasikeshin kusal mudimu nakash mulong wa kurijek mwom wetu wa machuku ma kurutu. (Jnsw. 6:6-11) Anch chitwishikin, chid cha usey kwikal ni chaku cha kutekangaku nfalang kuns mulong wa machuku ma kurutu. Nfalang jikat kulet diking mu chilik kanang. (Mul. 7:12) Pakwez, nfalang jawiyap jifanyidina kwikal ja usey nakash mu mwom wetu.

14. Mulong wak tufanyidin kushinshikin Hebereu 13:5 chisu tutenchikina yom mulong wa machuku ma kurutu?

¹⁴ Yesu wasadina chilakej chimekeshina anch chidap cha manang kukumangej nfalang pakad kwikal ni “mapit makin ku mes kwa Nzamb.” (Luka 12:16-21) Kwikil muntu wija yom yikushikena damashik. (Jnsw. 23:4, 5; Jak. 4:13-15) Mulong tud in kwilej a Yesu, tukat kurish ni chikokujol cha pakampwil. Yesu walonda anch tufanyidin kwitiy “kusha” yom yawonsu tukweta mulong wa kwikal in kwilej end. (Luka 14:33.) In Kristu a mu mivu chitot ya kusambish a mu Yudea asala mwamu nich musangar. (Heb. 10:34) Mu chirung chetu, akadivar avud akat kulikap midimu yau ya nfalang jivud mulong wa kulik kunung chikas ku milong ya politik. (Kuj. 13:16, 17) Yom ik yikata kuyikwash kusal mwamu? Atekining ruchingej rau rawonsu mu kushilamu kwa Yehova kulondina anch: “Kinikukushap, kinikez kakulikap chikupu.” (Tang Hebereu 13:5.) Tukat kusal usu wa kurijek mwom wetu wa kurutu, ni anch kwashiken yom yakad kutongin, tukat kuchingejin mu ukwash wa Yehova.

15. Chitongijok ik chisikena chifanyidinau anvaj in Kristu kwikal nich piur pa anau? (Tal kand chipich.)

¹⁵ Ku jindond jimwing, ambay a uruw akatining kuval ni chitongijok chakwel anch pakunanapau, an awiy akuyilama. Bibil ulondin anch anvaj afanyidin kuwanyish maswir ma anau. (2 Kor. 12:14) Chakin, anvaj akutwish kuswiriken ukwash anch ananap, ni an avud akat kwirijek mulong wa kusal mwamu. (1 Tim. 5:4) Pakwez anvaj in Kristu ijing anch musangar wau ujim udokiling ku kuyikwash an kwikal atushalapol a Yehova, kadap ku kuyilil ni chitongijok chakwel anch an ez ayikwasha mu machuku ma kurutu.​—3 Yohan 4.

16. Mutapu ik ukutwishau anvaj kuyifumb anau chakwel ijika kuwanyish maswir mau ayinau? (Efes 4:28)

¹⁶ Kusutin chilakej chey, yifundisha aney kumuchingejin Yehova chisu uyikwashina kuman mutapu ukutwishau kuwanyish maswir mau anch apam. Pachidau an akemp, yikwasha kuman usey wa kusal mudimu nakash. (Jnsw. 29:21; tang Efes 4:28.) Payilau mu kupam, yikwasha kwilej ni mushiku. Anvaj in Kristu akutwish kukimbijol mbil ja Bibil mulong wa kuyikwash nich anau kukwat mipak ya manang piur pa shikol yikutwishau kwilej. Chitongijok chau chid cha kuyikwash an chakwel ez iwanyishinap maswir mau ayinau ni kwikal ni chisu cha kulejan ap kusal mudimu wa uchibol.

17. Kashinsh ik tufanyidina kwikal nich?

¹⁷ Atushalapol ashinshamena a Yehova akutwish kuchingejin ku ukaliweny ni rusot rend ra kuwanyish maswir mau. Pasejina disuden da mangand minam, tufanyidin kwijik anch ruchingej retu muday Yehova akuripak. Chikalap nchik yom yikushikena, twikalany ni kashinsh anch Yehova ukusadin usu wend mulong wa kuwanyish maswir metu ma ku mujimbu. Twikalany ni kashinsh anch chikas chend chikutwish kushik ndond yin yawonsu mulong wa kutukwash.