MUTU WA MULONG WA KWILEJ WA 30
MUMINY 97 Mwom Wakin Wimedin pa Dizu dia Nzamb
Ukutwish Kudandamen Kwilejin ku Mafundish ma pa Dishin Mada mu Bibil
“Chawiy nikatina chisu chawonsu kukuvurishany yom yiney, ap anch uyijany kal ni wiminyany daang mu uyakin uda mu en.”—2 PI. 1:12.
MU WISWIMP
Tukuman mutapu tukutwisha kusadin malejan ma usey twilejidina ku mafundish ma pa dishin mada mu Bibil ap anch kwasut kal mivu yivud kudosh twamileja.
1. Mafundish ma Bibil mikala ni usu ik mu mwom wey chisu wileja kapamp ka kusambish uyakin?
MAFUNDISH ma pa dishin mada mu Bibil maswimpin kal mwom wetu. Chilakej, chisu twileja anch Yehova dawiy dijin da Nzamb, twasambisha kumusejin piswimp. (Isay 42:8) Pitwileja uyakin piur pa mwikadil wa afu, twasambishap kand kwiyipul anch akatish netu afila kal amen mar ap bwat. (Mul. 9:10) Ni pitwileja kushilamu kwa Nzamb piur pa Paradis pa divu, twadandamenap kand kwiyakamish piur pa mutapu ukwikala mashakamin metu mu machuku ma kurutu. Twikala ni kashinsh anch tukutwish kushakam, kadap mu chisu chikemp—mu mivu 70 ap 80—pakwez chikupu.—Kus. 37:29; 90:10.
2. Mukand wa 2 Pita 1:12, 13 umekeshin mutapu ik anch in Kristu aswila akutwish kutaninamu mu mafundish ma pa dishin mada mu Bibil?
2 Tufanyidinap kuvuramen anch mafundish ma pa dishin mada mu Bibil makwet usey nakash. Mu mukand wend wa kaad, kambuy Pita wayifundina in Kristu ading “[iminya] daang mu uyakin.” (Tang 2 Pita 1:12, 13.) Pakwez pa chisu chinicha, mu chikumangen mwading antu ayimp ading akimbina kuyipumbul in Kristu ku uyakin. (2 Pi. 2:1-3) Pita wakata kuyikasikesh akadivar nau anambaz nend chakwel ichidij ku makasu mafundishangau antu inay ayimp. Chawiy wayivurisha mafundish mamwing mading milejau kal kudosh pakur. Mafundish minam mafanyina kuyikwash kushal ashinshamena kud Yehova djat ni kwinsuden.
3. Let chilakej chimekeshina mulong wak in Kristu awonsu afanyidin kudandamen kutongijokin pa mafundish ma pa dishin mada mu Bibil.
3 Ap anch twalabin kal mu uyakin, tukutwish kudandamen kwilejin ku mafundish ma pa dishin mada mu Bibil. Chilakej: In kwisuk aad, umwing walabina kal ni mukwau uchida kwilej akutwish kusadin yom yimwing mulong wa kwisuk nich. Walabina kal mu mudimu winou ukutwish kwisuk yom yitadina nakash kumusutamu uchida kwilej. Chilik chimwing kand, antu amusadidina kal Yehova mu mivu yivud akutwish kwilej malejan kushalijan kusutin mafundish ma pa dishin mada mu Bibil kusutamu mutapu ukutwishau kwilej antu achida kusambishinap kwilej Bibil. Mashakamin metu ni yisend yetu yaswimpin kal pamwing ap kudosh twatambwila dibatish. Anch twasadin yom twilejina kal kudosh pakur mu mashakamin metu ma katat, tukutwish kudoshinaku malejan masu ni kuman mutapu wa kumasadin. Tushinshikinany yom yikutwishau in Kristu aswila kwilejin ku mafundish masatu ma pa dishin mada mu Bibil.
YEHOVA UD SAKATANG
4. Uyakin twileja anch Yehova ud Sakatang ukwet usu ik pad etu?
4 “Watunga yom yawonsu ud Nzamb.” (Heb. 3:4) Twij anch divu ni yitang yawonsu yikweta mwom yidap ayitanga kud Sakatang ukweta manang ni usu wawonsu. Utwij nawamp nakash mulong Ndiy watutanga. Cha usey nakash, ukat kutubangin. Wij yom yida ya usey nakash kud etu. Kwijik uyakin umekena mud ukemp, anch Yehova ud Sakatang, kwaswimpin kal mwom wetu.
5. Uyakin ik ukutwisha kutukwash kwikal antu ikepishina? (Isay 45:9-12)
5 Kwijik anch Yehova ud Sakatang kutufundishin kand anch tufanyidin kwikal antu ikepishina. Chilakej, mu chisu kanang, Job walonda yom yakad kwikal yakin piur pa Yehova. Wavuramena yom yading kamu ya usey nakash ni wakimba kumekesh anch wading utentamin. Pakwez Yehova wamuvurisha anch ndiy uda Sakatang mwin dikand dawonsu. (Job 38:1-4) Chinech chamukwasha Job kuvurik anch yom yawonsu yikatay kusal Yehova yiding chisu chawonsu yitentamina. Kukwatijan ni uyakin winou, muprofet Isay wafunda mu kusut kwa chisu anch: “Ov, nsab ya kam yikutwish kulond kudi uyiumbila anch: ‘Usadil ik?’”—Tang Isay 45:9-12.
6. Chisu ik chida cha usey nakash kutongin pa manang ni usu wa Sakatang wetu? (Tal kand yipich.)
6 Anch mwin Kristu wikal ni ronganyin nakash, ukutwish kusambish kwichingejin amwinend pa ndond pa kumuchingejin Yehova ni umutakel wa Dizu Dend. (Job 37:23, 24) Pakwez chikwikal nchik anch muntu watongijokin nakash pa manang makad mwimbu ma Sakatang ni kujimb kwend? (Isay 40:22; 55:8, 9) Uyakin winou ukutwish kumukwash kudandamen kwikal muntu wikepishina ni kwijik anch yitongijok ya Yehova yid ya usey nakash.
Yom ik yikutwisha kutukwash kuman yitongijok yetu mu mutapu wisikena? (Tal paragraf wa 6)d
7. Yom ik yasalay Rahela yamukwasha kwitiy kuswimp kwa yom kwasadika mu dirijek?
7 Rahela, ushicha mwi ngand ya Sloveni, wajingunina anch kutongin nakash pa Sakatang wend kukat kumukwash kuziyin ku kuswimp kwa yom kukata kusadik mu dirijek. Ulondin anch: “Yisu yimwing chikat kwinkasiken kwitiy mipak yikwatinau kud antu atakedina. Chilakej, ap kupwa kwa kulondul Nsangu Jisu ja 8 Jidiokila ku Chisak Chitakedila 2023, nasangarap kumuman mukadivar ukweta wedj ukat kusal diskur. Chawiy namulembila Yehova chakwel ankwash kwijidin kuswimp kwinoku.” Rahela wikala ni kashinsh anch mulong Yehova ud Sakatang wa diur ni divu, ndiy uwanyidina kutakel dirijek dend mu mutapu uwamp. Anch umen anch chikukasikedin kwitiy kutesh kwa katat ap kulondul umutakel, ov, umenap anch chid cha usey kutongin nich kwikepish pa manang makad mwimbu ni usu wa Sakatang wetu?—Rom 11:33-36.
MULONG ULIKIDINAY NZAMB MAR
8. Kwilej mulong ulikidinay Nzamb mar kwakukwashin kal mutapu ik?
8 Mulong wak Nzamb ulikidin mar? Antu amujimedin kal Nzamb ni kutong anch kadapaku kwend mulong kijap mulong wak ulikidinay mar! (Jnsw. 19:3) Ey wilejin kal anch kadap Yehova uletishina mar, pakwez chid mulong wa chitil ni kuburen kuwanyin twaswana. Wilejin kal kand anch kushimpish muchim kwa Yehova kukwashin mamiliyon ma antu kumwijik ni kuman mutapu ukupwishay mar chikupu. (2 Pi. 3:9, 15) Uyakin winou wakukasikeshin kal nakash ni kukukwash kumusejin piswimp.
9. Chisu ik pakampwil tufanyidina kushinshikin mayingishin mamubachikina Yehova kulikidil mar?
9 Tufanyidin kushimpish muchim pituchingedina anch Yehova apwish mar mawonsu. Pakwez, anch twafish muntu tukatina, ap anch etu ayinetu ap muntu wa mu dijuku detu warish ni yikokujol ap kuburen kutentam, tukutwish kunenganan ni kuman anch Yehova ulabin nakash pa kupwish mar. (Aba. 1:2, 3) Anch twiyov mwamu, chikwikal cha usey kud etu kushinshikin kand mayingishin mamubachikina Yehova kulikidil mar.a (Kus. 34:20) Tukutwish kand kutongijokin pa rutong rend ra kupwish mar kapamp kamwing.
10. Yom ik yamukasikesha Anne kupwa kwa rufu ra makwend?
10 Kwijik mulong ulikidinay Nzamb mar kukutwish kutukwash kujijaman. Anne ushicha pa ditung da Mayot dida mu Karung wa End ulondin anch: “Mivu yikemp kupwa kwa kufish makwam nova ushon nakash. Pakwez yisu yivud navurikang anch Yehova kendiyap musul wa mar. Ukwet impu ya kupwish milad yawonsu ya mar ni kuyivumbul akatish netu afila kal. Kutongijokin pa uyakin winou kukat kwinletin chisambu cha mu manang ni kwinkasikesh.”
11. Kwijik mulong ulikidinay Nzamb mar kukutwish kutukwash mutapu ik kudandamen kulejan?
11 Kwijik mulong ulikidinay Nzamb mar kukutwish kutukwash kudandamen kulejan. Kupwa kwa kurumburil anch Nzamb ushimpishin muchim mulong ukatin anch antu awonsu apanda, Pita wafunda anch: “Tongijokany antu a mutapu ik ufanyidinanya kwikal, antu asadina yom ya mwikadil utumbila ni yisal ya kulamat kud Nzamb.” (2 Pi. 3:11) Pakach pa “yisal ya kulamat kud Nzamb” pad kand mudimu wetu wa kulejan. Mud Tatukwetu wa mwiur, niyetu tuyikatin antu. Tukatin anch ashakam mu mangand masu matentamina ma Nzamb. Nich kushimpish muchim, Yehova ukat kuyinkish antu ada kwi ndond ushicha mutapu wa kumwifukwil. Tukwet dilau da kwikal ambay a mudimu a Nzamb ni kuyikwash antu avud kwilej kumwijik kurutu kwa disuden da mangand kushik!—1 Ko. 3:9.
TUSHICH “MACHUKU MA NSUDEN”
12. Kwilej anch tushich mu “machuku ma nsuden” kutukwashin kwikal ni kashinsh ik?
12 Bibil wasambela kulejen patok mutapu ukwikalau antu mu “machuku ma nsuden.” (2 Tm. 3:1-5) Nlel anch twashinshikin mikadil yikwetau antu mu mangand, tukutwish kulond nich win kashinsh anch uprofet winou uwanyidin kamu. Mutapu uyila yom yiney kupandakan kuyip, ukat kutwinkish kashinsh anch Dizu da Nzamb did da kuchingejin.—2 Tm. 3:13-15.
13. Kukwatijan ni chilakej cha Yesu chida mu Luka 12:15-21, yipul ik tufanyidina kwiyipul?
13 Kwijik anch tushich machuku ma nsuden kutukwashin kand kushinshikin pa yom yida ya usey nakash. Man mulong wak chid cha usey kusal mwamu kusutin kushinshikin chilakej cha Yesu chida mu Luka 12:15-21. (Tang.) Mulong wak amutazukang ikundj mpich anch “muntu wakad manang”? Kadap mulong wading mpich, pakwez mulong kadingap kija yom yida chakin kamu ya usey. Wikumangejina “mapit, pakwez [kadingap] mpich ku mes ma Nzamb.” Kusadin chisu pakad manang kwading kurumbuk nakash, mulong ikundj winou kadingap ni machuku mavud ma kushakam pa mangand. Nzamb wamuleja ikundj winou anch: “Uchuku ou ey ukushadish mwom wey.” Nlel, payila mangand minam kushik kwi nsuden, tufanyidin kwiyipul anch: ‘Ov, mipak yam yimekeshin anch nishinshikidin pa yom yida ya usey nakash? Mipak ya mutapu ik niyikwashina anam kwitekin? Ov, nisadidin usu wam, chisu cham, ni nfalang jam mulong wa kwikumangejin mapit pa divu anch mulong wa kukumangejin mapit mwiur?’
14. Kukwatijan ni chilakej cha Miki, mulong wak chid cha usey kuvurik anch tushich machuku ma nsuden?
14 Anch twashinshikin nakash pa uman umekeshina anch tushich machuku ma nsuden, tukutwish kuman mipak ik tufanyidina kukwat. Yawiy yom yamushikena nambaz Miki. Ulondin anch: “Pinapwisha shikol, nading nikatin kusal mudimu ukwinkwasha kwilej yom yivud piur pa annam. Pakwez nading kand ni mupak wa kusal mud chibol wa rawonsu ni kusadin kwi ndond kuda maswir nakash. Arund aswila mu spiritu ankasikesha kutong mulong wa kuman anch chading chitwishikin kusal mudimu nading nikatina ni mu chisu chawiy chimwing kuwanyish mipak yam ya mu spiritu. Anvurisha anch disuden da mangand did piswimp. Anvurisha kand anch mu mangand masu, nikwilej yom yivud piur pa annam awonsu nikatina ni nikusal mwamu chikupu ni chikupu. Chawiy nakwata mupak wa kwilej shikol yafanyina kwinsend chisu chikemp ni kwinfundish midimu ya makas. Kusutin shikol yiney, nikala ni mudimu wankwasha kusal mudimu wa uchibol wa rawonsu ni mu kusut kwa chisu kubuukin mwi ngand ya Ekwater mwadinga maswir nakash.” Nlel Miki ni nfumwend ad mu mudimu wa munyingumuku mwi ngand yiniya.
15. Rumburil kusutin chilakej mutapu ukutwishau antu kuswimp ni kwitiy rusang ruwamp? (Tal kand yipich.)
15 Tufanyidinap kuziy anch antu alik kwau kutesh rusang ruwamp. Antu akutwish kuswimp. Shinshikin chilakej cha Yakobu mwanchend a Yesu. Wamumana mutapu wapamay Yesu, pikalay Mesiya, ni mutapu wayifundishangay antu nawamp kusutamu muntu win mwawonsu. Pakwez, mu mivu yivud, Yakobu kikalap mwin kwilej wa Yesu. Wikala mwin kwilej wa Yesu kupwa kwa kuvumbuk kwend. Wikala ni mushiku nakash!b (Yoh. 7:5; Gal. 2:9) Chid cha usey kulik kuziy mulong anamakwey akad kal kumekesh anch asangaredin uyakin ni kudandamen kulejan rusang ruwamp kud antu alika kukutesh kapamp ka kusambish. Vurik anch tushich machuku ma nsuden, chawiy mudimu wetu wa kulejan ud wa kuswapej. Yom uyilejina nlel akutwish kuyivurik ni kuyisadin mu machuku ma kurutu, ap pa chirung cha mar makash.c
Yom ik yikutwisha kutukwash kulik kuziy piur pa anamakwetu akad kwitiyij? (Tal paragraf wa 15)e
DANDAMEN KUMUJIKITISH YEHOVA MULONG WA YOM YIKATAY KUKUVURISH
16. Mutapu ik tukata kutaninamu kusutin yom yikatay kutuvurish Yehova? (Tal kand mushet “Sadin Uyakin Uda mu Bibil Mulong wa Kuyikwash Antu Akwau.”)
16 Yom yimwing yikatau kutufundish mu dirijek akat kuyitenchik mulong wa antu akad kwijik uyakin wa pa dishin uda mu Bibil. Chilakej, diskur da antu awonsu dikatau kusal rubing ni rubing, mitu ya milong yimwing ni mavideo yida pa jw.org, ni magazet ma antu awonsu makatau kubudish nakash mulong wa antu akad kwikal Atuman. Chikalap nchik mwamu, etu awonsu tukat kutaninamu. Yikat kukasikesh rukat retu mulong wa Yehova, kukasikesh ritiy retu mu Dizu dend, ni kutukwash kwikal in kufundish awamp a uyakin.—Kus. 19:7.
17. Chisu ik tufanyidina kutongijokin pa uyakin wa pa dishin uda mu Bibil?
17 Etu Atuman a Yehova, twoviling musangar anch kwikal mutapu usu wa kutesh uyakin. Pakwez tukat kusanger kand nakash uyakin wa pa dishin uda mu Bibil watukwasha kumusejin Yehova. Anch chatushiken kukasikeshin pa mutapu wetu wa kuman yom pa ndond pa kuziyin ku umutakel udokila mu dirijek da Yehova, tufanyidin kuvurik nich kwikepish anch Sakatang mwin dikand dawonsu ni ukweta manang mawonsu ndiy utakedila dirijek. Anch etu ap muntu tukatina urishin ni yikokujol, tufanyidin kushimpish muchim ni kuvurik mulong ulikidinay Yehova mar. Ni chisu tukwatina mupak piur pa mutapu wa kusadin chisu chetu ni yom yetu ya ku mujimbu, tufanyidin kuvurik yom yida ya usey nakash mu machuku minam ma nsuden. El Yom yikatay Yehova kutuvurish yidandamen kutukasikesh, kutwinkish manang, ni kutukwash kudandamen kumusadin nich kushinshaman.
MUMINY 95 Chitokish Chidandamedin Kuzaz
a Tal mutu wa mulong ulondina anch: “Mar Mawonsu Makupwa Katat Kamu Ak!” mu Chinong cha Kalam cha 15 Ngond wa 5, 2007 pa paj wa 14-18.
b Tal dilejan da 8 da broshir Yikata Antu—Ikadish in Kwilej.
c Tal mutu wa mulong ulondina anch “Yom ik Twija Piur pa Dirumburish da Yehova da Machuku ma Kurutu?” mu Chinong cha Kalam cha Ngond wa 5, 2024 pa paj wa 8-13.
d KURUMBURIL CHIPICH: Chitongijok cha mukurump umwing kachitiyinap mu chisak cha amakurump. Mu kusut kwa chisu, kupwa kwa kutal atutumbu mwiur utongijokin piur pa manang ni usu ukwetay Sakatang ni wajingunin kal anch yom yitonginay Yehova yikwet usey nakash kusutamu yitonginay ndiy.
e KURUMBURIL CHIPICH: Mu dilejan dend da pakampwil mukadivar ukat kushinshikin pa uman umekeshina anch tushich machuku ma nsuden. Chinech chamubachik kal kumutazuk mwanamakwend mulong wa kumwinkish uman.